Եթե Զատուլինն ասում է, որ Հայաստանի ռևանշիստներն իրենց «ռսաքոծը» չեն, դեռ չի նշանակում, որ այդպես է. Շիրինյան

Քաղաքագետ Լևոն Շիրինյանի կարծիքով՝ Հայաստանում իշխանափոխությունը եղավ ՌԴ-ի  համար անակնկալ կերպով, որն էլ, ըստ նրա, խառնեց նրանց հաշիվները: Այս ամենից հետո, Շիրինյանի խոսքով, նրանք սկսեցին ատել հեղափոխական ժողովրդին և հեղափոխական պետությանը:

Քաղաքագետն այս մասին ասում է «Հայկական ժամանակ»-ի հետ զրույցում՝ անդրադառնալով ՌԴ պատգամավոր Կոնստանտին Զատուլինի հարցազրույցին, որտեղ վերջինս մասնավորապես ասել է, թե իբր ժամանակին ինքը զգուշացրել է Հայաստանում իշխանափոխության հետևանքով ռուս-հայկական հարաբերությունների վատթարացման մասին:

«Եթե որևէ տեղ ժողովրդավարություն է լինում, ռուսները դա օրորոցից ատում են: ՀՀ-ում առաջին անգամ ընտրություններով ձևավորվեց իշխանություն, իսկ սա ՌԴ-ի համար մահ է, քանի որ իրենք մտածում են, որ Տիգրան Մեծի ժամանակներից սկսած՝ մեր տերերն են: Իրենք տրամադրվեցին թշնամաբար և, որպես կանոն, սկսեցին կենտրոնանալ հեղափոխության առաջնորդի դեմ, դա մեթոդ է, երբ ամբողջ կրակն ուղղում են ղեկավարի դեմ՝ տապալելու համար պետությունը»,- ասում է Շիրինյանն ու հավելում, որ առաջին անգամ ՌԴ-ն իր հարևանությամբ ունեցավ մի պետություն, որտեղ իշխանությունը ինքը կամ իր հատուկ գործակալները չեն ձևավորել, և սկսեցին «Լավրովի պլանի» ավելի արագ գործարկումը, որը սկսվել էր 2016 թվականի քառօրյա պատերազմից.

«Բայց տարօրինակ ձևով անգամ պատերազմից հետո այդ իշխանությունն ավելի կենսունակ եղավ, քան իրենք ենթադրում էին, և ձևավորվեց ՀՀ-ի ռևանշիզմը, որոնց մենք ընդդիմություն ենք անվանում, որոնք ռուսական օրիենտացիան են պաշտպանում, նաև՝ իրենց գողացածն ու թալանածը»:

Նույն հարցազրույցում Զատուլինը նաև մտահոգություն է հայտնել, որ հարաբերությունների վատթարացման վերջին միտումները կարող են կասկածի տակ դնել Գյումրիում ռուսական ռազմաբազայի առկայությունը: Ըստ քաղաքագետ Լևոն Շիրինյանի՝ այս կերպ Զատուլինը շոշափում է տրամադրություն՝ Հայաստանը ռազմաբազան հանելո՞ւ է, թե՞ չէ. «Իրենց փորացավը սա է, որովհետև իրենք էլ գիտեն՝ այն ռազմաբազան, որը ՀՀ-ի անվտանգությունը պետք է ապահովի, ոչ մի կապ չունի դրա հետ, այլ հակառակն է: Ահա, Զատուլինը դա է ուզում իմանալ՝ ՀՀ իշխանությունը ռազմաբազան ՀՀ-ից դուրս մղելո՞ւ է, թե՞ չէ»:

Անդրադառնալով ռուս պատգամավորի այն դիտարկմանը, թե իրենք սկզբունքորեն ընդդիմության հետ չեն աշխատում, այլ միայն իշխանությունների՝ Շիրինյանն ասում է, որ Զատուլինը ստում է:

«Իրենք աշխատում են և՛ իշխանության, և՛ ընդդիմության հետ. «5-րդ շարասյուն» նրանք ունեն ամեն տեղ, բայց քանի որ ՀՀ իշխանությունը առաջին դեմքերի մակարդակով իրենցը չէ, նշանակում է, որ դեմքերը պիտի փոխեն: Մեր ընդդիմություն կոչվածները Կոպերկինի ենթականերն են, ու եթե դրանց պատին դեմ տանք, ռուսական գաղտնի ծառայության սպաներ էլ գտնեք, չեմ կասկածում, ինչպես նաև Ղարաբաղի նախագահները, որ Բաքվին հանձնվեցին: Եթե Զատուլինն ասում է, որ դրանք իրենց «ռսաքոծը» չեն, դա դեռ չի նշանակում, որ դա այդպես է»,- ասում է Շիրինյանն ու հավելում, որ նրանց գործակալներին այստեղ պետք է սպասել նոր դեմքերով. «ՀՀ-ն ապակայունացնելու ծրագրից իրենք չեն հրաժարվել, ուղղակի հներին շպրտել են, հիմա նոր ռեսուրսներ են կենտրոնացնում: Պետք է նոր դեմքերով սպասել ռուսների գործակալներին, դրանք կարող են բևեռականներ լինել, կարող են ազգայնականներ կամ լիբերալներ ճարել, անգամ՝ Կրեմլին ծառայող ազատական արևմտամետներ: Բայց այդ մարդիկ պետք է իմանան՝ ինչպես հներին փչացրեցին ու հանձնեցին Բաքվին, նույն կերպ էլ իրենց են անելու»:

Քաղաքագետը նաև նկատում է՝ ռուսները մի սովորություն ունեն՝ դարերի ընթացքում իրենց ծառայածներին ոչնչացնում են:

«Արցախի բոլոր նախագահներին էլ իրենք Բաքվին հանձնեցին, ես շատ անգամ եմ զգուշացրել՝ ռուսները ձեզ քամելու են ու շպրտեն աղբանոց: Հույս ունեին, որ կանեն ու կփրկվեն, օրինակ, Բակո Սահակյանը անպայման Նեապոլում օպերային թատրոն կլսեր, բայց ռուսները իրենց լրտեսներին և «քոծերին» ոչնչացնում են. հանձնեցին Բաքվին որպես ապրանք, այնինչ կարող էին փախցնել, եթե Պուտինն ասեր՝ դրանց ձեռք չպիտի տաք, Շահրամանյանի նման ուղղաթիռով կգային»,- կարծում է նա:

Հերմինե Կարապետյան