Հանդիսատեսը՝ բեմում, և անսովոր լուծումներ. Գյումրու դրամատիկականը 157-րդ թատերաշրջանը կբացի աննախադեպ մեծ երկու նախագծով

Հանդիսատեսը կնստի բեմում, գործողությունները կծավալվեն ետնաբեմում: Խոր ասելիքով ներկայացում է լինելու:

Գյումրու Վարդան Աճեմյանի անվան դրամատիկական թատրոնի 157-րդ թատերաշրջանն աննախադեպ երկու մեծ նախագծով է բացվելու: Այս պահին ստեղծագործական կազմը բուռն աշխատանքային եռուզեռի մեջ է:

Դրամատիկականի տնօրեն Լյուդվիգ Հարությունյանի օրը սկսվում և ավարտվում է մեծ լարվածությամբ, ամռան ամիսներին էլ են աշխատել: Այժմ հաճելի սպասումներ ունի: Հպարտությամբ ընդգծում է՝ դրամատիկականն իր բարձունքում է:

157-րդ թատերաշրջանը Հարությունյանն առանձնահատուկ է համարում, քանի որ միանգամից երկու առաջնախաղով է բացվելու, երկուսն էլ՝ խոր ու արդիական թեմաներ արծարծող: Առաջին ներկայացումը Սթիվեն Քինգի «Միզերին» է: Բեմադրությունը Գոռ Մարգարյանինն է, դերերում Համազգային թատրոնի դերասանուհի Տաթև Ղազարյանն ու Գյումրու դրամատիկականի դերասան Արսեն Սաղաթելյանն են: Առաջնախաղը կկայանա սեպտեմբերի 17-18-ին:

«Ես 2-3 տարի հրավիրում էի Գոռին, սակայն մեծ զբաղվածության պատճառով չէր կարողանում գալ: Նա այն ռեժիսորներից է, որի հետ յուրաքանչյուր թատրոն երջանիկ կլինի համագործակցել: Վերջապես եղավ մեր համագործակցությունը: Եվ, եթե Գոռն է, ուրեմն պետք է լինի հետաքրքիր նորամուծություն, նոր ձևաչափ: Որոշեցինք, որ ներկայացմանը հրավիրենք նաև մեկ այլ դերասանուհու՝ Համազգային թատրոնի դերասանուհի Տաթև Ղազարյանին, ում համար կարող եմ ասել, որ լավագույն դերասանուհիներից է: Տաթևն ընդունեց առաջարկը: Խմբին նաև միացավ դրամատիկականի դերասան Արսեն Սաղաթելյանը: Արդեն 3 ամիս աշխատում ենք»,- ասում է Հարությունյանը:

Հանդիսատեսը ներկայացումը չի վայելի դահլիճում. անսովոր լուծումներ են մտածվել՝ «Միզերի» ներկայացման ժամանակ դահլիճը կլինի բեմում:

Այս ներկայացման տոմսերը, ի տարբերություն մյուսների, մի փոքր թանկ են, սակայն սա չի խանգարել, որ «Միզրիի» առաջին օրվա բոլոր տոմսերը սպառվեն շատ արագ: Սեպտեմբերի 17-ի համար այլևս տոմսեր չկան:

««Միզերին» ամբողջությամբ թատրոնն է իր բյուջեով իրականացնում: Թվում է, թե բեմում է, փոքր ներկայացում է, սակայն բավականին ծախսատար է: Նոր նստատեղեր ենք ստեղծել, հատուկ գոտի ունենք նաև: 106 հանդիսատեսի համար է նախատեսված և հատուկ ներկայացում է սա: Մոտ 2 մլն դրամ ենք ծախսել, տոմսի արժեքը 3000-4000 դրամ է»,- ասում է Հարությունյանը:

Գյումրու դրամատիկականի տարվա թատերական իրադարձությունն այս թատերաշրջանի երկրորդ պրեմիերան է՝ Ուիլյամ Գիբսենի «Հրաշագործը»: Այն համատեղ ներկայացնում են Գյումրու դրամատիկականն ու Սոս Սարգսյանի անվան Համազգային թատրոնը: Բեմադրությունը ՀՀ ժողովրդական արտիստ, պրոֆեսոր Նիկոլայ Ծատուրյանինն է:

«Հայաստանում առաջին անգամ է նման նախագիծ իրականացվում, երբ երկու թատրոններ ունենում են համատեղ մեկ ներկայացում, և այդ ներկայացման առաջնախաղով բացվում է թատերաշրջանը: Կա, որ ռեժիսոր, դերասան են հրավիրվում, մենք այդ փորձն ունենք, բայց որ ներկայացում ծնվի, որը պետք է լինի միաժամանակ երկու թատրոնների խաղացանկում և 2 թատրոնների թատերաշրջանների բացում, սա առանձնահատուկ է: Համազգային թատրոնից 2 դերասան է ընդգրկված, 4 դերասան էլ Գյումրու թատրոնից է: Եվ, եթե համազգային թատրոն, ուրեմն Նարինե Գրիգորյան: Մեր թատրոնի համար մեծ պատիվ էր նրա հետ համագործակցելը, որը նաև այս ներկայացման գլխավոր դերակատարն է»,- շեշտում է Գյումրու թատրոնի տնօրենը:

«Հրաշագործը» ողջունել է ԿԳՄՍ նախարարությունը և 5 մլն դրամ հատկացրել: Սակայն երկու թատրոններն էլ իրենց մասնակցությունն ունեցել են, քանի որ 5 մլն դրամով, ըստ դրամատիկականի տնօրենի, քիչ բան է հնարավոր անել: Նաև «Հայկական կարիտասն» է ընդգրկվել այս աշխատանքներում. թեման է հետաքրքրել: Արդեն 4 ամիս է՝ ընթանում են աշխատանքները:

«Շատ չեմ բացի չակերտները, բայց ասեմ, որ ակտուալ է թեման: Նպատակ կա նաև այս ներկայացումը խաղալ արտերկրում: Ներկայացման դեկորացիան հսկայածավալ է: Ճշտությամբ պահվել է անգլիական ոճը, ամբողջը, նաև զգեստներն են զրոյից ստեղծվում: Առաջնախաղը կլինի սեպտեմբերի 24-ին և 25-ին: Հոկտեմբերին նույն ներկայացմամբ կբացվի Համազգայինի թատերաշրջանը»,- տեղեկացնում է Լյուդվիգ Հարությունյանը:

Եվս մեկ ներկայացում դեռ խմորման փուլում է. նպատակ կա դրամատիկականում անդրադառնալ ֆրանսիական ժամանակակից դրամատուրգիայի պրոպագանդմանը: Գործը կլինի Ժուեն Պոմբրայի «Երկու Կորեաների վերամիավորումը»: Այս պիեսից նկարիչն ու երաժշտական ձևավորողը պետք է Ֆրանսիայից հրավիրվեն. «Իրականանալու է, բայց հստակ ժամանակահատվածը չեմ կարող ասել: Սեղանի շուրջ աշխատանքները սկսվել են: Եվ եթե ամեն բան նորմալ ընթանա, նոյեմբերին ևս առաջնախաղ կունենանք»:

Դրամատիկականը տարեվերջին կներկայանա ավանդական ամանորյա ներկայացմամբ: Մինչ այդ՝ Մհեր Մկրտչյան բեմը կվստահվի երիտասարդ ռեժիսոր Արտուշ Միքայելյանին. կկայանա Մռոժեկի «Տունը սահմանին» ներկայցման առաջնախաղը:

Գյումրու դրամատիկականը ո՛չ հանդիսականի խնդիր ունի, ո՛չ տոմսի վաճառքի: Տնօրենն ասում է, դա ոչ թե իր անձով է պայմանավորված, այլ ստեղծագործական կազմով ու դրամատիկականի առողջ մթնոլորտով: Ապրիլ-մայիսին աննախադեպ ցուցանիշ են արձանագրել: Մեկ ամսում 30 ներկայացում են խաղացել, ընդունել 11.000 հանդիսականի: Քանի որ երկուշաբթի օրերը թատրոնը չի աշխատում, օր է եղել, որ 2 ներկայացում են  խաղացել: Այս հարցում մեծ դեր է ունեցել նաև Կառավարության կողմից իրականացվող դպրոցական աբոնեմենտային ծրագիրը:

Հարությունյանին հաճելիորեն զարմացրել է, որ այդ բումային ամիսների հանդիսականի մեծ մասն այլ մարզերից են եկել թատրոն: Եկել են՝ որպես զբոսաշրջիկ, երեկոյան էլ թատրոնն են նախընտրել:

Դրամատիկականի տնօրենը «Հայկական ժամանակի» հետ զրույցը եզրափակում է իր սկզբունքային տեսակետով:

«Թատրոնը երբեք չպետք է ասի՝ մենք անելիք չունենք. անելիք միշտ կա: Ինձ համար՝ որպես գեղարվեստական ղեկավարի, խնդիր է անընդհատ թատրոնը պահել ժամանակին համահունչ, խոսել ազնիվ, առանց նեգատիվի: Բացասական թեմաների չեմ ուզում անդրադառնալ, մեր կյանքում դրանց հանդիպում ենք ամեն քայլափոխի: Թատրոնում խոսում ենք սիրո, ազնվության, համերաշխության, լավատեսության մասին»,- ասում է նա:

Սամսոն Մատինյան