Միշիկը՝ պապիկից, տատիկը՝ պապիկից... մուկն էլ քաշի՝ չեն պլստալու. Փաշինյանը՝ Միքայել Մինասյանի, մաքսանենգ ծխախոտի մասին

Միշիկը՝ պապիկից, տատիկը՝ պապիկից, թոռնիկը՝ տատիկից, փիսոն՝ թոռնիկից եւ մուկն էլ, ամենակարեւորը մուկը, վերջից քաշի, մեկ է, չեն պլստալու:

ՀՀ ԱԺ-Կառավարություն հարցուպատասխանի ժամանան այս մասին հայտարարեց ՀՀ վարչապետ Նիկոլ Փաշինյանը՝ վստահեցնելով, որ «կոռուպցիոներները շուտով կսսկվեն»:

ՀՀ վարչապետն այս մասին խոսեց պատգամավոր Տիգրան Ուրիխանյանի հարցին ի պատասխան: Պատգամավորը վարչապետին խնդրում էր խոսել Սերժ Սարգսյանի փեսա Միքայել Մինասյանի կողմից արված հայտարարությունների մասին:

«Չէի տա այդ հարցը, որ կապված է Միքայել Մինասյանի կողմից ձեզ ուղղված մեղադրանքներին, եթե դա չլիներ մեղադրանք, որ անդրադառնում է բոլորիս: Եթե Հայաստանի Հանրապետությոնից մաքսանենգ բեռով ինքնաթիռներ են թռնում կառավարության թույլտվությամբ, թռնում են բարեկամ Ռուսաստան, բարեկամ Վրաստանի հետ խնդիրներ առաջացնում, դա ձեր վարկանիշի վրա ազդելու է, կարող է դա ձեզ միեւնույն է, ինձ համար դա միեւնույն չէ, որովհետեւ դուք իմ միակ հայրենիքի վարչապետն եք»,- հարց-դիտարկումն այս նախաբանով սկսեց Ուրիխանյանը՝ նկատելով, թե մի որեւէ երկրում իրեն տեսնելիս կարող են ասել՝ սա էն մաքսանենգների երկրի պատգամավորն է:

Ուրիխանյանի հարցը հետեւյալն էր՝ արդյոք Հայաստանից մաքսանենգ ճանապարհով ինքնաթիռներ են թռնում, ինչպես հայտարարում է Միքայել Մինասյանը:

«Կարծում եմ՝ ձեր վարկանիշը պահելու անհրաժեշտություն չկա, պարո՛ն Ուրիխանյան, որովհետեւ, ինչպես վերջին 10 տարում, ձեր վարկանիշը աննկարագրելիորեն բարձր է, այնպես որ, այդպիսի խնդիր չկա: Ինչ վերաբերում է Հայաստանի մաքսանենգ երկրի իմիջին, ես կարծում եմ, որ այդ իմիջով հետաքրքրվողները պետք է հետաքրքրվեն այն քրգործով, որ հարուցված է ՊԵԿ-ում Միքայել Մինասյանի գործունեության հետ կապված: Ըստ իմ ունեցած տեղեկությունների, առանց որեւէ մեկի անմեղության կանխավարկածը խախտելու, Հայաստան են ներկրվել գյուղատնտեսական մթերքներ, ճոխության առարկաներ, շինանյութ, ինչ ասես՝ սելիտրայի անվան ներքո, եւ դրա արդյունքում Հայաստանի Հանրապետությանը պատճառվել է 20 միլիարդ դրամի վնաս»,- պարզաբանեց Փաշինյանը:

Անդրադառնալով Հայաստանից ծխախոտի արտահանմանը՝ ՀՀ վարչապետը վստահեցրեց, որ առնվազն վերջին 5 տարում այդ համակարգում ոչ մի բան չի փոխվել:

«Եթե այդտեղ կա պրոբլեմ, ուրեմն էդ պրոբլեմի պատասխանը պետք է պահանջել Միքայել Մինասյանի աներ Սերժ Սարգսյանից: Գիտեք, որ Կրասնոդար քաղաքում կամ երկրամասսում բռնվել է մաքսանենգ բեռով ծխախոտ, որ արտահանվել է Հայաստանից: Եթե հետ պտտենք իրադարձությունը եւ քննենք Հայաստանի հարկային մարմինների գործողությունները, էդ գործողությունների մեջ ոչ մի բան չի փոխվել, որեւէ բան փոխելը կլինի ապօրինի: Որովհետեւ մարդը գալիս, ասում է՝ ես ծխախոտ եմ արտահանում ՀՀ-ից, օրինակ՝ Աֆղանստան եւ թռնում եմ Ռուսաստանով դեպի Աֆղանստան: Էդ մարդը թռնում է օրինական ձեւակերպումով: Եթե էսօր էլ լինի էդ նույն բեռը, նույն ձեւակերպումով թռնելու է, եթե ճանապարհին վայրէջք է կատարում Կրասնոդարում, օրինակ, ասենք, վերալիցքավորման պատճառաբանությամբ, բայց ծխախոտի մի մասը կամ լրիվ բեռնաթափում է այնտեղ, Հայաստանի Հանրապետության իշխանությունը որեւէ կապ չունի»,- վստահեցրեց Փաշինյանը:

Շարունակելով իր խոսքը՝ նա այլաբանորեն պատասխանեց որոշ հեռակա հարցադրումների, թե «բա էս կոռուպցիոներները ինչի չեն սկսվում».

«Ես կարծում եմ, որ նրանք վերջին օրերի իրադարձութունների արդյունքում կսսկվեն, թույլ տվեք համոզմունք հայտնել, որ կսսկվեն, որովհետեւ քրգործում ներգրավված մեղադրյալի պաշտպանական թիմին օրենքով սահմանված կարգով փոխանցվել են տեղեկություններ, որով մեղադրյալը եւ նրա ընտանիքը պետք է իմանան, թե ինչ խոր ցեխի մեջ են իրենք, որից դուրս պրծնել չեն կարողանալու: Ասենք, Սերժ Սարգսյանը, մնացածը, իրենք բոլորը, Միշիկը՝ պապիկից, տատիկը՝ պապիկից, թոռնիկը՝ տատիկից, փիսոն՝ թոռնիկից եւ մուկն էլ, ամենակարեւորը մուկը, վերջից քաշի, մեկ է, չեն պլստալու, պարո՛ն Ուրիխանյան»,- եզրափակեց վարչապետը: