Ենթադրում եմ՝ վարչապետը քարոզարշավին ակտիվ մասնակցություն կունենա․ Ալեն Սիմոնյան

Մեզ մեղադրում եւ մեղադրելու են հնարավոր բոլոր բաների մեջ, նույնիսկ՝ մարդակերության, միայն թե ինչ-որ կերպ խափանեն հանրաքվեի գործընթացը։ Ազգային ժողովում լրագրողների հետ զրույցում ասաց «Իմ քայլը» խմբակցության պատգամավոր, ԱԺ փոխնախագահ Ալեն Սիմոնյանը։

Անդրադառնալով ավագանու «Լույս» խմբակցության անդամ Դավիթ Խաժակյանի հայտարարությանը, թե Ալեն Սիմոնյանն ու Հրայր Թովմասյանի քույրը նույնաբովանդակ հայտարարություններ են անում ԼՀԿ խմբակցության ղեկավար Էդմոն Մարուքյանի վերաբերյալ՝ ԱԺ փոխխոսնակն այսպես արձագանքեց․

«Ցավում եմ, որ երիտասարդ քաղաքական գործիչը, որը Միքայել Մինասյանի կայքում տեսանյութերի աստղ է հանդիսանում եւ նկարահանվում «Ադեկվադների»-ի տեսանյութերում, ինձ փորձում է կապել Հրայր Թովմասյանի քրոջ հետ։ Մարդը, երբ հայտարարություն է անում, պետք է վստահ լինի, որ իր վերաբերյալ նման հայտարարություն չի լինի։ Ինքը թող գնա, նկարահանվի Մինասյանի կայքերի համար՝ իմ դեմ, Նիկոլ Փաշինյանի դեմ, չփորձի ինձ որեւէ մեկի հետ կապել։ Ես բազմիցս իմ քայլերով ապացուցել եմ, որ ինձ բացի ՔՊ-ի, Փաշինյանի ու իմ ընկերների ու սկզբունքների հետ կապելը սին գործողություն է»։

Ալեն Սիմոնյանը վստահ է՝ «Ոչ»-ի շտաբ ձեւավորվելու է։ Նրա պնդմամբ՝ բոլոր մարդիկ, որոնք ասում են, թե «Ոչ»-ի շտաբ չեն ձեւավորելու, քաջ գիտակցում են, որ «Այո»-ն հաղթելու է․

«Վստահ եմ, որ կձեւավորվի, որովհետեւ «սուրբ» տեղը դատարկ չի մնա, եւ օրենքը կարգավորումը տալիս է։ Արդեն նույնիսկ «Ո՛չ հակասահմանադրական հանրաքվեին» լոզունգն է պտտվում սոցցանցերում»,- նկատեց Սիմոնյանը։

ԱԺ փոխնախագահը հերքեց տեղեկությունները, թե ՍԴ անդամներ են այցելել Ազգային ժողով։ Ինքը, համենայն դեպս, նման տեղեկություն չունի։ Ինչ վերաբերում է ՍԴ անդամների հետ քննարկումներ ունենալուն, Սիմոնյանն ասաց, որ վարչապետը իր ելույթում է հայտարարել, որ ինքը պատրաստ է հանդիպել բոլորի հետ․

«ՍԴ անդամների հետ աշխատելու խնդիր չկա, մենք մեր գործողություններով ցույց ենք տվել՝ ինչ ենք անում, բաց տեքստով ասվել է, որ բոլորի հետ պատրաստ ենք հանդիպել»։

Ալեն Սիմոնյանը բացառում է, որ մինչեւ հանրաքվեն՝ ՍԴ բոլոր անդամները հրաժարական կտա․ «Չեմ կարծում, որ բոլորը բարձր գիտակցությամբ նման համարձակ քայլի կգնան»։

ԱԺ փոխնախագահը վերահաստատեց իրենց թիմի այն պնդումը, որ հանրաքվեի գնալով եւ «Այո» քվեարկելով՝ քաղաքացիները «Ոչ» են ասելու անցյալին, անցյալի բոլոր արատավոր երեւույթներին, որոնք մնացել են այսօր, բոլոր բեկորներին, որոնք Հրայր Թովմասյանի «խրամատում են» եւ այլն․

«Այս  քայլը ճիշտ կլինի համեմատել հեղափոխության կամ հոկտեմբերի 2-ի հետ (քաղաքացիները շրջափակել էին դատարանները,- հեղ․)։ Մենք համարում ենք, որ փողոց փակել, դատարան փակել պետք չի լինելու եւ հինգ րոպե է պետք լինելու «Այո» ասել նոր Հայաստանին, «Ոչ» ասել անցյալին։ Վստահ եմ, որ քաղաքացիները բավարար թվով «Այո» կասեն»։

Լրագրողները հետաքրքրվեցին՝ ինչպես է ընթանալու քարոզարշավը։ Սիմոնյանը պատասխանեց, որ այս պահին քննարկումներ են ընթանում, բայց, ամենայն հավանականությամբ, վարչապետը մեծ մասնակցություն կունենա քարոզարշավին, ինչպես իրենց քաղաքական թիմի մյուս ներկայացուցիչները․

«Մենք մեծ հաճույք ենք ստանում, առիթը բաց չենք թողնում յուրաքանչյուր գյուղի, քաղաքի բնակիչների հետ շփվելու»։