Մեծամասնության ստորագրության դեպքում Զարթոնքի համայնքապետը պատրաստ է հրաժարական տալ. մարզպետ

Արմավիրի մարզի Զարթոնք համայնքի բնակիչները արդեն մի քանի օր է՝ բողոքի ակցիաներ են անցկացնում: Նրանք պահանջում են համայնքապետ Պարույր Սարգսյանի հրաժարականը: Գյուղացիների խոսքով՝ Սարգսյանը տարիներ շարունակ յուրացումներ եւ չարաշահումներ է իրականացրել: Զարթոնքցիները դիմել են նաեւ ՀՀ կառավարությանը՝ հարցի լուծման հնարավոր տարբերակների համար, եւ եթե հարցի լուծման ընթացքը երկարաձգվի, կփակեն կենտրոնական երկաթգիծը եւ գյուղապետարան տանող բոլոր ճանապարհները:

Արմավիրի մարզպետ Համբարձում Մաթեւոսյանը «Հայկական ժամանակ»-ի հետ զրույցում ասաց, որ համայնքի ղեկավարի հետ նախապես համաձայնության են եկել եւ մեծամասնության ստորագրության դեպքում նա պատրաստ է գնալ քննարկումների՝ ընդհուպ մինչեւ հրաժարականի:

Մեր հարցին, թե ի՞նչ քայլեր են ձեռնարկվում, որպեսզի Զարթոնք համայնքի բնակիչների բողոքի ակցիաները դադարեն, մարզպետը պատասխանեց. «Երբ Զարթոնքում բողոքի ալիք բարձրացավ մենք մի քանի անգամ հորդորեցինք, որպեսզի մարզպետարանում լինեն քննարկումներ: Մոտ 3 անգամ կազմակերպել ենք, բնակիչները չեն եկել: Հետո որոշել են անմիջապես գնալ կառավարություն, վերջերս էլ վարչապետի Արարատի մարզ այցելելու ընթացքում Զարթոնքի բնակիչները գնացին այնտեղ եւ հանդիպեցին վարչապետին: Երեկ հանդիպել են նաեւ իմ տեղակալի հետ: Իմ տեղակալը հստակ նշել է այն կետերը, պահանջները, որպեսզի սկսենք բանակցությունները:

Նախ եւ առաջ բնակիչները պետք է ներկայացնեն մեծամասնության կողմից կատարված ստորագրահավաք: Երբ որ կներկայացվի մարզպետարան կամ կառավարություն այդ ստորագրությունները, դրանից հետո մենք կսկսենք համայնքապետի հետ քննարկումները: Մինչ այդ ես արդեն նախաձեռնել եմ եւ ունեցել եմ 2 անգամ քննարկում տվյալ համայնքի ղեկավարի հետ եւ հստակ նշել եմ մեր մոտեցումները: Համայնքի ղեկավարի հետ նախապես համաձայնության ենք եկել եւ մեծամասնության ստորագրության դեպքում նա պատրաստ է գնալ քննարկումների, ընդհուպ մինչեւ հրաժարականի: Բայց մեզ դեռ ստորագրություններ չեն ներկայացրել: Համայնքի բնակիչները շարունակում են բողոքել: Մենք ամեն դեպքում շարունակում ենք հորդորել, որպեսզի համակարգին վնասող քայլեր չլինեն՝ ճանապարհներ չփակեն, երկաթգիծ չփակեն, համայնքապետարան չփակեն: Եթե ցանկանում են բողոքի ակցիաներ անել, կարող են քաղաքում, մարզպետարանի դիմաց անցկացնել իրենց ակցիան, բայց դա չպետք է խանգարի մյուս քաղաքացիներին: Մենք ունենք նախադեպեր, երբ ստորագրությունները ներկայացնելուց հետո համայնքապետերը պատրաստակամ են եղել եւ տվել են հրաժարականի դիմում: Եղել են որոշները, որոնք մասնակցել են նոր ընտրություններին, եղել են համայնքապետեր, որոնք հրաժարվել են մասնակցել նոր ընտրություններին»:

Մեր հարցին, թե այս դեպքում ստացվում է, որ քաղաքացիները բողոքում են, բայց չունե՞ն մեծամասնության աջակցությունը, Մաթեւոսյանը պատասխանեց. «Իրենք ամեն դեպքում գնում են բողոքի ցույցերի, բայց ես չգիտեմ՝ իրենք արդյո՞ք կարող են հավաքել այդ ստորագրությունները, թե՝ ոչ: Վերջին խոսակցությունը եղել է երեկ եւ մենք սպասում ենք, որ իրենք կնախաձեռնեն այդ ստորագրահավաքը եւ մարզպետարան կներկայացնեն: Ես չեմ հասկանում այդ քայլերը, քանի որ վարչապետն էլ հստակ ասաց՝ խնդրում եմ ներկայացրեք ստորագրությունները, դրանից հետո մենք կսկսենք քննարկումները: Քաղաքացիները հարցրեցին՝ արդյո՞ք մենք կարող ենք վստահ լինել, վարչապետը հավելեց, որ սա քաղաքական որոշում է: Այսինքն, պետք է ներկայացնեն ստորագրությունները, որպեսզի մենք հասկանանք, որ իրոք մեծամասնությունն է դժգոհում: Ստորագրությունները օրենքի ուժ չունեն, դա ներկայացվում է կառավարություն կամ մարզպետին՝ մարզպետին լիազորելու համար, որ համայնքապետի հետ քննարկումներ սկսի: Որպեսզի համայնքապետը չասի՝ դուք լծակ եք օգտագործում: Մենք փաստենք, ասենք՝ քո համայնքում համայնքի բնակիչները քեզնից դժգոհ են: Մինչեւ այդ ստորագրությունները անել-չանելը մենք նախաձեռնել ենք օրենսդրական փոփոխություն՝ հանրաքվեի ինստիտուտ: Սա նույնպես իրավասություն է տալիս համայնքի բնակիչներին, որպեսզի իրենք կազմակերպեն եւ նախաձեռնեն հանրաքվե»: