Գործարարը պնդում է՝ պատգամավոր Հակոբ Հակոբյանը տարիներ առաջ հանցավոր խմբի հետ ունեզրկել է իրեն. պատգամավորը հերքում է

«Աշտարակ ձու» սահմանափակ պատասխանատվությամբ ընկերության նախկին սեփականատեր, գործարար Ռուբեն Ստեփանյանը պնդում է՝ ներկա ԱԺ պատգամավոր Հակոբ Հակոբյանը՝ (Կիլիկիա գարեջրի գործարանի սեփականատեր), տարիներ առաջ մի խումբ անձանց հետ հանցավոր համաձայնությամբ իրեն ունեզրկել է: Ստեփանյանն այս խնդրի մասին որոշել է բարձրաձայնել թավշյա հեղափոխությունից հետո, դիմել է անգամ վարչապետ Նիկոլ Փաշինյանին:

Ռուբեն Ստեփանյանը «Հայկական ժամանակ»-ին պատմեց, որ ինքը նախկինում հանդիսացել է «Աշտարակ ձու» ՍՊԸ-ի սեփականատեր, ապա համատեղ ձեռնարկատիրական գործունեություն ծավալելու գործարք է իրականացրել Արման Հովհաննիսյանի եւ Նորայր Օգանեսյանի հետ՝  յուրաքանչյուրը 2 մլն-ական ԱՄՆ դոլար ներդրում անելու պայմանով: Ռուբեն Ստեփանյանից հետո ընկերությունում տարբեր ժամկետներով տնօրեն են նշանակվել ու ազատվել մյուս բաժնետերերը: Ստեփանյանի պնդմամբ՝ վերջիններիս տնօրինության ընթացքում տեղի է ունեցել ձվարտադրության ոչ փաստացի, այլ փաստաթղթային պակասեցում, որը Նորայր Օգանեսյանին ու մյուսներին հնարավորություն է տվել թաքցնել ընկերության շահույթը եւ յուրացնել այն՝ դրանով վնաս պատճառելով Ռուբեն Ստեփանյանին ու պետությանը՝ կեղծ տվյալներ ներկայացնելով հարկային մարմիններին:

Գործարարը մեր զրույցում պատմեց, որ իր բաժնեմասի տասը տոկոսը ընկերության մյուս բաժնետերերին վաճառելուց հետո վարկի միջոցով գնել է թռչնաբուծական ֆերմա, իսկ այդ ընթացքում ձեռնարկատիրական եւ մտերիմ հարաբերություններ է հաստատել ՀՀ ԱԺ պատգամավոր Հակոբ Հակոբյանի հետ, որը թռչնամսի արտադրության ոլորտում եւս ունի բիզնեսներ:

Ստեփանյանը մեր զրույցում ասաց, որ Հակոբ Հակոբյանի հետ գործարքներ իրականացնելիս իր բիզնեսում որոշակի խնդիրներ են ծագել եւ ինքը դժվարացել է վճարել բանկերի վարկերի սպասարկումը: Ուշացումներից խուսափելու համար Ստեփանյանը Հակոբ Հակոբյանի հետ պայմանավորվածությամբ 2013 թվականից մինչ 2015-ը վերջինիս կողմից մատակարարված կերի գումարների մի մասն ուղղել է իր վարկերի մարմանը՝ փոխադարձ հաշվարկով Հակոբյանին պարտք մնալով 236 հազար 164 ԱՄՆ դոլար, որը Ստեփանյանը պետք է վերադարձներ ավելի ուշ:

Այսպիսով, Հակոբյանին պարտք մնացած գումարն ու վարկերը վճարելու համար Ռուբեն Սեփանյանը որոշել է վաճառել «Աշտարակ ձու» ընկերությունում ունեցած իր մնացյալ 25 տոկոս բաժնեմասը: Այդ նպատակով վերջինս հանդիպել է մյուս բաժնետերերին՝ նրանց առաջարկելով իր բաժնետոմսերը գնել 1.200.000 ԱՄՆ դոլարով: Ռուբեն Ստեփանյանի պնդմամբ՝ Օգանեսյանն ու Հովհաննիսյանը տարբեր պատճառներով ձգձգել են գործընթացը, որպեսզի հնարավորինս ցածր գնով գնեն բաժնետոմսերը: Ստեփանյանն առաջարկել է կամ գնել դրանք, կամ ինքը ընկերությունում աուդիտ անցկացնելու պահանջ է դնելու: Ընկերությունն աուդիտ չի իրականացրել, եւ Ստեփանյանը դիմել է Արագածոտնի մարզի ընդհանուր իրավասության դատարան՝ ընկերության շահույթը չբաշխելու մասին որոշումն անվավեր ճանաչելու, ընկերության գործունեությունից առաջացած եւ չբաշխված շահույթն իր 25 տոկոս բաժնեմասով իրեն բաշխելու պահանջով:

Հայցն ընդունվել է վարույթ, բավարարվել է հայցի ապահովում կիրառելու Ստեփանյանի միջնորդությունը եւ որպես հայցի ապահովում՝ արգելանք է դրվել «Աշտարակ ձու» ՍՊԸ-ի եւ Նորայր Օգանեսյանին պատկանող գույքի, ընկերության բաժնեմասերի  եւ դրամական միջոցների վրա՝ մինչեւ քննության ավարտը: ՀՀ ԱՆ ԴԱՀԿ ծառայության համապատասխան ստորաբաժանումը եւս արգելանք է դրել միջոցների վրա:

Պատասխանող Նորայր Օգանեսյանը, ինչպես պնդում է Ռուբեն Ստեփանյանը, այդ ընթացքում անդրկուլիսյան համաձայնության են եկել Հակոբ Հակոբյանի հետ, որի մարդիկ այդ ընթացքում առեւանգել են իր եղբոր որդուն՝ Արտուշ Ստեփանյանին, եւ նրան սպանելու սպառնալիքով իրեն հրավիրել հանդիպման:

Ռուբեն Ստեփանյանն ասաց, որ հանդիպման ժամանակ ստիպողաբար ստորագրել է փաստաթուղթ, ըստ որի ինքն իր բաժնեմասը զիջում է Հակոբյանին՝ պարտքի դիմաց, որից հետո Հակոբյանն այդ բաժնեմասը կվաճառի 1.000.000 դոլարով մյուս սեփականատերերին, այդ գումարից կվերցնի իր պարտքը, մնացածը կվերադարձնի Ռուբեն Ստեփանյանին: Ստեփանյանը մեր զրույցում նշեց, որ ինքն այդ փաստաթուղթը ստորագրել է՝ վստահ իմանալով, որ ընկերության բաժնետոմսերը եւ միջոցներն այնուամենայնիվ կալանքի տակ են, եւ հանցավոր խմբի անդամները որեւէ բան չեն կարող անել:

Այսպիսով, Ռուբեն Ստեփանյանի, Հակոբ Հակոբյանի, նրա որդի Տիգրան Հակոբյանի եւ եղբոր որդի Վարդան Աշոտի Հակոբյանի միջեւ կնքվել է պայմանագիր, որ Ստեփանյանը Հակոբ Հակոբյանին պարտք է 1 մլն դոլար: Այնուհետեւ, Ռուբեն Ստեփանյանի պնդմամբ, Հակոբ Հակոբյանը ու  Նորայր Օգանեսյանը ՀՀ ԱՆ ԴԱՀԿ ծառայության եւ ՀՀ պետական ռեգիստրի գործակալության վերադաս պաշտոնատար անձնաց հետ անօրինական գործարք են կատարել՝ անտեսելով հանգամանքը, որ «Աշտարակ ձու» ՍՊԸ-ի բոլոր բաժնեմասերի վրա կալանք է դրված, փաստաթղթեր են կեղծել, իբրեւ Ստեփանյանն իր բաժնեմասը տվել է Հակոբյանին, վերջինս այն վաճառել է ընկերության մյուս բաժնետերերին, եւ այլն: Ստեփանյանի խոսքով՝ «հանցավոր խումբը» կաշառքի ու անօրինական գործողությունների միջոցով արգելանքի տակ գտնվող բաժնեմասի նկատմամբ գործարք է կատարել, ընկերության մասնակիցների փոփոխություն կատարել իրավաբանական անձանց պետռեգիստրում:

Ըստ վերեւում նշված կեղծ փաստաթղթերի՝ Հակոբ Հակոբյանի որդին եւ եղբոր որդին արդեն հանդիսանում էին «Աշտարակ ձու» ընկերության բաժնետեր, իսկ Ռուբեն Ստեփանյանը՝ իր ու Հակոբ Հակոբյանի միջեւ կնքված պայմանագրի համաձայն՝ ոչ: Հետեւաբար՝ դատարանում վերոնշյալ քաղաքացիական գործով Ռուբեն Ստեփանյանի փոխարեն որպես երրորդ անձ ներգրավվում են Հակոբ Հակոբյանի որդին ու եղբոր որդին, եւ դատարանին դիմում են ներկայացնում, որ պատասխանողներ «Աշտարակ ձու» ընկերության եւ Նորայր Օգանեսյանի նկատմամբ որեւէ պահանջ չունեն:

Այսինքն, ինչպես մեկնաբանում է Ռուբեն Ստեփանյանը, Հակոբ Հակոբյանն օգնել է ընկերության մյուս բաժնետերերին՝ էժան գնով գնել Ստեփանյանի բաժնետոմսերը, ապա իր պարտքը վերցնելուց հետո մնացյալ գումարը չի էլ վերադարձրել Ստեփանյանին, որն այլեւս չէր հանդիսանում այդ ՍՊԸ-ի բաժնետեր: Իսկ դատարանը, առանց հաշվի առնելու, որ ընկերության բաժնեմասերի ու միջոցների վրա կալանք է դրված, եւ դրանց հետ կապված որեւէ փոփոխություն չի կարող լինել, գործը փակել է:

Այսպիսով՝ գործարար Ռուբեն Ստեփանյանը հրավիրում է իրավապահների ուշադրությունն ու պնդում՝ ԱԺ պատգամավոր Հակոբ Հակոբյանը ճնշումների ներքո ու խաբեությամբ Ստեփանյանի բաժնեմասը վաճառել է «Աշտարակ ձու» ընկերության մյուս բաժնետերերին, ունեզրկել է իրեն, զրկել է օրինական շահույթ ստանալու իրավունքից, հանցավոր խմբի անդամների հետ պետությունից թաքցրել թալանված ու չմուծված հարկեր՝ առնվազն երեք միլիարդ ՀՀ դրամի չափով:

Պատգամավոր Հակոբ Հակոբյանը, սակայն, «Հայկական ժամանակ»-ի հետ զրույցում հերքեց այս տեղեկությունները: Նա ասաց, որ ինքն ընդհանրապես կապ չունի այդ դատական գործի հետ.

«Դա իրականությանը չի համապատասխանում, ես էդ տղային՝ Ռուբենին, շատ-շատ եմ օգնել: Ես մի քանի անգամ Ռուբեն Ստեփանյանին ասել եմ՝ չի կարելի, տղա ջան, մարդիկ (նկատի ունի մյուս բաժնետերերին,-հեղ.) դուրսն աշխատել են, բերել են ներդրումներ են արել քո ընկերությունում, ձեր ջուրը մի առվով չի հասել, դատի մի տուր էդ մարդկանց: Կարող եք տեսնել՝ ով է մասնակցել դատերին, ով՝ չէ: Ռուբենն ինձ չլսեց, դատի տվեց, եւ դատն ի օգուտ մյուս բաժնետերերի եղավ: Ես մի քանի անգամ օգնել եմ Ռուբենին, բայց որ էդպիսի բաներ էր անում, էլ չօգնեցի, դրա համար էլ նման բաներ է ասում»,-ասաց Հակոբ Հակոբյանը: Իսկ Ստեփանյանի եղբոր որդու առեւանգման մասով քննություն է ընթանում, որի վերաբերյալ Հակոբյանը որեւէ բան չասաց:

Տպել
3191 դիտում

2 իրանցիները Երեւանի խանութներից մեկից գողացել էին 120 հազար դրամ

Միլիարդների չարաշահումներ ու նոր բացահայտումներ «Հյուսիս-Հարավ»-ի գործով. ինչ կապ ունի «Մուլտի Գրուպ»-ը. պաշտոնական

«Հյուսիս-Հարավ»-ի գործով մեղադրանք է առաջադրվել «Մուլտի Գրուպ» կոնցեռնի տնօրենին

Աննա Հակոբյանը մեկնում է Յարոսլավլ

Ադրբեջանը չունի ճանաչված սահմաններ, բացի ռուս-ադրբեջանական հատվածից. Արցախի ԱԳՆ-ի պատասխանը

Վանաձորում թալանել են «Վանաձոր» բ/կ-ի բժիշկ-վնասվածքաբանի տունը՝ պատճառելով 1,5 մլն դրամի վնաս

Աշխարհի առաջնություն. բռնցքամարտիկ Հովհաննես Բաչկովը կիսաեզրափակչում է

Նիկոլ Փաշինյանը և Աննա Հակոբյանը ներկա են գտնվել Մայր Աթոռ Սուրբ Էջմիածնի հիմնանորոգված Վեհարանի բացմանը

Հայաստանի ԱԳ նախարար Զոհրաբ Մնացականյանը հանդիպել է Լատվիայի ԱԳ նախարար Էդգարս Ռինկևիչսին

Հրդեհ Երասխ գյուղում. այրվել է 720 հակ անասնակեր

Ուկրաինայում զինված տղամարդը սպառնացել է պայթեցնել Կիեւի «Մետրո» կամուրջը. նրան ձերբակալել են

Բնակարաններից մեկից գողացել էր դրամապանակ ու օծանելիք. ոստիկանության բացահայտումը (տեսանյութ)

Վանեցյանի և Օսիպյանի գործունեությունը վարչապետին չի գոհացրել. Էդուարդ Աղաջանյան

Հրդեհ Հայթաղ գյուղում. այրվել են 2 տների տանիքներ

ԲԴԽ նախագահը ներկայացրեց Երեւանի ընդհանուր իրավասության դատարանի նորանշանակ նախագահին

Կձևավորվի ռիսկի վրա հիմնված տեսչական վերահսկողության լիարժեք համակարգ. ՍԱՏՄ

Կառավարությունում քննարկվել են Հրանտ Մաթևոսյանի մշակութային կենտրոն-թանգարանին վերաբերող հարցեր

ՔՊ-ն նիստ է հրավիրել. օրակարգում ուժային կառույցների ղեկավարների հրաժարականներն են

Անի խոշորացված համայնքի ղեկավար Արտակ Գեւորգյանին եւ եւս 2 աշխատակցի մեղադրանք է առաջադրվել

Տեղի է ունեցել Հայաստանի խաղողագործության և գինեգործության հիմնադրամի հոգաբարձուների խորհրդի նիստը