Բացառված է, որ առաջիկա հինգ տարիներին էներգետիկ դեֆիցիտի պատճառով որեւէ ոլորտ չզարգանա. Փաշինյան

«Պարոն Փաշինյան, բոլորս գիտենք, եւ այդ մասին նշում են նաեւ բոլոր փորձագետները, որ տնտեսության զարգացման համար կարեւորագույն գործոնը ներդրումների ներգրավումն է: Դուք տեղյակ եք, որ ԱՄՆ նախկին դեսպանը հնչեցրեց, որ ԱՄՆ կառավարությունը պատրաստ է 8 մլրդ դոլարի ներդրումներ իրացնել մեր երկրի էներգահամակարգում: Վստահ եմ, որ փորձագիտական կոնկրետ հաշվարկներ կան, որ մեր երկիրն ունի նման ռեսուրսներ, այն է՝ քամու էներգիայով, արեւային էներգիայով շահագործելու նոր հզորություններ, այլապես ԱՄՆ դեսպանը չէր հնչեցնի այդ թիվը: Հիմա, մենք հաճախ խոսում ենք ներդրումների մասին, տնտեսության զարգացման մասին, բայց կատարվելիք քայլերը չենք մատնանշում: Այսինքն՝ Դուք, որպես կառավարության ղեկավար, գտնո՞ւմ եք, որ բավարար ջանքեր գործադրվում են, որպեսզի այդ ներդրումները ներգրավենք մեր տնտեսության մեջ, այն է՝ գույքագրվեն ՀՀ ողջ էներգետիկ ռեսուրսները, նախահաշիվ կազմվի, կոնկրետ մատնանշվի, թե քամու, արեւային էներգիաների մեջ ինչքան գումարներ պետք է ներդրվեն, որի արդյունքում կարող ենք այլեւս կոնկրետ խոսակցություն տանել ԱՄՆ կառավարության հետ, ինչու չէ նաեւ այլ ներդրողների հետ: Եւ այս էներգետիկ ռեսուրսները համար մեկ խթանիչն են մեր տնտեսության թռիչքաձեւ զարգացման համար»: Վարչապետի պաշտոնակատար Նիկոլ Փաշինյանին վարչապետի ընտրության համար հրավիրված ԱԺ հատուկ նիստի ժամանակ նման հարց տվեց «Ծառուկյան» խմբակցության պատգամավոր Սերգեյ Բագրատյանը:

Նիկոլ Փաշինյանը պատասխանեց.

«Մենք շատ ուշադիր ենք Ձեր նշած հարցերի վերաբերյալ: Եւ հատկապես էներգետիկայի ոլորտում, բոլոր ոլորտներում կարծում ենք՝ պետք է առաջ գնալ համոզված քայլերով, որովհետեւ եթե մի ուղղությամբ սկսեցինք ճանապարհը եւ պարզվեց՝ սխալ ուղղությամբ ենք գնացել, պետք է հետ գանք, դա լուրջ վնասներ կբերի մեր երկրին: Իսկ էներգետիկ ոլորտում ունենք հարցեր, որոնց պետք է պատասխանենք: Հարց համար առաջին. միջուկային էներգետիկայի հետագա զարգացումը մեր երկրում, երկրորդ՝ Իրանի հետ էներգետիկ ոլորտում մեր համագործակցության հեռանկարները, երրորդ՝ Վրաստանի հետ էներգետիկ ոլորտում մեր համագործակցության հեռանկարները, չորրորդ՝ մեր երկրում տեխնոլոգիական ներդրումների իրական ծավալները: Որովհետեւ շատ կարեւոր է գնահատել մեր էներգիայի պոտենցիալ պահանջարկը մեր երկրում: Որովհետեւ եթե մենք պիտի հենվենք մինչ այժմ եղած հաշվարկների վրա, դա ինձ համար բավարար չէ: Որովհետեւ իմ կարծիքով այդ հաշվարկներն արվել են արդեն իմ ասած տնտեսության կառուցվածքի նախկին տրամաբանության մեջ, նոր տրամաբանության մեջ մեզ պետք է նոր մոտեցում, նոր հաշվարկ՝ հաշվի առնելով նաեւ մեր երկրի արտաքին քաղաքական ռազմավարությունը, եւ այս առումով էներգետիկան լրջագույն ոլորտ է, որը պետք է կարողանա ապահովել ոչ միայն մեր տնտեսության բնականոն զարգացումը, այլեւ որոշակի սպասարկող լինի մեր արտաքին քաղաքականության եւ արտաքին տնտեսական կապերի:

Այդ առումով մենք ուշադիր հետեւում ենք եւ աշխատում ենք այս ոլորտում առաջ գնալ ճշգրիտ քայլերով, եւ այո, համաձայն եմ, որ Հայաստանում նաեւ վերականգնվող էլեկտրաէներգիայի եւ այլընտրանքային էներգետիկայի զարգացման մեծ հեռանկար կա: Այդ պրոցեսն, ըստ էության, մեր կառավարությունից առաջ սկսել էր, եւ ես հույս ունեմ, համոզված եմ, որ այն առաջիկայում նոր թափով կզարգանա»:

Բագրատյանն առաջարկեց քայլ առաջ ընկնել, որովհետեւ սա շատ կարեւոր ոլորտ է.

«Կարծում եմ՝ պետք է զուգահեռ կատարեք այս աշխատանքները, հրավիրենք աշխարհի լավագույն մասնագետների, որովհետեւ վստահ եմ, որ բոլոր ճյուղերի զարգացումը պայմանավորված է էներգիայի արտադրությամբ: Էներգետիկ անկախություն ունեցող երկիրը լուրջ արժեք է միջազգային համագործակցության համար»,-ասաց Բագրատյանը, ինչին վարչապետն արձագանքեց.

«Բացառված է, որ առաջիկա հինգ տարիներին էներգետիկ դեֆիցիտի պատճառով որեւէ ոլորտ չզարգանա: Էդպիսի իրավիճակ մենք չենք ունենալու հաստատ: Ուրիշ խնդիր է հաջորդ տասնամյակի պլանավորումը, որով մենք իհարկե զբաղվում ենք: Երկու շատ կարեւոր նախագիծ կա՝ Իրան-Հայաստան եւ Հայաստան-Վրաստան բարձրավոլտ գծերի նախագծերի իրականացումը: Իրան-Հայաստան բարձրավոլտ գծի շինարարությունը մեծ թափ է ստացել հիմա, եւ շատ կարեւոր է, որ մեր պայմանագրային պարտավորությունները պատրաստվում ենք փոխադարձաբար կատարել»: