Տարոն Մարգարյանի տված շինթույլտվությունը երեք օր անց կասեցվել է, բայց «շուստրի» «Մուլտի գրուպ»-ը երեք հարկ է կառուցել

Երեւանի Աբովյան 5/5 հասցեում «Մուլտի գրուպ» ընկերությունը, ինտենսիվ կատարելով օրենքի ուժով կասեցված շինարարական աշխատանքներ, կառուցել է նոր հյուրանոցի երեք հարկը. օգոստոսից ապօրինի շինարարությունը ընդհատված է: Ինչպես ակնհայտ է կադրերից, կիսակառույցը սկսել է քայքայվել:

Երկու օր է՝ այս շինության մասին իրարամերժ հայտարարություններ են հնչեցնում «Բարգավաճ Հայաստան» կուսակցության ներկայացուցիչներն ու քաղաքապետարանը: Մեկն ասում է, որ բոլոր աշխատանքները կատարվել են օրենքի շրջանակում, քաղաքապետարանի թույլտվությամբ, մյուսը, թե՝ օրենքով այդ թույլտվությունը կասեցված էր՝ շինարարություն ընդհանրապես պիտի չլիներ, կառույցն էլ նախագծից շեղումներ ունի: Այս թեմայի շրջանակում բանավեճը ներառել է արդեն կից թեմաներով քննադատություններ և պատասխաններ, և այսօր քաղաքապետի խոսնակ Հակոբ Կարապետյանը հրավիրել էր ասուլիս՝ հարցերին պարզաբանումներ տալու:  

ԲՀԿ-ի ակտիվ քննադատություններին անդրադառնալով՝ խոսնակն ասաց, որ դրանք չեն համապատասխանում իրականությանը: «Ենթադրելով, որ Ծառուկյանը գուցե լավ տեղեկացված չէ՝ զանգեցի-զգուշացրի տեղեկատվական արշավը կասեցնելու համար. թե ինչ եղավ հետո, շատ հուզիչ էր»,- ասաց նա:

Կարապետյանի խոսքով՝ Աբովյան 5/5 հասցեում ընթացող շինարարությունն ապօրինի է, և իրականացվում է «Մուլտի Գրուպ» ընկերության կողմից, որի հետ կապը Ծառուկյանը չի թաքցնում: «Այսօր պարոն Ծառուկյանը մի նոր հրաշալի հայտարարություն է արել՝ ասելով, որ քաղաքապետ Մարությանն իրեն թույլտվություն տվել է»,- ասաց Կարապետյանը՝ տեղեկացնելով, որ ԲՀԿ առաջնորդը շինարարական թույլտվությունը խառնել է նախագծման թույլտվության կամ ճարտարապետահատակագծային առաջադրանքի հետ, «իսկ դրանք երկու տարբեր փաստաթղթեր են»:

«Նախագծման թույլտվությունը քաղաքային իշխանության համաձայնությունն է, որ տվյալ վայրում կառուցվի տվյալ ծավալների, տվյալ հարկայնության շինություն: Դրանից հետո կառուցապատողը կրկին դիմում է քաղաքին շինարարության թույլտվություն ստանալու համար: Եվ շինթույլտվություն ստանալու դեպքում միայն նա կարող է սկսել շինարարական աշխատանքները: Նախագծման թույլտվությունը շինարարական աշխատանքները սկսելու թույլտվություն չէ»,- պարզաբանեց Կարապետյանը:

Ասվել էր նաև, թե շինթույլտվությունը տվել է Նարեկ Սարգսյանը. Կարապետյանի խոսքով՝ շինարարական թույլտվություն տալիս է բացառապես համայնքի ղեկավարը. «Նարեկ Սարգսյան անուն-ազգանունով քաղաքապետ չենք ունեցել: Մենք ունեցել ենք Տարոն Մարգարյան անունով քաղաքապետ, որ 2017թ. փետրվարի 16-ին տվել է տվյալ հատվածում «Մուլտի գրուպ» ընկերությանը շինարարական թույլտվություն: Դրանից հետո ոչ մի շինարարական թույլտվություն չի տրվել: Բայց փետրվարի 19-ին, այսինքն՝ շինթույլտվության տրամադրումից օրեր անց, վարչական դատարանը վարույթ է ընդունել մի քաղաքացու՝ հարեւան շինության քաղաքացու հայցը՝ ընդդեմ «Մուլտի գրուպ» ընկերության, եւ այդ պահից սկսած օրենքի ուժով Տարոն Մարգարյանի տված շինթույլտվությունը կասեցվել է: Այսինքն՝ շինթույլտվության տրամադրումից երեք օր հետո արդեն շինարարություն իրականացնելու հնարավորություն չկար օրենքով, բայց մեր հարգարժան կառուցապատողը, ինչպես ցանկացած շուստրի տղա, փորձել է շրջանցել կարգը եւ օրենքը, իրականացրել է այնտեղ կառուցապատում եւ մասնավորապես 2018թ. հունիս-հուլիս ամիսներին, երբ կար ընկալում, որ մի քիչ խառն է իրավիճակը, այդ շինարարությունն ինտենսիվ ընթանում էր»,- հաղորդեց Կարապետյանը:

Նա ցույց տվեց մի հրապարակում, որից հետո կազմակերպությունն ապօրինի շինարարություն անցկացնելու համար երկու անգամ՝ 200 հազար դրամով եւ 2 մլն դրամով, տուգանվել է համայնքի կողմից: «Եվ համայնքի ղեկավարն, ընդ որում, դեռ Հայկ Մարությանը չէր: Իսկ երկրորդ տուգանքից հետո գործերն ուղարկվել են իրավապահ մարմիններին»,- ասաց նա:

Գագիկ Ծառուկյանը քննադատել էր քաղաքապետարանի՝ ներդրողների հետ տարվող քաղաքականությունը՝ նշելով, որ Մարությանի հետ հանդիպումից հետո արաբ շեյխն իր ներդրումային ծրագրերը չեղարկել է, քանի որ քաղաքապետը հայտարարել է, որ իրենք հող չունեն, և նոր ներդրումներն անելու համար պոտենցիալ ներդրողները կարող են դիմել անհատներին՝ փորձելով ձեռք բերել նրանց հողատարածքները: Կարապետյանի խոսքով՝ Երևանի կենտրոնում, որտեղ արաբական ներդրումով նախատեսվում էր կառուցել հիվանդանոց, իրականում նման ծավալի հողատարածք չկա, իսկ իրենք առաջարկել են նույն ծրագիրը քաղաքի ծայրամասում իրականացնելու տարբերակներ քննարկել: Դիտարկմանը, որ հիվանդանոցը պիտի բարեգործական հիմունքներով գործեր՝ Կարապետյանն արձագանքեց. «Բարեգործական լինելու մասին հանդիպման ժամանակ ոչինչ չի ասվել»:

Կարապետյանն անդրադարձավ նաև ներդրողների «շեյխ» լինելու հանգամանքի շեշտադրմանը. «Քաղաքային իշխանության համար կարեւոր են ներդրումները, կարեւոր չեն ներդրողների տիտղոսները: ...Այստեղ անձանց հարց չէ: Պետք է հարգել պետական ինստիտուտները և կարգը»,- ասաց նա:

«Դիտողությունը (հանդիպման ընթացքում շեյխը պարբերաբար հեռախոսազանգերի է պատասխանել՝ ընդհատելով զրույցը) պահվածքի համեմատ եղել է բավական մեղմ, քաղաքավարի, և այնուհանդերձ, նշվել է, որ այդքանից հետո քաղաքապետը պատրաստ է ընդունել ներդրումային առաջարկները: Եվ թագավորների, կայսրերի, համաստեղությունների ներկայացուցիչների և նման տիտղոսների հիշատակումը տեղին չէ: Մենք ապրում ենք աշխարհիկ, դեմոկրատական երկրում, որտեղ ազնվական տիտղոսներ գոյություն չունեն»,- ընդգծեց Կարապետյանը:

Հիշեցնենք, որ Երևանի քաղաքապետ Հայկ Մարությանը ևս Հանրային հեռուստատեսության եթերում անդրադարձել էր այս հարցերին` նշելով, որ առաջին անգամը չէ, որ Ծառուկյանն անում է հայտարարություններ, որոնց հետևում փաստեր չկան` նկատի ունենալով վերը նշված հյուրանոցի շուրջ տեղի ունեցողը: 

Կարմեն Մարտիրոսյան