«Փաշինյան ջան, բարով ես եկել, հազար բարի ես եկել». Գյումրիում Նիկոլ Փաշինյանը մասնակցեց սոցբնակարանների բաշխմանը

Վաղ առավոտից Գյումրու Մովսես Խորենացի 46/1 հասցեում տոնական եւ սպասված իրարանցում էր: «ԱՌԴԱ» բարեգործական հիմնադրամի սոցիալական բնակարաններն ստանալու իրենց հերթին սպասող անօթեւան գյումրեցիները ՀՀ վարչապետ Նիկոլ Փաշինյանին էին սպասում:

Հենց «Անի» փողային նվագախումբն սկսեց նվագել, հուզմունքը հասավ գագաթնակետին: Վերջապես եկավ վարչապետը: Մինչեւ շենքին հասնելը բազմաթիվ նամակներ փոխանցվեցին Նիկոլ Փաշինյանին: Բնակարանների շահառու տատիկներն էլ առիթը բաց չթողեցին, որ բարձրաձայնեն, թե իրենց Ամանորի երազանքն այսօր կատարվեց՝ ե՛ւ բնակարան ունեցան, ե՛ւ Նիկոլ Փաշինյանին մոտիկից տեսան:

«Փաշինյան ջան, բարով ես եկել, հազար բարի ես եկել»,- հուզվեց տատիկներից մեկը: «Բարի գալուստ «ԱՌԴԱ»-ի ընտանիք»,- ներկաներին ողջունեց «ԱՌԴԱ» բարեգործական հիմնադրամի գործադիր տնօրեն Հրահատ Ստեփանյանը: Տատիկները կարմիր ժապավենը կտրեցին ու մտան ներս:

Կառուցված 18 բնակարաններից 11-ն այսօր տեր ունեցավ: Մնացած 7-ի համար նոր շահառուներ կփնտրեն: Այն, որ բնակարանների բաշխմանը, բացի տեղական եւ մարզային կառույցների ղեկավարներից եւ պատասխանատուներից, մասնակցում է երկրի վարչապետը, Տարածքային կառավարման եւ ենթակառուցվածքների նախարար Սուրեն Պապիկյանը, ԱԺ պատգամավորներ եւ այլք, ըստ «ԱՌԴԱ» բարեգործական հիմնադրամի գործադիր տնօրեն Հրահատ Ստեփանյանի, իր բացատրությունն ունի:

«Մեր երկրում իրապես իրավիճակ է փոխվել: Նկատի ունեմ այն, որ վերջին 7 տարում 109 բնակարան ենք կառուցել, 68-ը՝ Վանաձորում, 41-ը՝ Գյումրիում, առայժմ 41-ը: Եվ նման առիթների ժամանակ չի եղել որեւէ մեկ դեպք, որ Տարածքային կառավարման կրտսեր մասնակիցը մասնակցեր: Ի տարբերություն դրա՝ անցյալ տարի նախարարը մասնակցեց: Իսկ էս տարի էլ չասեմ: Պարո՛ն վարչապետ, շնորհակալ ենք: Ձեր այցը մենք ընդունում ենք՝ որպես աշխատանքի գնահատական: Բայց մենք դրա համար չէ, որ կառուցել ենք: Մենք միշտ ենք կառուցել, որովհետեւ միշտ ենք հավատացել մեր երկրի ապագային, մենք կառուցել ենք, որովհետեւ պետք է ամեն մեկս մեր գործն անենք, որ առաջ գնանք»,- ասաց Ստեփանյանը:

«ԱՌԴԱ»-ն շահառուներին եվրոբնակարաններ է հանձնում՝ ապահոված ջեռուցման համակարգով, խոհանոցն ամբողջովին կահավորված, գազօջախով, կահույքով, սանհանգույցները եւս ունեն համապատասխան կահավորում: Նաեւ շատ կարեւոր խնդիր է լուծում: «ԱՌԴԱ»-ն ամբողջովին հոգում է բոլոր բնակիչների ջեռուցման ծախսը: Նախորդ երկու փուլերում շահագործված բնակարանների պարագայում էլ այս պարտավորությունն անխախտ է եղել:

Բնակարաններն ստանալուն պես շահառուներն իրար հյուր գնացին, շնորհավորեցին միմյանց, բայց Ռոզա տատիկը դժգոհ էր, ոչ թե բնակարանից, այլ տրամադրման պայմանից: Ասաց՝ 88-ին 2 սենյականոց բնակարան է կորցրել, երբեք որեւէ փոխհատուցման ծրագրից չի օգտվել: Հիմա ստիպված է եկել սոցիալական բնակարան, քանի որ տնակը քայքայված, առնետների ու շների կացարան է արդեն դարձել: Տատիկն ուզում էր սեփականաշնորհման իրավունքով բնակարան ունենալ, որ կարողանար այն թոռնուհուն նվիրել: Սոցիալական բնակարանը, սակայն, նման հնարավորություն շահառուին չի տալիս:

Հաջորդ տարի եւս «ԱՌԴԱ»-ն շինարարություն կիրականացնի, բայց՝ ոչ բնակարանաշինություն: Արդեն շահագործված շենքերի տարածքի մերձակա հատվածում քաղաքապետարանի առաջարկով մանկապարտեզ եւ մարզամշակութային հաստատություն կհիմնվի: Ընկերությունն արդեն տարածքի ուսումնասիրությունն սկսել է: Ծրագրի հովանավորն ամերիկաբնակ Սարգիս Սեբեջյանն է, որի կինը՝ Նունե Քեչեջյանը, տարիներ առաջ ընտանիքի հետ Բեյրութից գաղթելուց հետո 4-5 տարի ապրել է Գյումրիում, այնուհետ տեղափոխվել նահանգներ: «Իրենք են սա անում մեծ սիրով, մանկապարտեզը 44 երեխայի համար պետք է լինի: Աստծուց առաջ չընկնենք, բայց նոր ծրագիրը կանենք: Մենք պատրաստ ենք Գյումրու քաղաքապետարանի հետ հետագա համագործակցության  համար»,- ասաց «ԱՌԴԱ»-ի գործադիր տնօրեն Հրահատ Ստեփանյանը:

Իսկ ընդհանուր առմամբ անցնող մեկ շաբաթում Գյումրիում տարբեր ծրագրերի իրականացմամբ 25 անօթեւան ընտանիք է տնակից քարաշեն բնակարան տեղափոխվել:

Արմենուհի Մինասյան