Հացադուլը շարունակելու ենք այնքան ժամանակ, քանի դեռ կոնկրետ առաջարկ չլինի. Դավիթ Պետրոսյան

Այսօր առավոտյան «Հանուն գիտության զարգացման» նախաձեռնության երկու անդամներ վերսկսել են հացադուլը։ Սրա մասին հայտարարություն է տարածել նախաձեռնության համակարգող Դավիթ Պետրոսյանը՝ ֆեյսբուքյան ուղիղ եթերով։ Հացադուլն ընթանում է ԵՊՀ ֆիզիկայի ֆակուլտետի լսարաններից մեկում։ Համալսարանի անվտանգության աշխատակիցները լրագրողներին թույլ չեն տալիս մոտենալ այդ լսարանին:

Մեզ հետ հեռախոսազրույցում Դավիթ Պետրոսյանը ասաց, որ հացադուլը վերսկսել են, քանի որ իրենց առաջարկները մեկ ամիս է ուղղակի քննարկման փուլում են: Հարցին, թե ԱԺ փոխխոսնակ Էդուարդ Շարմազանովը հայտարարել էր օրինագծի 70 ենթաօրենսդրական կետերի քննարկման մասին, ինչ կետեր էին դրանք, Դավիթը պատասխանեց, որ դրանք մեծամասամբ վերաբերում էին «Ես եմ» ու «Պատիվ ունեմ» ծրագրերին:

Իսկ իրենց առաջարկները, որոնցից մեկը ծառայության ու կրթության համատեղումն էր, մեկ ամիս է ՝ անորոշ վիճակում են։ Դավիթը նշեց, որ իրենք հացադուլը շարունակելու են այնքան ժամանակ, քանի դեռ կոնկրետ պատասխան, հայտարարություն կամ առաջարկ չի եղել:

Իրենք հանդիպել ու քննարկումներ են ունեցել ԿԳ նախարարի, պաշտպանության նախարարի, վարչապետի հետ, քննարկումները որեւէ էական արդյունք չեն տվել, դրա համար վերսկսել են հացադուլը:

Հացադուլ հայտարարած մյուս ուսանողը՝ Յուրի Ավագյանը, ֆեյսբուքյան եթերում նկատեց, որ իրենցից հաճախ ակնկալում են առաջակներ՝ խնդրի լուծման ուղիների վերաբերյալ: Դրանք, սակայն, ըստ նրա, համապատասխան գերատեսչությունները պետք է գտնեն: «Մեր պահանջն այն է, որ լիազորված մարդիկ, կրթության եւ գիտության նախարարությունը, պաշտպանության նախարարությունը որոշեն գերակա ուղղությունները եւ ըստ այդմ՝ արժանի, մոտենցիալ ունեցող մարդկանց տրամադվի տարկետման իրավունք: Թե քանի հոգու պետք է տվի տարկետում, թե ինչ պետք է արվի, դա մենք չպետք է որոշենք: Դա երկու նախարաությունները պետք է քննարկեն, հայտարարեն իրենց որոշման մասին: Մենք էլ, տեսնելով իրենց կատարատած աշխատանքը, կհասկանանք՝ արժե՞ դադարեցնել հացադուլը, թե՞ ոչ»,- ասաց Յուրին:

Ակադեմիական տարկետման իրավունքի պահպանման համար պայքարող ուսանողները նաեւ հայտարարություն են տարածել.

«Հանուն գիտության զարգացման» նախաձեռնությունը, առաջնորդվելով հնարավորինս կառուցողական դիրքորոշմամբ եւ շուրջ 1 ամիս ակտիվ քննարկումների մեջ գտնվելով ՀՀ պաշտպանության եւ կրթության ու գիտության նախարարությունների հետ, արձանագրում է, որ՝

1․ Հազարավոր ուսանողների դասադուլից ու 5 տղաների հացադուլից հետո մեր նախաձեռնությունը գնաց հստակ առաջարկների ներկայացման եւ համապատասխան գերատեսչությունների հետ հանդիպում-քննարկումների ճանապարհով,

2․ Քննարկումների հիմք դարձած մեր առաջարկները ենթադրում էին թե՛ կոռուպցիոն ռիսկերից տարկետման իրավունքի ինստիտուտի ձերբազատում, թե՛ շնորհալի երիտասարդների գիտակրթական գործունեության շարունակականություն՝ համատեղված զինծառայության անցնելու սահմանադրական պարտավորության հետ,

3․ Այնուամենայնիվ, քննարկումների ժամանակ գիտակրթական ոլորտի վրա հայտնի օրենքի բացասական ազդեցությունը մեղմելուն միտված որեւիցե առարկայական լուծման հնարավոր չեղավ հասնել։ Համապատասխան նախարարությունների հետ մեր աշխատանքի ընթացքը հնարավորինս լուսաբանելու եւ շոշափելի արդյունքի բացակայությունը պարզաբանելու նպատակով տեղեկացնում ենք, որ Պաշտպանության նախարարությունը՝

ա․ Հավատարիմ մնալով իր դիրքորոշմանը՝ չի ընդունում գիտության ոլորտի վրա օրենքի ունեցած ծանր ազդեցության շուրջ մտահոգությունները եւ տարկետման իրավունքի կարեւորությունը գիտության ճանապարհն ընտրած երիտասարդների համար,

բ․ Ռազմարդյունաբերական համալիրի շրջանակներում պատրաստ է օգտագործելու միայն բնագիտական ոլորտի ուսանողների հմտությունները՝ հումանիտար գիտությունների դեպքում անտեսելով կրթության շարունակականության խնդիրը,

գ․ Օրենքի 22-րդ հոդվածի 5-րդ կետը, որը նախատեսում է կառավարության որոշմամբ տարկետման իրավունքի տրամադրման հնարավորություն, կիրառելի է համարում միայն այն գիտությունների դեպքում, որոնք գերակա են ռազմարդյունաբերական համալիրի տեսանկյունից, եւ միայն այն երիտասարդների համար, որոնք կդիտարկվեն հանճարեղ կամ բացառիկ։ Կառուցողական դիրքորոշում ցուցաբերելուց եւ գոնե փոխադարձաբար ընդունելի որեւէ արդյունքի չհասնելուց հետո «Հանուն գիտության զարգացման» նախաձեռնությանը այլ բանի չի մնում, քան ավարտված համարել իշխանությունների հետ քննարկումները եւ պայքարը շարունակել այն կետից, որտեղ դադար էր առել։

«Հանուն գիտության զարգացման» նախաձեռնությունը պահանջում է պահպանել տարկետման իրավունքը եւ ընդամենը վերացանել այդ իրավունքի տրամադրման ճանապարհին առկա կոռուպցիոն երեւույթները: «Զինապարտության մասին» նոր օրեքնով նախատեսվում է, որ տարկետման իրավունքից այսուհետ կարող են օգտվել միայն այն երիտասարդները, որոնք կցանկանան մասնակցել «Պատիվ ունեմ» ծրագրին: Այս դեպքում էլ նրանց տարկետման իրավունք կտրամադրվի միայն բակալավրիական համակարգում սովորելու ընթացքում: Օրենքը մի շարք բացառություններ նույնպես նախատեսում է, օրինակ՝ մարզիկների համար: