Ռեյտինգային ցուցակներն են հիմնականում դժվարացնում ցանկի կազմումը. Արմեն Ռուստամյան

ՀՅԴ ցուցակն ամբողջությամբ վաղը կհրապարակվի: Խորհրդարանում լրագրողների հետ զրույցում ասաց ԱԺ ՀՅԴ խմբակցության ղեկավար Արմեն Ռուստամյանը:

«Ռեյտինգային ցուցակներն են հիմնականում դժվարացնում ցանկի կազմումը, որովհետեւ որոշման իրավունքը պատկանում է եւ նախապատվությունը տրվում է տեղերում մեր մարմիններին եւ իրենք են կողմնորոշվելու, թե ում պետք է առաջադրեն։ Կարծում եմ՝ արդեն վաղն ամբողջական կլինի ու լիարժեք կիմանաք»,- ասաց Ռուստամյանը։

Նա հերքեց շրջանառվող այն լուրերը, թե ցուցակում առաջին տեղի համար պայքար է գնում իր եւ ՀՅԴ Բյուրոյի ներկայացուցիչ Հրանտ Մարգարյանի միջեւ:

«Երբեք մեր մեջ պայքար չի եղել։ Գիտեք` մեր կուսակցությունը շատ լուրջ ծանր ու թեթեւ է անում ամեն ինչ, բայց որոշումը կայացվում է համախոհությամբ եւ ցանկը կլինի համախոհությամբ»,- ասաց նա եւ հավելեց, որ քննարկումները կատարվում են այնպես, որ ցանկն ամբողջ կառույցի համար ընդունելի լինի։

Անդրադառնալով ՀՀԿ այն պնդմանը, որ միակ ընդդիմությունն են լինելու, Ռուստամյանն ասաց, որ ընտրությունների ընթացքում ասելը` ով է ընդդիմադիր, ով՝ ոչ, ճիշտ չէ, քանի որ ընդդիմությունը կարող է ձեւավորվել միայն իշխանության ձեւավորումից հետո:

«Երեւի ելնում են նրանից, որ ըստ էության հայտնի է, որ Նիկոլ Փաշինյանի գլխավորած ուժն այսօր ֆավորիտն է եւ, ամենայն հավանականությամբ, կարող է ունենալ մեծամասնություն»,- նկատեց Ռուստամյանը եւ հավելեց, որ իրենք էլ են դուրս եկել իշխանությունից եւ այդ տեսանկյունից ընկալվում են ընդդիմություն:

Ռուստամյանն ընդգծեց, որ ՀՅԴ-ն իր քաղաքական ուղուց երբեք չի շեղվել եւ ունի իր ընտրազանգվածը: «Դաշնակցությունը ինչ խնդիրներ դրել է՝ նվազագույնով հասել է առավելագույնի»,- ասաց նա։

Հարցին՝ մտավախություն չունի՞, որ այլ քաղաքական ուժերը կարող են իրենց ընտրազանգվածը տանել՝ հաշվի առնելով, որ նրանց մտածելակերպը մոտ է Դաշնակցությանը, ինչպես օրինակ «Սասնա ծռերը», Ռուստամյանն ասաց.

«Խորքում բացի գենետիկ հակադաշնակցականներից, բոլորը մոտ են դաշնակցության գաղափարներին։ Այսպիսի բան չկա, որ ազգը, պետությունն իր երազած երկիրը պատկերացնեն ու չգան ազատ անկախ Հայաստանի գաղափարին։ Ի վերջո, մենք հանրապետություն ենք ստեղծել զրոյից ու հիմք ունենք երրորդ հանրապետությունը, կարծում եմ ՝ արդեն չորրորդի մեջ ենք։ Այս ամենը հետեւանքն է Դաշնակցության գործունեության եւ ազգային ուժերի նվիրվածության ու համախմբման։ Այս առումով բնական է՝ մենք այս դաշտում պետք է ունենանք համակիրներ»։

Ռուստամյանը նկատեց, որ յուրաքանչյուրն ինքը կընտրի` ում ձայն տալ, բայց Դաշնակցությունը մի բանով տարբերվում է մնացածից՝ այն կայացած եւ համահայկական բնույթ ունեցող կուսակցություն է։ Ռուստամյանը կարծում է, որ Դաշնակցության կարիքը ժողովուրդը միշտ ունի, որ առնվազն զերծ պահի երկրին ինչ-որ անորոշ ապագայից, ցնցումներից:

«Այսօր ապագայի հանդեպ անորոշությունը շատ մեծ է, եւ ազգային արժեքների պահպանման հարցում Դաշնակցության դերակատարությունը մեծ է: Ես ասել եմ`Դաշնակցության գոյությունը պայմանավորված չի լինելու այս ընտրությունների արդյունքներով: Դաշնակցությունն անկախ ամեն ինչից եղել է, կա ու լինելու է, քանի այս ազգային խնդիրները չեն լուծվել: Մյուս կուսակցությունները պետք է մտածեն, որ եթե հանկարծ իշխանությունը կորցնեն՝ այլեւս կպահպանվե՞ն, թե՞ ոչ, ընտրություններում ձախողվեն, այլեւս կմա՞ն, թե՞ ոչ: Դաշնակցությունն այդպիսի խնդիր չունի»,- շեշտեց նա:

Ռուստամյանն ասաց՝ մարդիկ կան, որ դեռ ազդված են 70 տարիների հակադաշնակցական քարոզչությունից: «Դաշնակցությունը ներկայացվել է որպես դավաճան, որպես հողեր տվող եւ այլն: Ինչ ասես՝ ասել են: Այնպիսի մի հատ մթնոլորտ են ձեւավորել դաշնակցության շուրջ, որ մարդկանց հետ խոսում ես ու զարմանում, որ մարդիկ այդ ազդեցության տակ են դեռ: Ֆիլմերը նայեք նկարած, ինչեր են ցույց տալիս»,- հայտարարեց նա:

Հարցին` այդ անվստահության ստեղծմանը ՀՅԴ-ն իր քայլերով չի՞ նպաստել, նա պատասխանեց. «Ցանկացած կուսակցություն թեկուզ 128 օր լինի, տեսեք, թե քանի սխալներ թույլ կտա: Բա 128 տարի դաշնակցությունը գործել է: Իհարկե, եղել են նաեւ սխալներ»,- ասաց նա: Ռուստամյանը նշեց, որ հիմնական սխալներից մեկը եղել է այն, որ ՀՅԴ-ն կոալիցիա է կազմել, որտեղ վճռորոշ ձայն չի ունեցել:

«Չէր կարելի կոալիցիա կազմել, որտեղ կարող են առանց քեզ որոշումներ կայացվեն: Դրա պատճառով մենք չենք կարողացել լիարժեք լուծել մեր առջեւ դրված խնդիրները, հիմա այդպիսի բան չի կրկնվի: Վերջինը մի քիչ մեջը տրամաբանություն ուներ: 3/5-ի պահանջ կար, առանց մեզ չէին կարողանում ձեւավորել այդ 3/5-ը: Երբ սահմանադրական օրենքներ պետք է փոխվեին, այդ ժամանակ առանց ՀՅԴ չէին կարողանում, այդտեղ դերակատարություն կար, բայց մնացած հարցերում դերակատարությունը եղել է ՀՀԿ-ինը, մեր դերը վճռորոշ չի եղել»,- ասաց նա եւ հավելեց, որ եթե իրենք չեն ունենալու մեր վճռական ձայնի իրավունքը եւ առանց իրենց կարող են որոշումներ կայացվել այդպիսի դաշինքների, միությունների մեջ չեն մտնելու:

Տպել
847 դիտում

Մխիթարյանը գոլ է խփում «Ռոմայում» նորամուտի խաղում (տեսանյութ)

Սլավիկ Գալստյանը դարձավ ըմբշամարտի աշխարհի առաջնության բրոնզե մեդալակիր

Հենրիխ Մխիթարյանը «Ռոմա»-ի մեկնարկային կազմում է

Վանաձորում 32-ամյա տղամադրու վրա կրակոցներ արձակած, նրան վիրավորած կասկածյալը հայտնաբերվել է

ՀՀ զբոսաշրջության կոմիտեն հորդորում է խուսափել մոտ օրերս դեպի Արագած վերելքներ իրականացնելուց

Արթուր Ալեքսանյանն ապահովեց Տոկիո-2020-ի ուղեգիրը. ըմբշամարտի աշխարհի առաջնություն

Շուշիում մկրտվել են Ապրիլյան պատերազմում զոհված հերոսների հարազատները

Նիկոլ Փաշինյանը ցավակցական հեռագիր է հղել Մեծի Տանն Կիլիկիո Կաթողիկոս Արամ Ա-ին՝ մոր մահվան կապակցությամբ

Մեկնարկեց մարդու իրավունքների երկրորդ փառատոնը․ միջոցառումներ կանցկացվեն նաև Վանաձորում․ լուսանկարներ

Վրաերթ Կոտայքի մարզում. տուժածը հիվանդանոցում մահացել է

Զինված հարձակում՝ Կյոկուշին ֆեդերացիայի նախագահի նկատմամբ. Արման Բաբաջանյանն ահազանգում է

Երևանում տեղադրվել են պլաստիկ շշերի համար նախատեսված 4 սորտավորման ամաններ

Երևանի Արցախի պողոտայի տներից մեկում հրդեհ է բռնկվել, տուժածներ չկան

ԱՀ պետնախարարը հանդիպել է «Հայոց պետականության անցյալը, ներկան ու ապագան» միջազգային գիտաժողովի մասնակիցներին

1 մլն արժողությամբ 1,5 մետրանոց հեռուստացույցը կարող է ազդեցություն ունենալ. որ դեպքերում են զրկվում նպաստից

Հայաստան է ժամանել Քուվեյթի շեյխուհի Հուսա Սաբահ Ալ-Սալեմ Ալ-Սաբահը

Արցախի հիվանդանոցը կդառնա համալսարանական հիվանդանոց

Ապօրինի ծառահատում և զենք-զինամթերքի հայտնաբերում․ Իջևանի ոստիկանների բացահայտումը

Երևանում տեղի ունեցած խոշոր վթարից տուժած 2 երեխաները ստացել են առաջին բուժօգնություն եւ տուն են գնացել

30-ն անց աղջիկներին տանջող հարցերից է՝ «Տանը մնացի՞». Թամարա Պետրոսյանը նոր մոնո ներկայացմամբ հանդես կա