Չեմ կարծում, որ մեր գործընկերների հետ պետք է վերջնագրերի լեզվով խոսենք. ՀՀ վարչապետը՝ ՀԱՊԿ-ից դուրս գալու մասին

«Չեմ կարծում, որ մեր գործընկերների հետ պետք է վերջնագրերի լեզվով խոսենք: Այն, ինչ ունենք ասելու տվյալ իրադրության հետ կապված, արդեն հրապարակային ասվել է, և մեծ հաշվով ավելացնելու ոչինչ չկա: Նաև հրապարակային գնահատականներ են տրվել Լաչինի միջանցքը փակելու փաստին»:

Այս մասին այսօր հրավիրած մամուլի ասուլիսի ժամանակ ասաց ՀՀ վարչապետ Նիկոլ Փաշինյանը՝ պատասխանելով «Շանթ» հեռուստաընկերության լրագրողի հարցին, որ ռուսական տարբեր հարթակներում լուր են տարածվել, թե Հայաստանը վերջնագիր է ներկայացրել Ռուսաստանին, անգամ ժամկետ նշել հունվարի 10-ը, որ եթե չբացվի Լաչինի միջանցքը, ՀՀ-ն դուրս կգա ՀԱՊԿ-ից և ԱՊՀ-ից:

Անդրադառնալով հարցին, որ մեկ ամիս է, ինչ Լաչինի միջանցքը փակ է, և այս ընթացքում հնչել են բազում կոչեր, քննադատություններ՝ ուղղված ՀՀ-ին, որոնք նաև այն մասին են, որ ՀՀ-ն չի անում գործուն քայլեր: Հաշվի առնելով Հայաստանի հնարավորությունները, կարմիր գծերը՝ ինչպե՞ս եք պատկերացնում հարցի լուծումը, ի՞նչ ճանապարհով և ի՞նչ եք անում դրա համար, ՀՀ կառավարության ղեկավարը նշեց, որ ցանկանում է՝ ավելի ընդհանրական ու խորը հասկանանք տվյալ իրավիճակի կոնտեքստը:

«Իմ գնահատմամբ՝ այն, ինչ տեղի է ունենում Լաչինի միջանցքում, առաջին հերթին ԼՂ-ի ժողովրդին, հայությանը սեփական հայրենիքում ապրելու կամքը կոտրելու նպատակ ունի, ու սա է ամենակարևոր կոնտեքստը, խնդիրը, որը մենք պետք է հաշվի առնենք: Այս մասով ՀՀ կառավարության դիրքորոշումները արտահայտվել են: Մենք կարծում ենք՝ մեր գործիքակազմը պետք է լինի դիվանագիտական, այն է՝ միջազգային հնարավորինս մեծ ճնշում գործադրել Լաչինի միջանցքը բացելու հարցում»,- ասաց նա:

Վարչապետի խոսքով՝ 2020 թվականի նոյեմբերի 9-ի եռակողմ հայտարարության 6-րդ կետով Լաչինի միջանցքի վերաբերյալ իրավական պարտավորություններ են դրված, ըստ էության, Ադրբեջանական Հանրապետության և Ռուսաստանի Դաշնության վրա: Եռակողմ հայտարարության 6-րդ կետում, որը վերաբերում է Լաչինի միջանցքին, ՀՀ-ի վերաբերյալ որևէ ձևակերպում չկա:

«Մենք այս առումով կարծում ենք՝ մեր գործողությունները պետք է լինեն լիարժեք լեգիտիմ, և այս գործընթացում ու բոլոր մեր գործողություններում լեգիտիմությունը համարում ենք առանցքային նշանակություն ունեցող, ընդ որում՝ միջազգայնորեն լեգիտիմ դիրքորոշումներն ու մոտեցումները: Ուզում եմ նաև հիշեցնել՝ 2022 թ-ին ՀՀ-ն ԼՂ-ին աննախադեպ ծավալի՝ 170 մլրդ դրամի աջակցություն է ցուցաբերել: Մենք շարունակելու ենք դա անել ԼՂ մեր հայրենակիցների համար: Գիտեք՝ հումանիտար ճգնաժամը կառավարելու հարցում, ԼՂ ժողովրդին աջակցելու համար փոխվարչապետ Տիգրան Խաչատրյանի գլխավորությամբ ձևավորված է աշխատանքային խումբ: Գիտեք նաև՝ ՄԱԿ-ի ԱԽ-ի հարթակում հարցը բարձրացրել ենք, և այն շարունակում է մնալ նրանց օրակարգում»,- հիշեցրեց երկրի ղեկավարը:

Փաշինյանը կարևորեց ՌԴ խաղաղապահ զորախմբի Լաչինի միջանցքի բնականոն գործունեության ապահովումը:

«Ճիշտ է, Ադրբեջանը 2020 թվականի նոյեմբերի 9-ից հետո, ի հեճուկս, պայմանավորվածությունների, ԼՂ-ում ռուս խաղաղապահների մանդատը չի ստորագրել, բայց ուզում եմ տեղյակ լինեք՝ ՀՀ-ի և ՌԴ-ի պաշտպանության նախարարների ստորագրությամբ այդ մանդատը կա: Եթե հիշողությունս ինձ չի դավաճանում, այդ փաստաթղթում չկա որևէ նշում, որ այն ուժի մեջ է մտնում միայն 3 կողմերի ստորագրելուց հետո: Համենայն դեպս, համարում եմ այդ փաստաթուղթը որպես շարունակություն եռակողմ հայտարարության, գոյություն ունի. 2 երկրների նախարարները ստորագրել են դա: Մենք այդ հարաբերությունները պատկերացնում ենք հենց այդ շրջանակում: Չնայած առանց դրա էլ եռակողմ հայտարարությունն այդ հարցերի պատասխանը տալիս է. Լաչինի միջանցքը պետք է լինի ՌԴ խաղաղապահ ուժերի վերահսկողության ներքո, դա նշանակում է, որ որևէ այլ սուբյեկտ Լաչինի միջանցքում վերահսկողություն չպետք է ունենա»,- շեշտեց նա: