Լինում է՝ մկաններն են կտրվում, վնասվածքից չեն կարողանում քայլել․ բալետի արտիստները կօգտվեն բժշկական ապահովագրությունից

Ա․ Սպենդիարյանի անվան օպերայի եւ բալետի ազգային ակադեմիական թատրոնի արտիստներն այսուհետեւ կօգտվեն բժշկական ապահովագրական ծառայություններից։
Օպերային թատրոնի տնօրենի պաշտոնակատար Կարեն Դուրգարյանը «Հայկական ժամանակի» հետ զրույցում նշում է՝ հենց թատրոնում անցել է աշխատանքի, առաջնային ծրագրերի մեջ արտիստների ապահովագրության հարցն է ներառել։

«Պարտավոր էինք ապահովագրություն անել, որովհետեւ ամբողջ աշխարհում դա կա։ Թատրոնում, բեմահարթակում, եթե փորձի կամ ներկայացման ժամանակ արտիստն ստանում է վնասվածք, թատրոնը պետք է հոգա դրա համար»,- նկատում է նա։

Տնօրենի պաշտոնակատարի փոխանցմամբ՝ մի քանի ամիս այդ ուղղությամբ թղթաբանական եւ այլ հարցեր կարգավորելուց հետո ապահովագրության փաթեթն արդեն գործում է։ Ասում է՝ լուրը լսելուց հետո պարողներից երկու երիտասարդ է իրեն մոտեցել խնդրով, որոնք այժմ բուժհաստատություններից մեկում ստանում են իրենց անհրաժեշտ բուժումը։

«Իհարկե, լավ կլինի, որ ընդհանրապես վնասվածքներ չունենան մեր արտիստները, բայց գրեթե յուրաքանչյուր պարող ունենում է։ Բալետի արտիստ լինելը շատ բարդ է։ Բացի այն, որ սա դժվար մասնագիտություն է, նաեւ շատ կարճ է արտիստական կյանքը՝ մինչեւ 35 տարեկան են պարում, դրանից հետո արդեն կա՛մ ուրիշ մասնագիտություն են փնտրում, կա՛մ իբրեւ ուսուցիչ ու փորձավար են շարունակում իրենց աշխատանքը։ Այդ կարճ կարիերայի ընթացքում պատահում է, որ մկաններն են կտրվում, կամ այնպիսի վնասվածք են ստանում, որ մեկ տարի չեն կարողանում վերականգնվել. բալետի արտիստը բավականին դաժան ճանապարհ է անցնում։ Հիմա մենք փորձեցինք մեր ուժերի հնարավորության սահմաններում այդ բեռն ինչ-որ չափով թեթեւացնել»,- ընդգծում է նա։

Դուրգարյանն ասում է՝ աշխատել են ամեն ինչ այնպես կազմակերպել, որ արտիստն այդ բարդ ճանապարհին իրեն միայնակ չզգա եւ վնասվածքները բուժելու դեպքում էլ հավելյալ քաշքշուկների մեջ չհայտնվի։

Անդրադառնալով արդեն մեկ տարի ստանձնած տնօրենի պաշտոնակատարի պարտականություններին՝ վերջինս նկատում է՝ առաջին քայլը, որ փորձել են անել, յուրաքանչյուր ներկայացման համար անձնագիր պատրաստելն է, ինչը թատրոնում նոր բան է․ «Նախ, փորձում ենք հասկանալ, թե ներկայացումն ինչ արժե, ինչ ծախսեր են պահանջվում ու ինչ փոփոխությունների կարիք ունի։ Այդ ամենը գրանցվում է, նոր սկսվում են աշխատանքները։

Նրա դիտարկմամբ՝ անչափ կարեւոր է արտիստներին խրախուսելը։ Նայում են, թե որքան ռեսուրս ունեն եւ ինչ գումարի չափով կարող են հավելյալ խրախուսել նրանց․ «Անչափ կարեւոր է ստեղծել կոմֆորտ, որպեսզի արտիստը այլ հարցերի մասին շատ չմտածի։ Իհարկե, յուրաքանչյուր արտիստ իր կենցաղն ունի, այդ դաշտ չենք էլ մտնում, բայց եթե թատրոնը գումար է հայթայթում ու վաստակում, ուրեմն պարտավոր է որոշակի տոկոսը հատկացնել արտիստին։ Արդեն որոշ խմբեր այս ներդրած համակարգից օգտվում են, բայց սա եւս փուլային աշխատանք է։ Յուրաքանչյուր դեր ունի իր գինը, միջազգային փորձից ելնելով եւ համապատասխանեցնելով հայաստանյան կարգավիճակին՝ յուրաքանչյուր արտիստ ամսվա վերջ ստանում է գումար»։

Կարեն Դուրգարյանը, անդրադառնալով նաեւ արտիստների՝ ժամանակին բարձրաձայնած բեմական հագուստ եւ կոշիկ չունենալու խնդրին, շեշտում է՝ այն արդեն լուծված է։ Հիշեցնենք՝ արտիստները բողոքում էին եւ ստորագրահավաք էին իրականացրել՝ հայտնելով, որ իրենց տրամադրվող բեմական հագուստներն ու կոշիկներն անմաքուր են, չունեն նաեւ պատշաճ հանդերձարաններ։

«Այդ անձնագիր ասվածը մեզ նաեւ թույլ է տալիս հասկանալ՝ արդյոք արտիստի բեմական հագուստը պատրա՞ստ է, կոշիկներն ախտահանվա՞ծ են։ Այս ամենը բացթողած էր, ինչը կամաց-կամաց փորձում ենք շտկել»,- ընդգծում է նա։

Տնօրենի պաշտոնակատարը նաեւ հայտնում է՝ աշխատանքներ են տանում թատրոնի օտարված տարածքների վերադարձման ուղղությամբ։ Նրա խոսքով՝ թատրոնի տարածքը սահմանափակ է, օտարման գործընթացներն սկսվել են 20-25 տարի առաջ։ Մոտավորապես 1050 քմ կիլոմետր տրված է «Օպերա» ակումբին։

«Շորերն ու կոշիկները պետք է պատշաճ տեղում պահվեն, դեկորներ ենք պահպանում, այդ ամբողջ համակարգը խախտված է։ Հագուստը պահպանելու համար անհրաժեշտ են օդափոխիչներ, ճիշտ ջերմաստիճան եւ այլն։ Այս տարիների ընթացքում հագուստները պահվել են տոպրակների մեջ, իրար վրա լցված, կոշիկներն էլ՝ նույն ձեւով։ Այդ ամենը եւս փորձում ենք փուլ առ փուլ շտկել։ Այժմ ունենք համարակալված պահարաններ, որտեղ հագուստներն ու կոշիկները կանոնավոր կերպով շարված են, բայց մեզ անհրաժեշտ են դրանց համար պատշաճ սենյակներ»,- եզրափակում է նա։