Մարտի 31-ից մինչեւ հունիսի 1-ը աշխատանքը կորցրած քաղաքացիներին միանվագ օժանդակություն կտրվի․ հաստատվեց 22-րդ միջոցառումը

ՀՀ Կառավարությունն այսօրվա նիստում հաստատեց կորոնավիրուսի տնտեսական հետեւանքների հերթական՝ 22-րդ միջոցառումը։

Հարցը ներկայացրեց աշխատանքի եւ սոցիալական հարցերի նախարար Զարուհի Բաթոյանը՝ նշելով, որ միջոցառման նպատակն է օժանդակել կորոնավիրուսի տարածման հետեւանքով աշխատանքի շուկայում գոյացած դժվարությունների արդյունքում սոցիալական խնդիրների առջեւ կանգնած ՀՀ քաղաքացիներին։  

«Միջոցառման շահառու են ՀՀ այն քաղաքացիները, ֆիզիկական անձինք, որոնք առնվազն 85 օրացույցային օր աշխատանքային պայմանագիր կամ աշխատանքի ընդունման մասին անհատական ակտի հիման վրա աշխատանքային հարաբերությունների մեջ են գտնվել գործատուի հետ 2020 թվականի հունվարի 1-ից մինչեւ մարտի 30-ն ընկած ժամանակահատվածում, սակայն ազատվել են աշխատանքից 2020 թվականի մարտի 31-ից մինչեւ հունիսի 1-ն ընկած ժամանակահատվածում եւ այդ նույն ժամանակահատվածում չեն անցել այլ աշխատանքի»,- ասաց Բաթոյանը։

Նախարարն ընդգծեց, որ ցանկում կան նաեւ բացառություններ, որոնք հիմնականում վերաբերում են վարկային կազմակերպություններին, գրավատներին, ապահովագրական ընկերություններին։

Աջակցությունը տրամադրվում է միանվագ՝ նվազագույն ամսական աշխատավարձի չափով՝ 68 հազար դրամ։

«Աջակցությունից նաեւ չեն կարող օգտվել այն անձինք, ում աշխատանքից ազատվելուն նախորդող 2 ամիսների միջին աշխատավարձի չափը գերազանցել է 500 հազար դրամը, ով 2020 թվականի հունիսի 1-ի դրությամբ աշխատանքային հարաբերությունների մեջ է գտնվել նաեւ այլ գործատուի հետ կամ նույն գործատուի հետ այլ աշխատանքային պայմանագիր է ունեցել, ինչպես նաեւ 2020 թվականի հունիսի 1-ի դրությամբ անհատ ձեռնարկատեր է, բացառությամբ այն անհատ ձեռնարկատերերի, որոնք հաշվառվել են 2020 թվականի հունվարի 1-ից, ում գործունեությունը նույն ամսաթվի դրությամբ ՀՀ հարկային օրենսգրքով նախատեսված կարգով դադարեցված չի եղել։ Այս միջոցառումից նաեւ չեն կարող օգտվել 20-րդ միջոցառման շահառուները»,- ներկայացրեց Բաթոյանը։

Վարչապետ Նիկոլ Փաշինյանն ասաց՝ մի քանի օր առաջ արձանագրել են, որ ՀՀ-ում ապրիլին՝ համատարած սահմանափակումների շրջանում, շուրջ 70 հազար աշխատատեղ փակվել է, մայիսին դրանցից 50 հազարը վերականագնվել կամ բացվել է. «Արդյունքում մենք արձանագրեցինք, որ մոտավորապես 20 հազար քաղաքացիներ կան, որոնք կորոնավիրուսի այս շրջանում աշխատանքը կորցրել են եւ նոր աշխատանք չեն գտել։ Մենք որոշում կայացրինք, որ այդ քաղաքացիներին ցուցաբերենք աջակցություն։ Ընդ որում, մենք հույս ունենք, որ աշխատանքի շուկայի վերականգնման այս պրոցեսը կշարունակվի։ Շատ կարեւոր է այս վիճակագրությունը՝ նաեւ մեր գործողությունների տրամաբանությունը հասկանալու համար»։

Վարչապետն ասաց, որ ապրիլին ընթացիկ հաշիվների ուսումնասիրությամբ արձանագրել են, որ ՀՀ տնտեսությունը գահավիժում էր, եւ դրա համար որոշեցին տնտեսական գործունեության սահմանափակումները վերացնելու ճանապարհով գնալ, ու եթե այդ որոշումը չկայացվեր, գուցե մայիսի արդյունքներով փակված լիներ ոչ թե 70 հազար, այլ 100 կամ 150 հազար աշխատատեղ։

«Այս առումով շատ կարեւորում եմ այն, որ մենք կարողանանք, ի վիճակի կլինենք բոլորով չգնալ լոքդաունի վիճակի։ Դա ցույց է տալիս, որ տասնյակ հազարավոր մարդկանց աշխատատեղեր փակվում են դրանից բխող սոցիալական, տնտեսական եւ այլ հետեւանքներով։ Սա նշանակում է նաեւ, որ կարող է պետական եկամուտների հավաքման առումով խնդիրներն ավելի խորանան, ինչը կնշանակի, որ մենք կարող ենք խնդիրներ ունենալ ամենատարբեր, այդ թվում՝ առողջապահության ոլորտի ֆինանսավորման առումով»,- ասաց վարչապետը՝ հավելելով, որ այսօր այդ խնդիրը չկա։

Նիկոլ Փաշինյանը նշեց, որ աջակցությունը տրամադրվելու է միայն անկանխիկ եղանակով, քանի որ 9-րդ միջոցառման ժամանակ շահառուների թիվը մոտավորապես 180 հազար երեխա էր, ինչը նշանակում է մոտավորապես 100 հազարից ավելի շահառու:

«Այդ մարդկանց մեծ մասը չունի բանկային քարտ, եւ կանխիկով տրամադրվեց բանկային համակարգում։ Այդտեղ էլ կար շատ հստակ խնդիր. ինչ անել՝ այդ մարդկանց աջակցելու համար՝ իմանալով, որ նրանք կարող են հերթ կանգնելու խնդրի առաջ կանգնել, թե ասել՝ քանի որ կորոնավիրուս է, այդ մարդկանց ոչ մի բանով չենք օգնում՝ վարակի տարածման շարժունակունությանը չնպաստելու համար»,- նշեց նա՝ հավելելով, որ, սոցիալական ծանր վիճակը հաշվի առնելով, որոշեցին, որ այդ օգնությունը պետք է ցուցաբերել։

Վարչապետն ընդգծեց՝ քանի որ քաղաքացիները հերթ կանգնելու եւ սոցիալական հեռավորություն պահելու սիրահար չեն, ունեցան համաճարակային իրավիճակի որոշակի վատթարացում։

«Իմիջիայլոց հերթ կանգնելու խնդիրը մինչեւ հիմա որեւէ համակարգում լուծված չէ։ Եթե փոստային բաժանմունքների, բանկերի ներսում լուծված է հարցը, դրսում չի լուծվում։ Նույնիսկ այն պարագայում, երբ գծանշումներ են արվում։ Եթե ակտիվություն է ցուցաբերվում, ֆլեշմոբեր են լինում, 1 օր այդ հարցը լուծվում է, գծանշումներ են հայտնվում, այսինքն՝ երբ որ ցուցադրական մասի պոտենցիալ կա, ամեն ինչ նորմալ է։ Հարյուրավոր ահազանգերից հետո հայտնվում են հազարավոր օրինակներ, թե ինչպես են բոլորը բոլոր տեղերում շատ օրինակելի հերթ կանգնում։ Այդ օրը անցնում է, ակտիվությունը նվազում է, հաջորդ օրվանից մենք ունենում ենք գործնականում նույն վիճակը ամեն օր, ամեն տեղ»,- ասաց Նիկոլ Փաշինյանը։