Ադրբեջանցի պատվիրակը ԵԽԽՎ-ում հայ պատգամավորի մասին հնացած տեղեկություն է ներկայացրել. հայ պատվիրակն արձագանքել է

ԵԽԽՎ-ում մեկնարկած ձմեռային նստաշրջանն ընթանում է բուռն քննարկումներով: Երեկվանից քննարկման առարկա է սոցիալական մեդիայում ճգնաժամի թեմայով զեկույցը, որի ընթացքում հիմնականում քննարկվում է Ադրբեջանում լրատվամիջոցների ազատության հարցը:

Թերեւս նեղվելով հայ պատգամավորների ելույթներից՝ Ադրբեջանի պատվիրակներից մեկը որոշել է քննադատել ՀՀ-ում մամուլի ազատության վիճակը: Մասնավորապես, ՀՀ ԱԺ «Իմ քայլը» խմբակցության պատգամավոր Սիսակ Գաբրիելյանին ներկայացնելով որպես լրագրող՝ նա խոսել է Գաբրիելյանի աշխատանքը խոչընդոտող դեպքի մասին: Ադրբեջանցի պատվիրակը հավանաբար նկատի է ունեցել հեղափոխությունից առաջ տեղի ունեցած դեպքը:

Ի պատասխան՝ ելույթով է հանդես եկել օրերս ԵԽԽՎ Մարդու իրավունքների եւ իրավական հարցերի հանձնաժողովի նախագահի առաջին տեղակալ ընտրված հայաստանյան պատվիրակության անդամ Էդմոն Մարուքյանը.

«Որպես Հայաստանի ներկայացուցիչ՝ պետք է ասեմ, որ մեր տարածաշրջանում հետխորհրդային երկրներից Հայաստանն ու Վրաստանն առաջին շարքերում են խոսքի ազատության հարցում, մինչդեռ Ադրբեջանը վերջին տեղում է, որտեղ լրատվության սահմանափակումն ու մամուլի նկատմամբ ճնշումները պահպանվում են: Իմ ադրբեջանցի կոլեգան Հայաստանի մասին սխալ տեղեկություն հայտնեց. նրա նշած անձն այսօր խորհրդարանի անդամ է, այնպես որ, տեղեկությունը հնացած է»,- ասել է նա:

Խոսելով Ադրբեջանում մարդու իրավունքների պաշտպանության եւ մամուլի ազատության վիճակի մասին՝ Մարուքյանն ընդգծել է. «Ադրբեջանում լրատվամիջոցները ենթարկվում են հետապնդումների ու ճնշումների, այս հարցը պետք է շատ արագ կարգավորել: ԵԽԽՎ-ում համատեղ ջանքեր պետք է գործադրվեն, որպեսզի մամուլի ազատությունը չմնա թղթի վրա, այլ գործի կազմակերպության անդամ բոլոր՝ 47 երկրներում»:

Ի դեպ, «Սոցիալական մեդիայի ճգնաժամը» թեմայով զեկույցի քննարկման ընթացքում հետաքրքիր ելույթներ են ունեցել հայկական պատվիրակության մյուս անդամները եւս: ԵԽԽՎ-ում Հայաստանի պատվիրակության անդամ Տաթեւ Հայրապետյանը, օրինակ, իր ելույթում անդրադարձել է Հայաստանում թավշյա հեղափոխությունից հետո մեդիա ոլորտի ձեռքբերումներին: Մասնավորապես, նա ուշադրություն է հրավիրել «Freedom House» միջազգային իրավապաշտպան կազմակերպության հրապարակած զեկույցի վրա, ըստ որի՝ Հայաստանը դասվում է ազատ» երկրների շարքին՝ զբաղեցնելով 8-րդ հորիզոնականը:

«Ես կարծում եմ, որ Հայաստանի Հանրապետության վարչապետ Նիկոլ Փաշինյանի օրինակը, երբ ակնառու, քննադատող լրագրողն ու ընդդիմադիր քաղաքական գործիչը դարձավ հեղափոխության առաջնորդ եւ երկրի ղեկավար, ակնհայտորեն ցույց է տալիս, թե որքան կարևոր եւ իրականությունը փոխող դեր կարող է խաղալ լրագրությունը: Սակայն մենք ականատես ենք լինում, թե ինչ լուրջ խնդիրների են առերեսվում լրագրողները մեր հարեւան երկրներում, մասնավորապես՝ Ադրբեջանում եւ Թուրքիայում, որտեղ մամուլի հետ կապված խնդիրների մասին խոսվում է նաեւ վերոնշյալ զեկույցում: Ադրբեջանում Խադիջա Իսմայիլովայի, Աֆղան Մուխթարլիի, Մեհման Հուսեյնովի հետ կապված դեպքերը հստակ ցույց են տալիս, թե ինչպես է իշխող կուսակցությունը վերաբերվում քննադատող մամուլին, եւ որքան վտանգավոր է տալ հարցեր եւ իրականացնել հետաքննություններ, որոնք ցույց են տալիս Ադրբեջանի կոռումպացված իրականությունը»,- իր ելույթում նշել է Հայրապետյանը եւ շարունակել.

«Հույս ունեմ՝ որպես ԵԽԽՎ անդամներ՝ մենք կանենք հնարավոր առավելագույնը, որպեսզի հանդիսանանք մամուլի ազատության երաշխավորներ, մենք պետք է «պահապան շան» («watchdog») դեր ստանձնենք անդամ երկրների հանդեպ և ձեռնարկենք համապատասխան քայլերը՝ կանխելու լրագրողների նկատմամբ հետապնդումները: Այսպիսով, կա՛մ մենք բարձրաձայնում ենք այսօր առկա խնդրի մասին և անում առավելագույնը՝ դադարեցնելու այս միտումն ընդդեմ լրագրողական ազատության, կա՛մ մենք հարկադրված ենք լինելու տեսնել նման դեպքերի կրկնություն ապագայում: Մենք արդեն ընտրել ենք առաջին ճանապարհը և պետք է հավատարիմ մնանք դրան»,- հավելել է նա:

Երեկ ԵԽԽՎ-ում ելույթ է ունեցել նաեւ Նաիրա Զոհրաբյանը: «Լրագրողի մասնագիտությունը շատ ռիսկային աշխատանք է ամբողջ աշխարհում: Նրանց հետապնդում են, սպանում, դատապարտում իրենց մասնագիտական ակտիվության համար, բանտարկում են կեղծ մեղադրանքներով: Թուրքիան եւ Ադրբեջանն առաջատար են այդ հարցում: Այդ գործընթացն այս պետություններում շարունակվում է. դարձյալ լրագրողներ են ձերբակալվում կեղծ մեղադրանքներով, փակվում են լրատվական գործակալություններ»,- ասել է Զոհրաբյանը՝ հավելելով, որ ինքը վտանգավոր է համարում նաեւ լրատվամիջոցներով բռնություն եւ ատելություն քարոզելը:

Ի վերջո, ընդունված բանաձեւով ընդգծվել է, որ Ադրբեջանն անկախ լրագրողների համար ամենաթշնամական երկրներից է: Զեկույցում նշվել է, որ բազմաթիվ լրագրողների քրեական հետապնդումների ֆոնին Ադրբեջանն անվճար բնակարաններ է տրամադրում իշխանամետ ավելի քան 400 լրագրողի, ինչը կոռուպցիայի ակնհայտ դրսեւորում է:

ԵԽԽՎ-ն ընդգծել է, որ Ադրբեջանի իշխանությունը պարտավոր է անհապաղ դադարեցնել լրագրողների նկատմամբ բռնաճնշումները, երաշխավորել խոսքի ազատությունն ու գործնական քայլեր ձեռնարկել՝ այս ոլորտում Եվրախորհրդի առջեւ ստանձնած պարտավորություններն իրագործելու համար:

Սպասվում է, որ այսօր ԵԽԽՎ-ում կքննարկվի նաեւ Ադրբեջանում քաղբանտարկյալների մասին զեկույցը:

Ավելի վաղ տեղի էր ունեցել «Եվրոպայի ազատականների եւ ժողովրդավարների դաշինք» խմբակցության նախագահի եւ փոխնախագահների ընտրությունը։ Քվեարկության արդյունքում ԵԱԺԴ նախագահ է ընտրվել ֆրանսիական պատվիրակության անդամ Ժակ Մերը։ ԵԽԽՎ-ում ՀՀ ԱԺ պատվիրակության անդամ, ԱԺ արտաքին հարաբերությունների հանձնաժողովի նախագահի տեղակալ Հովհաննես Իգիթյանն ընտրվել է ԵԱԺԴ (ALDE) խմբակցության փոխնախագահ։

ԵԽԽՎ ամենակարեւոր հանձնաժողովներից մեկի՝ Մարդու իրավունքների եւ իրավական հարցերի հանձնաժողովի նախագահի առաջին տեղակալ էր ընտրվել Էդմոն Մարուքյանը: Վլադիմիր Վարդանյանն էլ ընտրվել է նույն հանձնաժողովի ներկայացուցիչ Վենետիկի հանձնաժողովում, իսկ Հովհաննես Իգիթյանն ընտրվեց ԵԽԽՎ-ում ամենամեծ խմբերից մեկի՝ ALDE-ի փոխնախագահ։