Ընդդիմությունն էլ է կոալիցիա ստեղծում բայց՝ ընդդեմ Ռոբերտ Քոչարյանի

Տպագրվել է «Հայկական Ժամանակ» օրաթերթի՝ 2004 թվականի հունվարի 13-ի համարում

Հայաստանյան ընդդիմությունը, հանուն իշխանափոխության, պարբերաբար միավորվելու փորձեր է անում: Ընդդիմության միավորման առաջին օրինակը 2000-ի հոկտեմբերին էր, երբ ՀԺԿ-ն, «Ազգային միաբանությունն» ու «Հանրապետություն» կուսակցությունը ստեղծեցին երեքի դաշինքը:

Սակայն  երեքի դաշինքը շուտով փլուզվեց: Այնուհետեւ, դրան հաջորդեց 13-ի միավորումը,  որը հետո դարձավ 14, դրանից հետո՝ 16, իսկ ամենավերջում՝ 9 կուսակցություն ստեղծեցին «Արդարություն» դաշինքը: Այս բոլոր կոմբինացիաներից իշխանափոխությանն ընդհուպ մոտեցավ 16-ի միավորումը՝ 2003-ի նախագահական ընտրությունների նախաշեմին: Սակայն, հայաստանյան ընդդիմությանն այդպես էլ չհաջողվեց հասարակական պահանջի եւ ժողովրդի աննախադեպ ակտիվության պայմաններում գնալ մինչեւ վերջ: Այսօր արդեն ընդդիմության լիդերները խոստովանում են, որ եթե իրենք կարողանան ոտքի հանել 2003-ի փետրվարին փողոց դուրս եկածների կեսի չափ ժողովուրդ, ապա այս անգամ հաստատ գնալու են մինչեւ վերջ:

Իսկ դրա համար, ըստ ընդդիմության լիդերների, անհրաժեշտ է հայաստանյան ողջ ընդդիմադիր դաշտի միավորում մեկ խնդրի՝ իշխանափոխության շուրջ: «Հանրապետություն» կուսակցության նախագահ Ալբերտ Բազեյանը երեկ մեզ տեղեկացրեց, որ «Արդարություն» դաշինքի մաս կազմող իրենց կուսակցությունը դաշինքին ողջ ընդդիմադիր դաշտի միավորման ծրագիր է ներկայացրել: «Մենք կարծում ենք, որ պետք է մի կողմ դնել ընդդիմադիր կուսակցությունների միջեւ նախորդ տարիներին եղած հակասություններն ու գաղափարական տարաձայնությունները եւ ողջ ընդդիմադիր դաշտով միավորվել մեկ խնդրի՝ երկրում սահմանադրական կարգի վերականգման շուրջ»,- ասում է Ալբերտ Բազեյանը:

Ի դեպ, վերջինս նաեւ տեղեկացրեց, որ իրենց կուսակցությունն արդեն իսկ սկսել է բանակցությունների շարք թե՛ խորհրդարանական, թե՛ խորհրդարանից դուրս գտնվող ընդդիմադիր ուժերի հետ: Թե կոնկրետ որ ուժերի հետ է արդեն բանակցել «Հանրապետությունը», պարոն Բազեյանը հարմար չգտավ այս պահին նշել: «Չնայած, իշխանությունները երեւի տեղյակ են այդ բանակցություններից, այդուհանդերձ, կարծում եմ, որ բանակցությունների ավարտից հետո ողջ ընդդիմադիր դաշտը հանդես կգա համապատասխան հռչակագրով եւ կստորագրի համագործակցության հուշագիր»,- ասում է «Հանրապետություն» կուսակցության նախագահը:

Իսկ ինչպե՞ս են վերաբերում «Հանրապետության» այս առաջարկին ընդդիմադիր մյուս կուսակցությունները: «ԱՄ» ներկայացուցիչ Հմայակ Հովհաննիսյանը պնդում է, որ ընդդիմադիր դաշտի միավորման առաջարկի հեղինակային իրավունքը պատկանում է իրեն: ««Ազգային միաբանության» կողմից ես արդեն բանակցություններ վարել եմ թե՛ ՀԺԿ լիդերի, թե՛ ընդդիմադիր այլ լիդերների հետ, եւ նման ճակատ ստեղծելու սկզբունքային համաձայնությունն արդեն ձեռք է բերված»,- ասում է «ԱՄ» խորհրդարանական խմբակցության ներկայացուցիչը:

Ճակատի առաքելությունը, ըստ Հմայակ Հովհաննիսյանի, պետք է լինի ժողովրդական ալիքի միջոցով խորհրդարանին պարտադրել, որպեսզի օրենսդիրն ընդունի «Հանրաքվեի մասին» օրենքում առաջարկվող փոփոխությունը, եւ մինչեւ ապրիլի 16-ը հանրաքվեի դրվի Ռոբերտ Քոչարյանի վստահության հարցը: Ի դեպ, Մարքսիստական կուսակցության նախագահ Դավիթ Հակոբյանը մեզ տեղեկացրեց, որ ինքը կոչով դիմելու է հայաստանյան ընդդիմադիր բոլոր ուժերին՝ միավորվելու պահանջով: «Այսօր ակնհայտ է, որ չկա ընդդիմադիր առանձին այնպիսի մի ուժ, որի ետեւից ժողովուրդը կգնա: Ժողովուրդը պետք է տեսնի ընդդիմության միասնական, համախմբված ուժերը: Այդ միավորման  քաղաքական սպեկտրը պետք է լինի շատ լայն՝ կոմկուսից մինչեւ ՀՀՇ: Սակայն, եթե մինչեւ փետրվարի 10-ն ընդդիմությանը չհաջողվի համախմբվել եւ միասնական քայլեր ծրագրել, ապա վստահության հանրաքվեի հարցը համարեք տապալված»,- ասում է երկրի գլխավոր մարքսիստը:

Այսպիսով, ընդդիմադիր մի շարք ուժեր արդեն իսկ հանդես են եկել հայաստանյան ընդդիմադիր դաշտը մեկ ճակատի եւ իշխանափոխության գերխնդրի շուրջ միավորելու ծրագրով: Ըստ ՀԺԿ-ական մեր մի զրուցակցի, կարեւոր չէ, թե ում է պատկանում նախաձեռնությունը, կարեւորը, որ ընդդիմության միավորումը նախորդ միավորումների տխուր պատմությունը չկրկնի: Ընդդիմադիր դաշտում հրաշալի հասկանում են, որ եթե իրենց չհաջողվի հասնել վստահության հանրաքվեի անցկացմանը, ապա  Քոչարյանին հրաժեշտ տալու սահմանադրական բոլոր ճանապարհները սպառվում են: Ուստի, այս եւ առաջիկա մեկ-երկու շաբաթը ՀԺԿ-ն, «Հանրապետությունը», «Ազգային միաբանությունը» եւ կոմկուսը մարզերում ու մայրաքաղաքում ծրագրել են հանրահավաքների շարք՝ ժողովրդին վերստին ակտիվացնելու եւ խորհրդարանում վստահության հանրաքվեի քննարկման ժամանակ համապատասխան կոնդիցիայի բերելու համար: 

Նաիրա Զոհրաբյան