Ի հեճուկս ահազանգերի՝ բանակցային գործընթացը ոչ միայն փակուղի չի մտել, այլեւ մեր պատկերացումները լավ ընկալում են ստացել

Հայաստանի խորհրդարանում սկսված կառավարություն-ԱԺ հարց ու պատասխանի ժամանակ «Իմ քայլը» խմբակցության պատգամավոր Վիկտոր Ենգիբարյանը մեջբերեց օրերս Հայաստան ժամանած ՌԴ ԱԳՆ Սերգեյ Լավրովի հայտարարությունը, որը վերաբերում էր Արցախը բանակցային սեղան վերադարձնելու հարցին․

 «Այս հարցի մասին խոսել են նախագահները, վարչապետները, նախարարները, եւս մեկ անգամ նշեմ, որ բանակցությունների մասնակիցների կազմը պետք է համաձայնեցնեն կողմերը, բանակցությունների նախնական փուլում։ Երբ դեռ նոր էին դադարեցվել ռազմական գործողությունները, ԼՂ-ն մասնակից էր բանակցություններին, ինչ-որ փուլում ՀՀ նախագահներից մեկը որոշում ընդունեց, որ ԼՂ շահերը կներկայացնի Երեւանը։ Մենք՝ որպես համանախագահ երկրներ, կարող ենք միայն հավելել, որ գործընթացն ընթացել է ընդհանուր համաձայնությամբ։ Առանց ԼՂ ժողովրդի, նրա բնակչության, անհնար կլինի ձեւակերպել որեւէ համաձայնություն, Հայաստանն ուղղակի չի ստորագրի։ Ուզում եմ նշել, ՀՀ վարչապետն ինձ հետ հանդիպման ժամանակ կրկին ընդգծեց, որ ցանկացած որոշում պետք է ներկայացնի երեք ժողովուրդների հետաքրքրությունները, սրա հետ դժվար է վիճել»։

Լավրովի այս միտքն ամբողջությամբ ցիտելուց հետո Ենգիբարյանը, դիմելով ՀՀ վարչապետին, ասաց, որ ինքն այստեղ ուղերձների լրջագույն փոփոխություն է տեսնում․

«Որքանո՞վ է այս փոփոխվող մոտեցումը նաեւ համանախագահող մյուս պետություններում տեղ գտել»,- հարցրեց Ենգիբարյանը։

Ի պատասխան՝ վարչապետն ասաց, որ իրականում չէր ցանկանա խոսել փոփոխվող ուղերձների մասին, որովհետեւ ԵԱՀԿ ՄԽ համանախագահող երկրների հետ Ղարաբաղի հարցի վերաբերյալ բանակցային գործընթացը զարգացող, կենդանի գործընթաց է․

«Կարող եմ արձանագրել, որ ՀՀ-ում տեղի ունեցան քաղաքական փոփոխություններ, ինչ-որ տեղ բնական մտավախություններ առաջացան, հարցեր, թե ինչքանով ՀՀ նոր կառավարության դիրքորոշումները կլինեն կառուցողական՝ Արցախի հարցի լուծման առումով։ Մենք հենց առաջին օրերից հանդես եկանք մի շարք հարցադրումներով, որոնք, իհարկե, նոր էին կամ լավ մոռացված հինն էին եւ այլն»,- ասաց Փաշինյանը։

Թե ինչ է փոխվել այս մեկ ու կես տարվա ընթացքում, վարչապետը կարծում է, որ արձանագրվել է, որ ոչ միայն իրենց մտադրությունների մեջ չէ բանակցային գործընթացը փակուղի մտցնելը, այլեւ, ընդհակառակը, իրենք ասում են, որ կան բազմաթիվ հարցեր, առանց որոնց ճշգրտման, արդյունավետ բանակցային գործընթաց տանել հնարավոր չէ․

«Եվ այս ըմբռնման առումով որոշակի ընդհանուր ընկալումներ են ձեւավորվել, այսպես ասած, նախադրյալների առումով, կարծում եմ՝ հարցի լուծման նախադրյալների մասով մեր պատկերացումներն ավելի լավ ընկալում են ստացել, որովհետեւ արձանագրվել է, որ մեր դիրքորոշումները կառուցողական են, եւ կարող ենք նաեւ արձանագրել, որ, ի հեճուկս ահազանգերի, բանակցային գործընթացը ոչ միայն փակուղի չի մտել, այլեւ աշխատանք է տարվում՝ հակամարտող բոլոր կողմերի համար լուծում գտնելուն ուղղված միջավայր եւ մթնոլորտ ստեղծելու համար»,- պատասխանեց վարչապետ Փաշինյանը՝ ի հավելումն նշելով, որ, իհարկե, ուրախալի է, որ Լավրովն արձանագրեց այդ իրողությունը, բայց դա, ամեն դեպքում, բխում է ընդհանուր տրամաբանությունից։