Նոր «լյուդովիկոսներ են հայտնվել», թե Ֆրանսիան իրենք են, կաթողիկոսի կոչն էլ չօգնեց. քաղաքագետը՝ ընդդիմության հավաքի մասին

Սա առաջին դեպքը չէ, երբ ընդդիմությունը նման անլուրջ հայտարարություններ է անում: Իշխան Սաղաթելյանի այն հայտարարությունը, թե պետք է կատարենք ամենակարևոր սահմանազատումը՝ լինել Նիկոլի՞ հետ, թե՞ հայրենիքի, մի նպատակ ունի՝ մարդկանց ներգրավել հանրահավաքներին: Ժամանակին էլ ասում էին՝ ով հանրահավաքներին չի մասնակցում, մեզ հետ չէ, «Նիկոլ» է: Եվ դա ասում են մարդիկ, որոնք խորհրդարանում Նիկոլ Փաշինյանին են ընտրել:

«Հայկական ժամանակ»-ի հետ զրույցում անդրադառնալով նոյեմբերի 5-ի ընդդիմության հանրահավաքին՝ ասում է քաղաքագետ Էդվարդ Անտինյանը:

Վերջինս նկատում է՝ լրագրողների և ոստիկանների հետ միասին հանրահավաքին մասնակցում էր 5000 մարդ, այսինքն՝ միայն այդքա՞նն էին հայրենիքը ընտրում:

«Հիմա հայրենիքը ո՞վ է, այդ 5 հազար հոգի՞ն: Այդ 5 հազար հոգի՞ն է որոշելու երկրի ճակատագիրը, ո՞վ է իրենց ընտրել: Այսպիսի քայլեր են անում, դրա համար հասարակությունը նրանց մերժում է, նույնիսկ այն մարդիկ, որոնք մերժում են Նիկոլ Փաշինյանին: Հիմա այդ մարդիկ, որ ոչ մեկի կողքին չեն կանգնում, հայրենիքի հետ չե՞ն: Ի՜նչ անհեթեթ հայտարարություններ են, ինչ նոր «լյուդովիկոսներ են հայտնվել», թե Ֆրանսիան իրենք են: Չպետք է ինչ-որ մեկն իրենց նույնականացնի հայրենիքի հետ»,- ասում է նա:

Քաղաքագետը նշում է՝ նույնիսկ կաթողիկոսն է կոչ անում միանալ հանրահավաքին, սակայն չեն հավաքվում, որովհետև ընդդիմությունն անլուրջ է. «Մենք գիտենք, որ եկեղեցին անջատ է պետությունից, մենք աշխարհիկ ենք: Եկեղեցին իր հեղինակությունը պետք է բարձր պահեր, ոչ թե գնար ընդդիմության հավաքներին և ասեր, թե սա համազգային շարժում է: Կառույցի անունից հայտարարություն անելը կոպիտ միջամտություն է աշխարհիկ կյանքին: Դա իրենց հեղինակությունը չի ավելացնում: Եկեղեցին ցույց տվեց, որ իր ազդեցությունը այնքան է՝ 5 հազար հոգի: Իրենց ուշք ու միտքը Նիկոլ Փաշինյանին հեռացնելն է, ոչ թե պետության շահը, ով իրենց չի միանում, համարում են «նիկոլական»:

Անդրադառնալով ընդդիմության այն հայտարարությանը, թե իրենք կողմ են հայ-թուրքական, հայ-ադրբեջանական հարաբերությունների կարգավորմանը, բայց՝ առանց նախապայմանների, ուժի կիրառման, դիտարկմանը, որ ժամանակին լսել չէին ուզում հարաբերությունների կարգավորման մասին, ասում էին՝ հայը թուրքի հետ չի կարող «ընկերանալ», Անտինյանն ասում է՝ ընդդիմությունը ցույց տվեց, որ աշխարհաքաղաքական վիճակից ոչինչ չի հասկանում:

«Իրենք ամեն ինչին էլ կողմ են, միայն Նիկոլ Փաշինյանին են դեմ: Էլ չեն կարողանում ասել, թե դեմ են հարաբերությունների կարգավորմանը, պետք է Ռուսաստանի հետ հարաբերությունները լավացնել, քանի որ տեսնում են Ռուսաստանի վիճակը: Իրենք ժամանակին ուղղակի դեմ էին: Այլ ճանապարհ այդ հարաբերությունների կարգավորման փոխարեն իրենք ցույց չէին տալիս»,- ասում է նա և հավելում՝ ընդդիմությունը իշխանությունից մեկ գլուխ բարձր պետք է լինի, քանի որ նրանց դիրքն ավելի բարենպաստ է:

«Շահեկան դիրքերում է ընդդիմությունը, որովհետև կարող է գտնել և մատնանշել իշխանությունների բացերը, առավել ևս այն ընդդիմությունը, որը կառավարման փորձ ունի: Բայց մենք տեսնում ենք իրենց ու ապշում, թե ինչպես են երկիր ղեկավարել: Գրագետ չեն կարողանում օգտվել իրենց շահեկան դիրքերից, քանի որ պատվիրատուները՝ Ռոբերտ Քոչարյանը ու Սերժ Սարգսյանը, անգրագետ են: Թիմում գրագետ, ճանապարհ անցած մարդիկ կան, բայց անգրագետի դեր են խաղում, որովհետև պատվիրատուները այդպիսին են, նրանք դա են պահանջում»,- նշում է նա:

Հարցադրմանը՝ ամիսը մեկ անգամ Ֆրանսիայի հրապարակում հանրահավաքներ անցկացնելը, իր կարծիքով, ի՞նչ է տալու ընդդիմությանը, զրուցակիցը նկատում է՝  ընդդիմությունը ամեն անգամ մտածում է, թե աշխարհաքաղաքական փոփոխություններ կարող են լինել, և իրենց շանսերը մեծացել են:

«Բայց չեն պատկերացնում, որ իշխանության կորցրած ձայներն իրենց չի գալու, այստեղ էլ են անգրագետ: Մտածում են Փաշինյանի նման հանրահավաքներ անեն, քայլերթեր կազմակերպեն, իրենց բախտը բերելու է: Չեն հասկանում, որ իրենք կորցրել են նաև այն ձայները, որոնք հավաքել էին ընտրությունների ընթացքում»,- կարծում է նա: