Ինչու ընտրապայքարից դուրս եկավ Բայդենը, ինչ կլինի Թրամփի ընտրվելու դեպքում. մեկնաբանում է Առաքելյանը

Քաղաքագետ Էդգար Առաքելյանը կարծում է, որ ԱՄՆ գործող նախագահ Ջո Բայդենի՝ ընտրապայքարը թողնելու գլխավոր պատճառը առողջական խնդիրներն են:

Այս մասին նա ասում է «Հայկական ժամանակ»-ի հետ զրույցում՝ մեկնաբանելով Միացյալ Նահանգների ներքաղաքական իրադարձությունները:

Անդրադառնալով Դոնալդ Թրամփի այն հայտարարությանը, թե Բայդենը Միացյալ Նահանգների պատմության մեջ կմտնի որպես «վատագույն նախագահ»՝ վերջինս նկատում է, որ այն, ինչ ասում է Թրամփը, սովորաբար չի համապատասխանում իրականությանը:

«Բայդենի նախագահության տարիները ուղեկցվել են պանդեմիայով, բայց դրանով հանդերձ՝ նրա նախագահության ժամանակահատվածում ԱՄՆ տնտեսությունը գտնվում էր ամենաբարձր մակարդակի վրա, դա փաստում են անգամ տնտեսագետները»,- նշում է զրուցակիցը:

Միևնույն ժամանակ Առաքելյանն ասում է, որ Թրամփը և նրա թիմը հայտնվել են բավականին բարդ իրավիճակում:

«Թեև նրանք կարծում էին, որ Բայդենը կարող է դուրս գալ ընտրապայքարից, սակայն քիչ հավանական էին համարում, իսկ այժմ, ի դեմս Քամալա Հարրիսի, տեսնում են բավականին լուրջ թեկնածուի՝ քաղաքական լուրջ հետագծով: Բացի քաղաքական կենսագրությունը, նաև շատ կարևոր է նրա կին լինելու հանգամանքը. Նահանգները մինչ այս պահը չի ունեցել կին նախագահ: Մեկ այլ առավելություն էլ կա՝ նա ազգային փոքրամասնությունների ներկայացուցիչ է, ինչը նույնպես կարևոր հանգամանք է՝ հատկապես հաշվի առնելով Թրամփի, նրա փոխնախագահի և վերջինիս թիմի ռասիստական հայտարարությունները: Կարծում եմ՝ դեմոկրատները փոխնախագահի պաշտոնում էլ լուրջ թեկնածու կառաջադրեն, և այս տանդեմով Թրամփը շանսեր չունի անցնելու»,- տեսակետ է հայտնում բանախոսը:

Քաղաքագետը ընդգծում է ևս մի կարևոր բարոյական հանգամանք. «Փաստացի Թրամփին քրեական օրենսգրքի 34 կետերով մեղավոր են ճանաչել, նա դատապարտված հանցագործ է: Մի կողմից ընտրապայքարի մեջ է դատապարտված քրեական հանցագործը, մյուս կողմից՝ նախկին դատախազը, որը պաշտպանել է օրենքն ու իրավունքը: Այս առումով էլ խորհրդանշական է, և Քամալա Հարրիսն ունի առավելություններ: Բնականաբար, այս ամենը խառնելու է Թրամփփի և նրա թիմի խաղաքարտերը, ինչպես նաև ի չիք են դառնալու այն մարդկանց հույսերը, որոնք Թրամփի գալու հետ են կապում իրենց քաղաքական կեղտոտ նպատակները»:

Խոսելով ստեղծված իրավիճակից Ռուսաստանի օգտվելու մասին՝ Էդգար Առաքելյանն ասում է՝ բնականաբար, Պուտինի սիրելի և ցանկալի նախագահի թեկնածուն Թրամփն է, Ալիևը նույնպես նրա ընտրության հետ մեծ հույսեր է կապում:

«ՌԴ-ն չի թաքցնում իր համակրանքը Թրամփի նկատմամբ. օրերս Շուշիում՝ Ալիևի հրավիրած բեմականացված ասուլիսի ժամանակ, վերջինս էլ չթաքցրեց իր նախապատվությունը, և, բնականաբար, նրանք ունեն կոնկրետ սպասելիքներ: Թրամփը նաև անձնական հարաբերություններ ունի Ալիևի նախկին փեսայի հետ, նրանք նաև բիզնես առնչություններ ունեն, և Թրամփի գալու պարագայում, իհարկե, կփորձեն ՀՀ-ի դեմ սանձազերծել հերթական ագրեսիան: Թրամփի գալով՝ չեմ բացառում, որ Իսրայելը կհարվածի Իրանին, որում կներգրավվի նաև ԱՄՆ-ն, ինչը մեզ համար չափազանց վտանգավոր է»,- ասում է նա:

Ըստ քաղաքագետի՝ ցանկացած պարագայում Հայաստանը պետք է հույսը իր վրա դնի. «Բայց միևնույն ժամանակ հասկանում ենք, որ միջազգային կոնյուկտուրայից շատ բան է կախված: Թրամփը հայտարարում է, որ ուկրաինական ճակատում կգնան խաղաղության, իսկ դա փաստացի զիջում է՝ Ուկրաինայի հանձնում, որը ողբերգական հետևանքներ կարող է ունենալ ոչ միայն Ուկրաինայի, այլ՝ Եվրոպայի անվտանգության համար: Եթե Պուտինը հասնի իր նպատակին Ուկրաինայում, ապա նրան ոչինչ չի խանգարի առաջ գնալ այս անգամ Մերձբալթյան պետություններում, ինչպես նաև՝ Հարավային Կովկասում: Ըստ էության՝ Թրամփն արձակելու է Պուտինի, Ալիևի ձեռքերը, որոնք այսօր հայտարարում են, թե միջազգային հարաբերություններում բան է փոխվել և ուժով հնարավոր է հարցեր լուծել: Թրամփը փաստացի իրենց տալիս է ուժով հարցեր լուծելու քարտբլանշ»:

Վերջինիս կարծիքով, սակայն, վերոնշյալ սցենարը քիչ հավանական է, քանի որ Հարրիսի շանսերն ավելի մեծ են:

«Հարրիսը սենատոր աշխատած տարիներին եղել է ամենապրոհայկական քաղաքական գործիչներից մեկը և, ըստ էության, ԱՄՆ պատմության մեջ առաջին փոխնախագահը, որ պաշտոնապես դատապարտել է Հայոց ցեղասպանությունը և մշտապես հանդես է եկել պրոհայկական շահերի դիրքերից: Այդ առումով ամենաիդեալական տարբերակը կլիներ, որ նախագահի թեկնածու լիներ Հարրիսը, փոխնախագահ՝ Կալիֆոռնիայի նահանգապետը: Այնուամենայնիվ, Հարրիսի ընտրվելու պարագայում ունենալու ենք ՀՀ բարեկամ Միացյալ Նահանգներ»,- եզրափակում է քաղաքագետը: