Ակտիվիստ լինելն ինձ համար չէ. Հենրիխ Մխիթարյան

Հայաստանի ֆուտբոլի ազգային հավաքականի եւ «Ռոմայի» կիսապաշտպան Հենրիխ Մխիթարյանը չի ցանկանում ֆուտբոլից բացի, այլ ոլորտներում ուշադրութան կենտրոնում լինել: Հարցազրույց է տվել Հայաստանում Իտալիայի դեսպանատան հովանավորչությամբ գործող «A Day With…» հաղորդմանը, որի ընթացքում նրան հարց է ուղղվել լեգենդար բասկետբոլիստ Մայքլ Ջորդանի խոսքերի մասին, որ պրոֆեսիոնալ մարզիկը չի կարող ակտիվիստ լինել: Հայաստանի հավաքականի ավագը, որից Հայաստանում երբեմն արձագանք են սպասում այս կամ այն քաղաքական երեւույթների մասին, համաձայնել է աշխարհահռչակ բասկետբոլիստի խոսքերին:

«Եվ նա ճիշտ է, դու չես կարող ակտիվիտս լինել, եթե մարզիկ ես: Ես էլ ամբողջությամբ կենտրոնացած եմ ֆուտբոլի վրա եւ այլ բաների մասին չեմ մտածում: Ակտիվիտս լինելը կամ ֆուտբոլից բացի այլ բանով զբաղվելն ինձ համար չեն: Ես ինձ նվիրել եմ ֆուտբոլին, ներգրավված եմ ֆուտբոլում եւ մնալու եմ ֆուտբոլում: Չեմ ցանկանում նայել կողքերս՝ տեսնելու համար, թե ինչ է կատարվում եւ ուրիշ ինչ կարելի է անել կամ սադրիչ ինչ-որ բան ասել: Իմ աշխատանքը ֆուտբոլն է, եւ այդքանը, ցանկանում եմ վայելել դա»,- ասել է նա:

Հարցազրույցի ընթացքում ֆուտբոլիստն անդրադարձել է հայկական ֆուտբոլի զարգացմանը: Նշել է, որ կան ե՛ւ ճիշտ, ե՛ւ թե սխալ քայլեր, սակայն ինքը խորքային վերլուծություն անել չի կարող, քանի որ հեռու է: Ընդգծել է, որ փողը կարեւոր է, սակայն միակ կարեւոր գործոնը չէ ֆուտբոլում:

«Բազմաթիվ սխալ բաներ եմ տեսնում հայկական ֆուտբոլում, բայց կարող եմ նաեւ լավերը թվել: Շատ բարդ է խոսել ինչ-որ բանի մասին, երբ դու ինքդ դրա մեջ չես. ես մարզիչ չեմ, ակադեմիայում չեմ, չգիտեմ՝ ինչ տիպի աշխատանք են նրանք այնտեղ տանում՝ մարզիչները, երեխաները, ինչպես են մարզվում, ինչ փիլիսոփայություն ունեն: Իհարկե, փողը եղանակ է ստեղծում…»,- ասել է նա:

Իր նվաճումների մասին խոսելիս 31-ամյա ֆուտբոլիստն ընդգծել է, որ անցյալով չի ապրում: Գիտակցում է, որ իրեն շատ ժամանակ չի մնացել մեծ ֆուտբոլում: Մնացած ժամանակահատվածում ամեն ինչ անելու է՝ իր թիմին օգնելու ու տիտղոսների քանակն ավելացնելու համար:

«Շատ բաների եմ  հասել, բայց ինձ համար դա անցյալում է: Ուզում եմ ավելիին հասնել հետագա տարիներին: Ինձ շատ չի մնացել ֆուտբոլում, բայց վստահ եմ՝ իմ լավագույնն եմ անում՝ նոր հաջողությունների հասնելու համար, որովհետեւ կարիերայիդ ավարտից հետո մարդիկ նայում են՝ ինչ ես արել ակումբիդ համար, ինչպես ես խաղացել, տիտղոսներ նվաճել ես, թե ոչ: Ինձ համար ամենակարեւորը դրական հետք թողնելն է, տիտղոս նվաճելը, ակումբի համար որեւէ լավ բան անելը»,- ասել է նա:

Մխիթարյանը խոսել է նաեւ «Ռոմայում» անցկացրած ժամանակահատվածի մասին: Հերթական անգամ ընդգծել է, որ իրեն շատ լավ է զգում այնտեղ ու ցանկանում է շարունկել խաղալ «գայլերի» կազմում: Ա Սերիան համեմատել է նախորդ առաջնությունների հետ, որոնցում խաղացել է, ընդգծել՝ երջանիկ է, որ Իտալիայում ու «Ռոմայի» երկրպագուների համար խաղալու հնարավորություն ունի:

«Համեմատած Անգլիայի, Գերմանիայի եւ Ուկրաինայի առաջնությունների հետ՝ այն իր առանձնահատկություններն ունի: Մարդիկ թերագնահատում են Ա Սերիան, սակայն կասեմ, որ այստեղ խաղալն ավելի քան հետաքրքիր է: Իհարկե, գուցե այնպես չէ, ինչպես, օրինակ, 20 տարի առաջ էր, բայց վստահ եմ, որ առաջնությունն ավելի ու ավելի լավն է դառնում: Ավելի քան երջանիկ եմ այստեղ լինելու համար, քանի որ այստեղ, այս երկրպագուների համար խաղալն անհավանական է: Շատ էի լսել, որ այստեղի երկրպագուները լավ իմաստով խելագար են, բայց չէի կարող հավատալ, որ իսկապես այդպես է: Շատ հաճելի է «Ռոմում» խաղալը, հաճելի է նման երկրպագուներ ունենալը»,- ասել է նա:

Մխիթարյանը «Ռոմա» է տեղափոխվել ընթացիկ՝ 2019-20 մրցաշրջանի սկզբում: Ընդամենը մի քանի ամիս է, ինչ ապրում է Հռոմում, սակայն միջավայրն իրեն շատ հարազատ է: Ընդգծում է այն տարածված կարծիքը, որ հայերն ու իտալացիները մենթալիտետով նման են եւ նշում, որ իրեն լավ է զգում իտալացիների շրջապատում:

«Կարծում եմ՝ միակ տարբերությունը լեզուն է: Այլ տարբերություն չեմ տեսնում, նրանք էլ կատակում են, զվարճալի են, իհարկե, նրանք նույնպես խաբում են, դա նորմալ է, ես սովոր եմ: Ինձ դուր է գալիս: Սիրում եմ պոզիտիվ եւ էներգիայով լի մարդկանց: Առաջին օրը, երբ եկա այստեղ, տպավորություն էր, թե Հայաստանում եմ»,- ասել է նա:

Մխիթարյանի տրանսֆերային իրավունքները պատկանում է Լոնդոնի «Արսենալին»: Նա արդեն լոնդոնցիներին հայտնել է, որ ուզում է մնալ Հռոմում, «Ռոման» ցանկանում է գնել նրան, «Արսենալն» էլ՝ վաճառել, սակայն կողմերը չեն կարողանում համաձայնության գալ գումարի հարցում: Հայ ֆուտբոլիստի պայանագրի ժամկետը «Ռոմայի» հետ լրանում է ընթացիկ մրցաշրջանի վերջում: