ԼՀԿ-ն օրակարգ է բերում ԱԺ-ից դուրս գտնվող խուլիգանական խմբակների օրակարգը․ Լիլիթ Մակունց

Նախ ուզում եմ «Իմ քայլը» խմբակցության անունից ներողություն խնդրել ՀՀ քաղաքացիներից եւ բոլոր այն հայրենակիցներից, որոնք ականատես են եղել միջադեպին։ Այս մասին քիչ առաջ ԱԺ ամբիոնից հայտարարեց «Իմ քայլը» խմբակցության ղեկավար Լիլիթ Մակունցը։ Նա ասաց՝ ցավում է, որ խմբակցությունը տրվել է սադրանքներին, եւ տեղի է ունեցել այն, ինչ տեղի է ունեցել։

«Ամեն ինչ սկսվեց ապօրինի գույքի բռնագանձման մասին օրենքի ընդունումից։ Այն պահից, երբ այդ առնչությամբ իր դիրքորոշումը հայտնեց «Լուսավոր Հայաստան» խմբակցությունը՝ կողմ չքվեարկելով այդ նախագծին»,- ասաց Մակունցն ու հավելեց, որ այդ օրենքի ընդունումից հետո շեշտակի փոխվեց «Լուսավոր Հայաստան» խմբակցության, հատկապես՝ ղեկավարի վարքագիծը ԱԺ նիստերի դահլիճում։ Մակունցի խոսքով՝ Մարուքյանը պատգամավոր եղած ժամանակ երբեւէ իրեն թույլ չի տվել այնպիսի բառամթերք, որը թույլ է տվել յոթերորդ գումարման ԱԺ-ում։ Նրա համոզմամբ նաեւ՝ ամեն ինչ սկսվեց այն պահից, երբ ԼՀԿ-ի ղեկավարը ԱԺ-ի նիստերի դահլիճում ուղիղ եթերով հնչեցրեց սեռական բնույթի հայհոյանք ԱԺ փոխնախագահի հասցեին, եւ դրան չհետեւեց ներողություն ո՛չ փոխնախագահի նկատմամբ, ո՛չ պատգամավորների, ո՛չ ՀՀ քաղաքացիների։

«Դրանց հետեւեցին ինչ-որ գործընթացներ արդեն ԱԺ նիստերի դահլիճից դուրս, եւ հիմա արդեն շաբաթներ շարունակ «Լուսավոր Հայաստան» խմբակցությունը փորձում է սադրել եւ ներքաշել «Իմ քայլը» խմբակցությանն այնպիսի գործողությունների մեջ, որոնք այս տեսախցիկների առջեւ կներկայացնեն «Իմ քայլին» հենց այն տեսանկյունից, ինչպիսին ուզում էր տեսնել պարոն Մարուքյանը»,- ասաց Մակունցը եւ շեշտեց, որ որեւէ կերպ չի փորձում արդարացնել միջադեպը եւ նորից վերահաստատեց, որ ցավում է կատարվածի համար։ Ի վերջո, Մակունցը հայտարարեց, որ ԼՀԿ-ն Ազգային ժողով է բերում ոչ թե ԼՀԿ-ի օրակարգը, այլ անհասկանալի՝ ԱԺ-ից դուրս գտնվող խուլիգանական խմբակների օրակարգը։

Հիշեցնենք, որ այսօր ԱԺ-ում ծեծկռտուք է տեղի ունեցել Էդմոն Մարուքյանի եւ Սասուն Միքայելյանի միջեւ։