Հայաստանում սոցիալական եւ տնտեսական վիճակի վատթարացում կա, սակայն սոցիալական ճգնաժամ չկա․ վարչապետ

Վերջին 20 օրում, ըստ էության, մենք ամենօրյա ռեժիմով ունենում ենք կորոնավիրուսի 200-ից պակաս նոր դեպք։ Այս մասին այսօր ՀՀ Կառավարության նիստում հայտարարեց վարչապետ Նիկոլ Փաշինյանը՝ հավելելով, որ սա ընդհանուր առմամբ բարելավում է։

«Բարելավման մեկ այլ ցուցանիշ էլ ունենք. ակտիվ դեպքերի թիվը էականորեն նվազել է, եւ մենք այս պահին 3 հազարից պակաս ակտիվ դեպք ունենք, նաեւ շատ կարեւոր է արձանագրել, որ ամենօրյա թեստերի թիվը աննախադեպ բարձր է, հայտնաբերման դրական տոկոսը՝ ցածր, ինչը համարվում է հայտնաբերելիության մեծ աստիճան»,- ասաց վարչապետը։

Նա ընդգծեց՝ մոտավորապես 5, 6, 7 տոկոսի շրջանակներում են հայտնաբերվում, ինչը միջազգայնորեն համարվում է հայտնաբերման բարձր ցուցանիշ. «Սա շատ կարեւոր է, որովհետեւ երբ մարդն ու իր շրջապատը գիտեն, որ վարակված են կորոնավիրուսով, դա անխուսափելիորեն ազդում է նրանց վարքի վրա, անկախ նրանից ասիմպտոմ են տանում, թե ոչ»։

Փաշինյանի խոսքով՝ առաջիկա ամենամեծ ռիսկը այս դինամիկան խախտելու հանրակրթական դպրոցների բացումն է։ Նա նշեց՝ այս առումով կայացվել են որոշումներ, որոնք միանշանակ չի ընդունում հանրությունը։ Պատճառն այն է, որ կա պահանջ՝ երեխաները դպրոցում պետք է դիմակ դնեն։

«Ես ուզում եմ արձանագրել հետեւյալը. մենք պարտադրված ենք անել քայլեր, որպեսզի թույլ չտանք վերադառնալ համաճարակային նոր ճգնաժամի։ Կան մեկնաբանություններ, որոնք ուղղակի զարմացնում են։ Ես ուզում եմ ասել, որ բոլոր հակահամաճարակային որոշումները, որ ընդունում ենք, առաջին հերթին մենք ինքներս ենք այն պահպանում, մի բան էլ՝ դեռ ավելի։ Այն որոշումները, որ կայացվում են, վերաբերում են ոչ միայն ուրիշների, այլեւ մեր երեխաներին։ Մեր երեխաները ո՛չ դպրոցներում, ո՛չ մանկապարտեզներում, ո՛չ էլ որեւէ այլ տեղ արտոնյալներ չեն»,- ասաց վարչապետը։

Նա հավելեց, որ կգնան այս ճանապարհով, եւ եթե այս միտումը շարունակվի, իրենց նպատակն է կամաց-կամաց դուրս գալ սահմանափակումների ռեժիմից։ Փաշինյանն ասաց, որ կիրականացնեն մոնիթորինգ եւ կկայացնեն համապատասխան անհրաժեշտ որոշումներ, որ երեխաները օր առաջ լիաթոք շնչեն։

«Հաջորդ խնդիրը, որ կապված է նոր տիպի կորոնավիրուսի հետ, հետեւյալն է. աներկբա է, որ համաճարակը էական սոցիալական եւ տնտեսական վնասներ է պատճառել, բայց շատ կարեւոր է գնահատել, թե ինչ աստիճանի են այդ վնասները, որովհետեւ սրա վերաբերյալ ամենատարբեր քննարկումներ կան»,- նշեց վարչապետը։

Նա ասաց, որ տնտեսական անկումների ցուցանիշները հրապարակվում են, հայտնի են, սակայն այստեղ միշտ ունենում եք խնդիր ունենալ ճշգրիտ ինդիկատորներ, թե ինչ սոցիալական վիճակ է տիրում երկրում։

«Հարցը հետեւյալն է. կա՞ն արդյոք ցուցանիշներ, որոնք մեզ կօգնեն հասկանալ, թե ինչ իրավիճակի սոցիալական վատթարացում է տեղի ունեցել երկրում։ Ես կարծում եմ, որ հսկիչ-դրամարկղային կտրոններով առեւտրի շրջանառության մասին տվյալը կարող է այդ մասին վկայել, որովհետեւ խոսքը մարդկանց արած առեւտրի մասին է, որը շատ կոնկրետ գումար է։ Այդ թվերը վերլուծությամբ չեն ստացվում, այլ կոնկրետ արված առեւտրով եւ հսկիչ դրամարկղային կտրոններով»,- նշեց վարչապետը։

Նիկոլ Փաշինյանի խոսքով՝ 2020 թվականի օգոստոս ամսին 2019 թվականի օգոստոս ամսվա համեմատությամբ ՀԴՄ շրջանառությունը նվազել է ընդամենը 2.5 տոկոսով. «Այսինքն՝ խանութներում, ռեստորաններում առեւտուրը նվազել է 2.5 տոկոսով։ Այս թիվը ինքնին պետք է վկայի այն մասին, որ սոցիալական խնդիրներ կան, բայց սոցիալական խնդիրներ եղել են նաեւ 2019-ին։ Մենք սոցիալական կոլապս եւ սոցիալական ճգնաժամ չունենք միանշանակ»։

Վարչապետն ասաց, որ այստեղ կարող է փաստարկ հնչել, թե տեսեք՝ առեւտրի շրջանառությունը 2.5 տոկոսով նվազել է, բայց այստեղ են մարդիկ, որոնք նախորդ տարի Հայաստանում չէին, արտագնա աշխատանքի էին մեկնել. «Բայց մյուս կողմից այստեղ չեն զբոսաշրջիկները, որոնք ակնհայտորեն ՀՀ-ում գտնվելիս շատ ավելի էին ծախսում, քան տեղացիները բոլոր պարագաներում։ Չեն աշխատում թատրոնները, կինոթատրոնները, թանգարանները, Երեւանի հյուրանոցները դատարկ են։ Ըստ էության՝ մինչեւ օգոստոսի կեսը հարսանիքների կարող էին մասնակցել մինչեւ 20 հոգի, էլ չեմ ասում, որ ՀԴՄ կարգապահությունը, համավարակով պայմանավորված, ամենաբարձր մակարդակում չէ»։

Նրա խոսքով՝ այս թվերը աներկբայորեն ցույց են տալիս, որ Հայաստանում չկա սոցիալական ճգնաժամ։

«Իհարկե, սոցիալական եւ տնտեսական վիճակի վատթարացում կա, դա ակնհայտ է, ու մենք աճը կորցրել ենք։ Հակաճգնաժամային միջոցառումների շրջանում տնտեսություն ամենատարբեր միջոցներով ներարկվել է 163.4 մլրդ դրամ։ Շատ կարեւոր է արձանագրել, որ այս միջոցառումների մեջ առանձնակի տեղ են զբաղեցնում աշխատատեղերի պահպանմանն ուղղված միջոցառումները։ Որպես արդյունք՝ մենք կարող ենք արձանագրել, որ 2020 թվականի հուլիսին հանրապետությունում առկա է 613 հազար 62 վճարվող աշխատատեղ, 2019-ի համեմատությամբ դա ավելի է 6597 աշխատատեղով»,- ասաց վարչապետը։

Նա հավելեց, որ 2020 թվականի հուլիսին ավելի շատ գրանցված աշխատատեղ ունենք, քան նախորդ տարվա նույն ամսին. «Ընդ որում, աշխատավարձերի ֆոնդերն այս տարի 9 մլրդ 765 մլն դրամով ավելի են, քան 2019-ին։ Պետք է հուսալ, որ օգոստոսի այս ցուցանիշներն ավելին կլինեն»։