Թերի նախագծով և առանց տնօրենի գիտության․ Գյումրու տիկնիկային թատրոնում սուբվենցիոն ծրագրով շինարարություն է մեկնարկել

Գյումրու տիկնիկային թատրոնի դռները օգոստոսից փակ են. այստեղ սուբվենցիոն ծրագրով շինարարական աշխատանքներ են մեկնարկել:

Շինարարը ձեռքի տակ եղած նախագծով, երբեմն էլ սեփական ցանկությամբ է առաջնորդվում, որի մասին նախապես տեղյակ չի եղել տիկնիկայինի տնօրեն Արմենուհի Մանուկյանը։

Նրան նախագծման և ընդհանրապես այս աշխատանքների քննարկման ու նախապատրաստական աշխատանքներում չընդգրկելու պատճառով այսօր սուբվենցիոն ծրագրում նոր ներդրման կարիք է առաջացել, քանի որ տիկնիկայինում կան խնդրահարույց հատվածներ, որոնք նախագծում ներառված չեն։

«Հայկական ժամանակ»-ի հետ զրույցում Մանուկյանն ասում է՝ չի կարող պատասխանել հարցին, թե ինչո՞ւ ինքը տեղեկացված չի եղել իր ղեկավարած հաստատությունում մեկնարկելիք շինարարության ծավալի ու նախագծի մասին։

«Ես ձեր այդ հարցի պատասխանը չունեմ, որովհետև չգիտեմ՝ ինչ պատճառով ինձ հետ քննարկում չեն ունեցել, ինչը, կարծում եմ, պետք է առաջնային լիներ այս գործում, քանզի տնօրենից լավ, ուրիշ մեկը չէր կարողանա իմանալ, թե թատրոնի որ հատվածում ինչ է պետք անել։ Հետևանքով հիմա ունենք հատվածներ՝ ֆոյեի հատվածը, դահլիճի հատվածը, լուսաձայնային հատվածը և մնացած այլ փոքրիկ հատվածներ, որոնք դուրս են մնացել»,- նկատում է տնօրենը։

Հարցի պատասխանը չունի նաև Շիրակի մարզպետարանի պատասխանատուն։ Մեզ հետ զրույցում կառույցի Զարգացման ծրագրերի, զբոսաշրջության և վերլուծության բաժնի պետ Կարեն Բադիշյանն ասում է՝ հարցի հասցեատերը համայնքապետարանն է։

Համայնքապետարանից էլ որևէ ճշտում անել մեզ չհաջողվեց։ Համայնքի ղեկավարի մամուլի քարտուղար Սոնա Առաքելյանի խոսքով՝ հարցին պետք է պատասխանի Մշակույթի և երիտասարդության հարցերի բաժնի պետը, որն այս պահին արձակուրդում է։

Մեր դիտարկմանը, որ կարող է պատասխանել բաժնի պետին փոխարինող այլ պաշտոնյա կամ նրա տեղակալը, ըստ Առաքելյանի, որևէ մեկը իրավասու չէ. «Պետը կգա արձակուրդից, կպատասխանի»:

Այն հատվածների շինարարությունը, որը դուրս է մնացել ծրագրից, սակայն, ըստ էության, կարևոր է, հնարավոր է իրականացնել սուբվենցիոն նոր հատկացման պարագայում միայն։

Մարզպետարանի պատասխանատուն բացատրում է՝ ոչ թե նոր սուբվենցիա, այլ արդեն եղածի գումարային չափի ավելացում՝ համապատասխան հիմնավորումներով։ Իսկ հիմնավորումները կրկին Գյումրու համայնքապետարանն է անելու։ Մինչ այս պահը, սակայն, դեռ արձագանք չկա։ Մարզպետարանը մինչև համայնքից չստանա այդ գրությունը, Կառավարությանը դիմելու իրավունք չունի։

«Նախագծանախահաշվային որոշակի փոփոխություններ եթե լինեն, մոտ 10 տոկոսի չափով գումար է ավելանալու։ Դրա մեջ իր մասնաբաժինը համայնքը կրկին ունենալու է։ 45 տոկոս՝ պետություն, 55 տոկոս համայնք համամասնությունն է գործում։ Այս պարագայում երևի խոսքը 4 մլն դրամի մասին է, համայնքն էլ 5 մլն 500 հազար դրամի չափով ներդրում պետք է անի։ Իսկ եթե համայնքն այդ քայլին չգնա, ապա աշխատանքները կմնան, հաջորդ տարի ինքն իր ուժերով է անելու (-խմբ․ նկատի ունի համայնքապետարանին)»,- մանրամասնում է Բադիշյանը։

Նա նաև ընդգծում է՝ հիմա լա՞վ է՝ 55 տոկոսը տա համայնքապետարանը, թե՞ հետո 100 տոկոսով ստանձնի իր պարտավորությունը տիկնիկայինի նկատմամբ։

Երկար մտածելու ժամանակ չունեն, քանի որ արդեն մեկնարկած շինաշխատանքների վերջնաժամկետը դեկտեմբերն է։ Եթե համայնքը համաձայնում է, նաև Կառավարության հետ են գալիս ընդհանուր հայտարարի, նոր շինաշխատանքի փուլ է մեկնարկում, ապա այդ աշխատանքները, բնականաբար, դեկտեմբերին ավարտել չեն կարողանա։

Հենց մուտքի հատվածում են լուրջ խնդիրները. քարապատ հատակը ճաքճքված է, տակից անընդհատ ջուր է դուրս գալիս։ Այս վիճակում էին ընդունում ու ճանապարհում հանդիսականին։ Նաև պատերը մշակման կարիք ունեն։

Բադիշյանը նկատում է՝ լավ կլինի, որ միանգամից բոլոր աշխատանքներն ավարտվեին, ու առաջիկա տարիներին անելիք չմնար, թատրոնի աշխատանքները մեկ անգամ ևս չընդհատվեին։

Տիկնիկայինի տնօրենն էլ փաստում է՝ ճիշտ է, հանդիսականը դժգոհ է իրենց փակ դռներից, սակայն կփորձեն արտագնա ներկայացումների և հյուրախաղերի միջոցով այս բացը լրացնել, միայն թե բոլոր աշխատանքներն ամբողջական լինեն ու արդարացնեն հանդիսականի և իրենց հույսերը։

Շիրակի մարզպետարանի հանձնաժողովը տիկնիկային օրերս է այցելել, ստուգել կատարված աշխատանքն ու շինարարին հանձնարարել վերացնել նկատված բացթողումներն ու շտկել սխալները։

Շինարարը, ի դեպ, ըստ իր ցանկության, շագանակագույն է ներկել մուտքի փորագրապատ փայտե դուռը, որը տասնամյակներ շարունակ եղել է բաց ծիրանագույն։

Հարցին, թե շինաշխատանքները չավարտված՝ ինչո՞ւ է ներկվել դուռ, որով անընդհատ ներսուդուրս են դեռ անում շինարարները, և ինչո՞ւ է ներկվել սխալ գույնով, առանց տնօրենին զգուշացնելու կամ տեղյակ պահելու, շինկազմակերպության ղեկավարը հրեց ձայնագրիչն ու հեռացավ՝ ընթացքում գոռալով․ «Արդեն էդ հարցիցդ պարզ է, որ ստեղ ուրիշ բաների համար ես եկել, եկել՝ եսիմ ինչեր փորես, գտնիս»։

Տիկնիկային թատրոնի տնօրեն Արմենուհի Մանուկյանը մեր հանդիպման ավարտին ասում է՝ գերմանական մի կազմակերպության հետ հստակեցրել են, որ թատրոնն ունենա ժամանակակից տեխնոլոգիական լուծումներով ջեռուցման և օդափոխության համակարգ։

Լուսանկարները՝ «Հայկական ժամանակ»-ի