Առաջարկվում է աջակցություն գործատուին գործազուրկներին աշխատանքի ընդունելու համար, մասնավորապես՝ հաշմանդամություն ունեցող

ՀՀ կառավարության այսօրվա նիստի ժամանակ աշխատանքի և սոցիալական հարցերի նախարար Նարեկ Մկրտչյանը ներկայացրեց զբաղվածության խթանման նոր նախագիծը, որով առաջարկվում է աջակցություն ցուցաբերել այն գործատուներին, որոնք աշխատանքի կընդունեն գործազուրկ քաղաքացիների, մասնավորապես՝ նրանց, ովքեր կունենան հաշմանդամության կարգավիճակ կամ կլինեն ընտանեկան կամ սոցիալական նպաստ ստացող ընտանիքի անդամներ։ 

«Սահմանել ենք աջակցության տարբեր չափեր՝ ըստ աշխատանքի ընդունվողի տարիքից, երեխա ունենալու հանգամանքից, հաշմանդամության կարգավիճակից։ Ծրագրից կկարողանան օգտվել Հայաստանի Հանրապետության տարածքում պետական գրանցում ստացած այն իրավաբանական անձինք կամ անհատ ձեռնարկատերերը, որոնք չեն հանդիսանում հանրային ծառայություն իրականացնող պետական կառավարման համակարգի մարմին, վերջին երեք ամսվա ընթացքում անընդհատ ունեցել են առնվազն 10 վարձու աշխատող։ Միջոցառման շրջանակում գործատուն կկարողանա աշխատանքի ընդունել այն քաղաքացիներին, որոնք վերջին երեք ամսվա ընթացքում չեն հանդիսացել հարկ վճարող և վեց ամսվա ընթացքում չեն եղել աշխատանքային հարաբերությունների մեջ գործատուի հետ»,- մանրամասնեց նախարարը։ 

Ըստ Մկրտչյանի՝ խնդիր կա մեծացնել հաշմանդամություն ունեցող անձանց հոսքը աշխատաշուկա, այդ պատճառով ծրագրի շրջանակներում գործատուին տրամադրվող աջակցությունը տարբեր է:

«Այն գործատուները, որոնք մեկ տարով աշխատանքի կընդունեն հաշմանդամության 1-ին կամ 2-րդ կամ ֆունկցիոնալության խոր կամ ծանր սահմանափակում ունեցող անձանց, 12 ամիս շարունակ կստանան փոխհատուցում աշխատանքի ընդունված անձի աշխատավարձից հաշվարկված և վճարված եկամտային հարկի 100 տոկոսի չափով յուրաքանչյուր ամսվա համար, բայց ոչ ավելի, քան 50 հազար դրամ։ Ընդ որում՝ այլ բաղադրիչ ևս կա․ միանվագ 500 հազար ենք տրամադրում աշխատանքային միջավայրը խելամիտ հարմարություններով ապահովելու համար»,- ասաց նա:

Նախարարի խոսքով՝ մեկ այլ բաղադրիչով, եթե գործատուն աշխատանքի ընդունի ընտանեկան կամ սոցիալական նպաստ ստացող ընտանիքի 35-40 տարեկան գործազուրկ անձի, 6 ամիս շարունակ նրան կտրամադրվի փոխհատուցում ոչ ավելի, քան 12 հազար դրամի չափով․ «Մենք կարևորում ենք ակտիվ ծերության ծրագրերը և այդ մասով ևս աջակցություն ունենք, որը վերաբերում է ընտանեկան կամ սոցիալական նպաստ ստացող 63-ից բարձր տարիքի գործազուրկ անձանց։ Եթե գործատուն աշխատանքի ընդունի նրանց, ապա 6 ամիս ժամկետով այդ անձի աշխատավարձի եկամտահարկից 70 տոկոսի չափով ոչ ավելի, քան ամսական 21 հազար դրամ կստանա աջակցություն»։

Այս ծրագրով սահմանված ֆինանսական բոլոր աջակցությունները նախարարությունը տրամադրելու է աշխատանքային հարաբերությունների ընթացքում կամ դրա ավարտից հետո՝ հինգ օրվա ընթացքում։ 

Վարչապետը, արձագանքելով նախարարին, հետաքրքրվեց. «Ենթադրենք՝ ընդունել է շահառուին, այստեղ տարբեր ժամկետներ կան, ու առաջին-երկրորդ ամսից հասկանում է, որ դա այն աշխատողն է, որն իրեն պետք է, բայց մենք իրեն ասում ենք՝ 9 ամիս հետո աշխատողին ազատի՞ աշխատանքից, որ աջակցությունը ստանա՞ս։ Մարդ 9 ամիս աշխատեց, գործատուն էլ չի ուզում պայմանագիրը խզի, մենք էլ ասում ենք՝ որ չես ուզում իրեն գործից ազատես, մենք չենք տալիս այդ աջակցությունը»։ 

Նարեկ Մկրտչյանը, պատասխանելով Նիկոլ Փաշինյանի հարցադրմանը, ասաց. «Ամեն դեպքում, եթե պայմանագիրը կնքվել է, գործատուն աջակցությունը ստանալու է»։ 

Այնուհետև Կառավարության ղեկավարը կրկին ճշտող հարց հղեց. «Այսինքն՝ մենք գումարը տա՞լիս ենք 3 ամիսը լրանալուց 5 օր հետո, ոչ թե հարաբերությունները դադարելուց հինգ օր հետո։ Մեր ծրագրով սահմանված ժամկետից հինգ օր հետո ենք փոխհատուցումը տրամադրելու»: Նախարարը դրական արձագանքեց:

Վարչապետը խնդրեց նախարարին ուշադիր լինել նախագծում ձևակերպումներին։