Ոստիկանների հսկողության տակ է

Երեկ ոստիկանությունը հաղորդագրություն տարածեց, ըստ որի` մարտի 30-ին ոստիկանության ԿՀԴՊ գլխավոր վարչության ծառայողների ձեռնարկած միջոցառումների շնորհիվ պարզվել է, որ 16-ամյա Գեւորգ Խ.-ն, տիրապետելով համակարգչային եւ ծրագրավորման որոշակի հմտությունների` շուրջ մեկ ամիս առաջ ստեղծել է pokerakcia.tk եւ akcia.tk ինտերնետային կայքերը, որոնց մեջ տեղադրել է www.odnoklassniki.ru կայքի կրկնօրինակը: «Այնուհետեւ www.odnoklassniki.ru կայքի Poker world club խաղի հայտարարություններ բաժնում, կեղծ գովազդի միջոցով, խաղացողներին հրավիրել է մտնել իր կողմից ստեղծված կայքերը: Վերջիններս, համոզված լինելով, որ բացել են www.odnoklassniki.ru կայքը, մուտք են արել իրենց անուններն ու գաղտնաբառերը, իսկ Գեւորգ Խ.-ն, որսալով այդ տվյալները` դրանք ուղարկել է իր էլեկտրոնային փոստի հասցեով, որից հետո օգտագործելով նշված գաղտնաբառերը` մուտք է գործել քաղաքացիների անկետաներն ու իր հաշվին փոխանցել Poker world club խաղի նրանց միավորները»,- նշված է ոստիկանության հաղորդագրության մեջ: Ոստիկանությունից հայտնեցին նաեւ, որ Գեւորգ Խ.-ն ներկայացրել է իր անձնական օգտագործման էլեկտրոնային փոստի հասցեն, որտեղ առկա էին 57 «կոտրված» www.odnoklassniki.ru կայքի` տարբեր քաղաքացիներին պատկանող էջերի գաղտնաբառեր եւ այժմ կատարվում է քննություն: Երեկ մեզ հաջողվեց զրուցել 16-ամյա Գեւորգ Խաչատրյանի հետ: Նա Գեղարքունիքի Մարտունի քաղաքի բնակիչ է, սովորում է թիվ 2 դպրոցում: Նա մեզ պատմեց, որ դպրոցն ավարտելուց հետո պատրաստվում է շարունակել ուսումը եւ ծրագրավորում ուսումնասիրել: Համակարգչի հետ սկսել է աշխատել 10 տարեկանից. «Գնացել եմ համակարգչային դասընթացների, հետո զգացել եմ, որ ինձ դուր է գալիս համակարգչով աշխատել, դրա համար հետո ինքս սկսեցի անընդհատ համակարգչի հետ կապված բաներ սովորել»: Գեւորգը երեկ մեզ պատմեց, որ մարտի 30-ին իրենց տուն էին այցելել մի քանի ոստիկան եւ ասել, որ այն, ինչով ինքը զբաղվում է, համարվում է հանցագործություն, եւ «տարբեր մարդկանց անձնական տվյալների հետ կապված խախտում է արել»: Գեւորգի համար դա շատ անսպասելի է եղել, քանի որ ինքը չի իմացել, որ իր գործողությունների մեջ անօրինական ինչ-որ բան կա: «Չգիտեմ, թե ոնց են նրանք ինձ գտել, մենակ գիտեմ, որ մեր տան տեղը դպրոցից են իմացել ու եկել են մեր տուն: Էդ ամեն ինչը ասեցին, հետո ես ու պապան իրանց հետ գնացինք ոստիկանության բաժին»,- պատմեց Գեւորգը եւ ավելացրեց, որ ոստիկանության բաժնում իրեն բազմաթիվ հարցեր են տվել, հետո ասել, որ արդեն կարող է տուն գնալ, եւ նրա հետագա ճակատագիրը պարզ կլինի որոշ ժամանակ անց: 16-ամյա պատանին մեզ պատմեց, որ սոցիալական ցանցից օգտվողների անձնական տվյալները եւ գաղտնաբառերը գտնելու ձեւը հայտնաբերել է ինտերնետում. «Չեմ հիշում` որ սայթից: Google-ից կամ yandex-ից եմ գտել: Ես դա արել եմ սովորելու համար, համ էլ հետաքրքրության: Դա շատ շուտ էի սովորել, բայց ուշ որոշեցի անել: Էդ ամեն ինչը սարքել եմ կես ժամվա ընթացքում: Եղել են դեպքեր, երբ ընկերները կամ ծանոթները խնդրել են ինչ-որ մեկի էջի ծածկագիրը տամ, բայց ես չեմ տվել»: Նա մեզ ասաց նաեւ, որ թեեւ կարողացել է հավաքել սոցիալական ցանցի որոշ մասնակիցների գաղտնաբառերը, ինքն էլ երբեք չի օգտագործել դրանք: Գեւորգի խոսքով, իր արածի արդյունքում ինքն ընդամենը կարողացել է ինտերնետային խաղում միավորներ վաստակել եւ դրանից բացի այլ օգուտ չի հետապնդել. «Խաղում բոնուսներ էի կարողանում հանել: Խաղում բարձր ռեյտինգ էր ինձ տալիս, որեւէ մեկից ռեյտինգ չէր պակասում, ուղղակի ինձ մոտ էր ավելանում: Ես ուրիշների սայթերը չեմ օգտագործել, եղել է, որ ուզեցել եմ օգտագործել, բայց ինձ զսպել եմ ու չեմ արել»: Գեւորգը մեզ ասաց նաեւ, որ իր պատրաստած ծրագիրը արդեն փակվել է, բայց եթե ուզենա` կարող է նորից նման բան պատրաստել: Այնուհետեւ շտապեց ավելացնել, որ դժվար թե առաջիկայում իր մեջ նման ցանկություն առաջանա, քանի որ ինքն այժմ գտնվում է ոստիկանության հսկողության տակ: Ոստիկանության հասարակայնության հետ կապի եւ լրատվության վարչությունից երեկ մեզ հայտնեցին, որ նշված գործի առնչությամբ նախապատրաստված նյութերը ՀՀ Ոստիկանության կազմակերպված հանցավորության դեմ պայքարի վարչությունից երեկ ուղարկվել են ՀՀ ոստիկանության Գեղարքունիքի քննչական բաժանմունք, եւ եթե երիտասարդի գործողություններում քրեորեն պատժելի արարք հայտնաբերվի, ապա քրեական գործ կհարուցվի: