Ական Շարմազանովի աշխատասենյակում է եղել եւ «բերման է ենթարկվել թանկարժեք մեքենայո՞վ»

Վանաձորի քաղաքապետի ՕԵԿ թեկնածու Արկադի Փելեշյանը մինչ բերման ենթարկվելը չի եղել իր երեխաների կնքահոր, Վանաձորի Տարոնի բաժնի ոստիկանապետ Էրիկ Շարմազանովի աշխատասենյակում:

Այս մասին Armtimes.com-ի հետ զրույցում ասաց Էրիկ Շարմազանովը՝ մեկնաբանելով մեր տեղեկությունները, որ Փելեշյանը ոչ թե փախուստի մեջ է եղել, այլ՝ Էրիկ Շարմազանովի աշխատասենյակում, եւ «բերման է ենթարկվել թանկարժեք մեքենայով».

«Կարող եմ ասել, որ ոստիկանության Տարոնի բաժնի աշխատակիցները նրան տեղափոխել են սովետական արտադրության մեքենայով: Բացարձակ ստեր են, ես առավոտյան Վանաձորում եմ եղել, իսկ իրեն բերման են ենթարկել Երեւանում, իր՝ բերման ենթարկվելուց հետո գնացել եմ Երեւան»,- ասաց Շարմազանովը:

Մեր հիշեցմանը, որ իրենից մեկնաբանություն խնդրելուց եւ ճշտելուց հետո, որ ինքն Փելեշյանի երեխաների կնքահայրն է, գրեթե մեկ ժամ չանցած Ոստիկանությունը հայտնաբերեց Փելեշյանին, արդյո՞ք այն տարօրինակ չէ, Էրիկ Շարմազանովն ասաց.

« Դեպքից անմիջապես հետո, մամուլում սկսեց շրջանառվել, որ Փելեշյանի երեխաները սանիկներս: Այսինքն՝ուզում եք ասել, որ մինչեւ ձեր զանգը մենք միջոցներ չե՞նք ձեռնարկել, ո՞նց է հնարավոր նման բան: Մենք աշխատավարձ ենք ստանում աշխատանք կատարելու համար՝ անկախ նրանից սանիկ է, սանիկ չէ, հորեղբայր, մորաքույր: Եթե կասկածվում է հանցագործություն կատարելու մեջ, մենք մեր պարտականությունները հստակ գիտենք ու կատարում ենք»:

Հիշեցնենք, որ Արկադի Փելեշյանը հոկտեմբերի 4-ին՝ երեկոյան 21:00-ի սահմանում, 10-15 անձանց հետ մուտք է գործել Ավետարանական եկեղեցի եւ ծեծի ենթարկել եկեղեցու առաջնորդ Ռաֆայել Գրիգորյանին՝ Վանաձորի ՏԻՄ ընտրություններում իր օգտին չքվեարկելու համար: Արկադի Փելեշյանը հոկտեմբերի 5-ի առավոտյան հայտնաբերվել է ոստիկանության կողմից, բերման ենթարկվել, ապա երեկոյան ազատ արձակվել՝ քաղաքից չբացակայելու ստորագրությամբ:

Մեր հարցին՝ նախաքննության համար արդյոք վտանգավոր չի՞ այն, որ Փելեշյանն ազատության մեջ է, այդ դեպքից հետո պետք չի՞ սպասել, որ վտանգ է ներկայացնում նաեւ այլ քաղաքացիների համար, քանի որ նախկինում եւս դատված է եղել, Էրիկ Շարմազանովն ասաց.

«Իմ կարծիքով, վտանգավոր չի, եթե վտանգավոր լիներ, բաց չէին թողնի, դա իմ անձնական կարծիքն է»:

Ինչ վերաբերում է նրան, որ երեկ նա եւ  իր եղբայրը՝ Էդուարդ Շարմազանովը, վստահեցնում էին՝ որեւէ կերպ չեն միջամտելու նախաքննությանը եւ ընտանեկան մտերմությունը չի ազդելու գործի վրա, Շարմազանովն ասաց.

«Ես ո՞նց կարող եմ միջամտել մեկ այլ մարմնի գործառույթների մեջ, ո՞նց եք պատկերացնում, նախաքննության մարմին կա, քրեական գործ է հարուցված: Քննիչը համապատասխան որոշում է կայացրել, այնպես չի, որ օրինակ կարող է գնալ Մոսկվա կամ այլ տեղ: Եթե նախաքննական մարմինը տեսնի, որ նա փորձում է խոչընդոտի, բնականաբար, խափանման միջոցը կփոխվի»,- ասաց Էրիկ Շարմազանովը:

ՀՀ Քննչական կոմիտեից փորձեցինք ճշտել՝ արդյո՞ք խափանման միջոցի փոփոխությունը կարող է որեւէ կերպ խոչընդոտել փորձաքննությունների կատարմանը: Քանի որ, մասնավորապես, լուրեր էին շրջանառվում, որ Փելեշյանը միջադեպի ժամանակ ոչ սթափ վիճակում է գտնվել՝ ընդ որում, ոչ միայն ալկոհոլի, այլեւ՝ թմրադեղերի: Քննչական կոմիտեի մամուլի քարտուղար Սոնա Տռուզյանը պատասխանեց, որ այս պահի դրությամբ չի կարող ասել, թե քրգործի շրջանակում որքան եւ ինչ փորձաքննություններ կնշանակվեն, սակայն.

«Կասկածյալի նկատմամբ խափանման միջոցի փոփոխությունը որեւէ կերպ չի կարող ազդել քրեական գործով էական նշանակություն ունեցող հանգամանքների պարզաբանման համար՝ նշանակված փորձաքննությունների կատարման վրա»:

Տռուզյանը վստահեցրեց, որ  փորձաքննությունների եզրակացությունները ստանալուց հետո դրանք կտրամադրվեն: