Պետք չէ բոլոր հյուրերին ստիպել ուտել «խոզի բդից». Նիկոլ Փաշինյան

ՀՀ կառավարության այսօրվա նիստում վարչապետ Նիկոլ Փաշինյանն անդրադարձավ ամանորյա միջոցառումների համար 270 միլիոն դրամ հատկացնելու վերաբերյալ քննարկումներին:

«Դա շատ մեծ քննարկումների տեղիք տվեց, բայց այն, ինչ մենք ստացանք ու ստանալու ենք..., կարծես թե դրա արդյունքում քննարկումները դադարեցին»,- ասաց վարչապետը:

Փաշինյանն ընդգծեց՝ իրենք պետական միջոցառումների ծախսման առավել երկար հետագիծ պետք է կարողանան որդեգրել, որ պետական միջոցները ծախսվելիս իրենց հետեւից ավելի մեծ արդյունք բերեն:

«Սա մի հարց է, որը ծավալուն է, ու մենք դրանք առիթ կունենանք քննարկելու»,- նշեց նա: Վարչապետն ասաց, թե խնդիր են դրել, որ Ամանորը նշելու մթնոլորտը որոշակի փոփոխություն կրի:

«Գիտեք, երկար տարիներ ՀՀ-ում ընդունված էր, որ մարդիկ Ամանորը նախընտրում էին նշել Հայաստանից դուրս, որովհետեւ Ամանորի նշելու այն պայմանները, որ կան, բազմաթիվ մարդկանց համար ստեղծում են անհարմարություններ, ու մենք խնդիր ենք դրել ստեղծել բոլորովին նոր պայմաններ, ու ոչ թե Ամանորը լինի մի տոն, որտեղ մարդիկ հնարավորինս առանձնանում են ու էդպես են նշում, այլ մենք ուզում ենք Ամանորը Հայաստանում դարձնել հանրային տոն, որտեղ ժողովուրդը միասին նշելու հարթակ ունի»,- ասաց Նիկոլ Փաշինյանը:

Վարչապետն ասաց, որ Ամանորն ավելի շատ պետք է տրամադրության տոն սարքել, ոչ թե ուտելիքի տոն, որը վերածվում է հետո որոշակի դեպրեսիվ վիճակների. «Մենք այս տարի աշխատել ենք, որ Ամանորի մշակութային կյանքը լինի բավականին աշխույժ»:  

ՀՀ կրթության, գիտության, մշակույթի, սպորտի նախարար Արայիկ Հարությունյանն ասաց, որ մշակութային կյանքում Ամանորի օրերն աննախադեպ են լինելու: Նախարարի խոսքով՝ նախորդ տարիներին դեկտեմբերի 31-ից մինչեւ հունվարի 2-ը Հայաստանում մշակութային կյանքը զրոյանում էր, իսկ այս տարի փոխվել է իրավիճակը:

Հարությունյանն ասաց, որ Ամանորի օրերին մոտ 20 ներկայացում է լինելու թատրոններում, որոնք նախատեսված են մեծերի, փոքրերի, ընտանեկան դիտումների համար։ Նրա խոսքով՝ ավանդույթ են ներդնում, որ դասական համերգով ավարտելու են տարին ու նույնպիսի համերգով սկսեն նորը։

Նախարարն իր անձնական միջոցներով գործընկերների համար «Թռիչք կկվի բնի վրայով» ներկայացման տոմսեր է գնել՝ որպես նվեր:  

Արձագանքելով Հարությունյանին՝ վարչապետը կատակեց. «Ձեր բախտը բերել է, որ նախարարությունների թիվը կրճատեցինք»:

Նիկոլ Փաշինյանն անդրադարձավ նաեւ Ամանորին սխալ սնվելու խնդրին. «Ծխելուց ոչ պակաս վտանգավոր երեւույթ համարվում է սխալ սնվելը, ինչն ամանորյա շրջանում մեզ համար պրոբլեմ է: Ես ցանկանում եմ բոլոր քաղաքացիներին կոչ անել, ներողություն եմ խնդրում նման իրավունք վերապահելու համար, բայց, այնուամենայնիվ, կարծում եմ, որ պետք չէ բոլոր հյուրերին ստիպել ուտել խոզի բդից, որովհետեւ սա յուրահատուկ է, հետո սեղանին եղած ամեն ինչից պարտադիր փորձել, ընդ որում, վիրավորվելու տրամաբանությամբ, բա էսքանը պատրաստել ենք, որ փչանա՞: Ամանորին մարդկանց, քաղաքացիների ուտելու կարողություններն սահմանափակ են, պետք է դա հաշվի առնել»,- ասաց վարչապետը:

Նա ընդգծեց՝ մենք ուզում ենք, որ տնային տնտեսուհիները դեկտեմբերի 31-ի ամբողջ օրը չանցկացնեն տոլմա փաթեթելով եւ այլ պրոցեսների վրա. «Տոլման եւ մնացած ամեն ինչը պետք է ուտել թարմ վիճակում, որովհետեւ որոշ ժամանակ անց այդ մթերքը վնասակար է: Մենք սուպերմարկետների դեմ կռիվ ենք տալիս, որ ժամկետանց մթերք չվաճառեն, բայց Նոր տարվան մեր հարազատներին ստիպում ենք՝ սրանից էլ պետք է ուտես, նրանից էլ ուտես, երեք օրվա «Ստալիչնի» սալաթը, չորս օրվա «բլինչիկը» եւ 15 օրվա «խոզի բուդը»: Հարգելի՛ քաղաքացիներ, պատրաստեք այնքան, որքան ռեալ է ուտել, եւ պետք չէ տոնակատարությունն անցկացնել սննդի դեպրեսիվ սեղանների շուրջ»: