Հայաստանի ներդրումային քաղաքականությունը պետք է արմատական փոփոխությունների ենթարկվի. Քերոբյան

Հայաստանի ներդրումային քաղաքականությունը պետք է արմատական փոփոխությունների ենթարկվի։ «Հայկական ժամանակ»-ի հետ զրույցում այսպիսի տեսակետ հայտնեց գործարար,«Մենյու էյէմ» ընկերության հիմնադիր Վահան Քերոբյանը։

Նոյեմբերի 23-ից ՀՀ վարչապետ Նիկոլ Փաշինյանը հանդիպումների շարք է սկսել գործարար դաշտի ներկայացուցիչների հետ՝ Հայաստանի տնտեսական ակտիվության, ներդրումային միջավայրի վերականգման հարցեր քննարկելու համար:

Վարչապետը հանդիպել էր մի շարք գործարարների հետ, այդ թվում՝ Վահան Քերոբյանի։

Քննարկվել են Կառավարություն-գործարար միջավայր կապի ամրապնդումը, ներդրումային ծրագրերի շարունակականության ապահովումը, տնտեսական լավատեսության վերականգնումը: Ըստ Կառավարության հաղորդագրության՝ ձեռք են բերվել կոնկրետ պայմանավորվածություններ:

ՀՀ վարչապետի հետ հանդիպման եւ տնտեսությանը վերաբերող այլ հարցերի վերաբերյալ ՀԺ-ն զրուցել է Վահան Քերոբյանի հետ։

- Պարո՛ն Քերոբյան, ի՞նչ հարցեր եք քննարկել վարչապետի հետ հանդիպման ընթացքում։

- Քննարկել ենք բիզնեսի ակտիվության հետ կապված հարցեր, բայց շատ մանրամասն չեմ կարող ասել։

- Այս պահին պետությունն ի՞նչ է ակնկալում գործարար համայնքից եւ հակառակը՝ գործարար համայնքն ի՞նչ է սպասում պետությունից։

- Եկեք խոսենք նրանից, թե ինչ է սպասում ազգը։ Իսկ ազգը սպասում է, որպեսզի շուտ վերականգնվի տնտեսական ակտիվությունը եւ մենք կարողանանք օր առաջ սկսել մեր տնտեսության ակտիվացումը։ Որովհետեւ գիտեք՝ տնտեսությունը վիրավոր վիճակում է եւ կարիք կա շուտ անցնել արագ աճի ռեժիմին, որովհետեւ մարտահրավերները մեր երկրի համար ոչ թե քչացել, այլ շատացել են։

- Դուք, լինելով սննդի ոլորտի ներկայացուցիչ՝ տեղյակ եք, որ այս տնտեսական ճգնաժամը էապես ազդել է հենց այդ ոլորտի վրա, դրա վերականգնման համար ինչ-որ քայլերի անհրաժեշտություն տեսնո՞ւմ եք։

- Ամեն ինչի վերականգնման համար էլ շատ կոնկրետ եւ շատ արագ քայլերի անհրաժեշտություն կա։ Ինչ վերաբերում է հենց իմ բիզնեսին, այն առանձնապես չի տուժել, որովհետեւ օնլայն առեւտուրը աճում է այս ժամանակաշրջանում։ Բայց քննարկման ժամանակ խոսքը վերաբերում էր ոչ միայն իմ բիզնեսին։ Մտքերի փոխանակում էր ամբողջ Հայաստանի տնտեսության մասին։

- Դուք որպես խոշոր գործարա՞ր, թե՞ սննդի ոլորտի ներկայացուցիչ էիք հանդիպել վարչապետի հետ։

- Ես ավելի շատ որպես տեղեկացված գործարար եմ մասնակցել։ Ես 2 ամիս առաջնագծում եմ եղել, բայց իմ ծանոթություններն ու կապերը թույլ են տալիս, որ կարողանամ ընդհանուր մտքերի առումով կոմպետենտ գաղափարներ հնչեցնել։

- Հանդիպումը որքանո՞վ էր արդյունավետ։ Կա՞ն արդեն պայմանավորվածություններ։

- Կոնկրետ պայմանավորվածություններ ինձ հետ չի եղել, բայց  հանդիպման մյուս մասնակիցների հետ խոսել եմ՝ իրենց հետ եղել են կոնկրետ պայմանավորվածություններ։ Ես այդպիսի խնդիր չեմ ունեցել, որ կոնկրետ ինչ-որ բանի շուրջ տեղում պայմանավորվեմ։

- Քանի որ պետությունը միշտ խոսում է արտադրությունը զարկ տալու մասին, ճգնաժամային իրավիճակից՝ արտադրության միջոցով դուրս գալու նախադրյալներ տեսնո՞ւմ եք։

- Խնդիրը հիմնականում այն է, որ պետք է ներդրումային քաղաքականությունն այնպիսի արմատական փոփոխությունների ենթարկվի, որ մենք կարողանանք կտրուկ մեծացնել մեր երկիր եկող ուղիղ եւ անուղղակի ներդրումների ծավալները՝ դրսից եւ ներսից։ Պետք է ստեղծված ճգնաժամային իրավիճակում ամբողջությամբ կապանքներից ազատենք բոլոր հնարավոր ներդրողների աղբյուրները, որովհետեւ դա ամենակարեւոր քայլերից մեկն է տնտեսությունն աշխուժացնելու ու բարձր աճի տեմպերի վրա դնելու համար։

- Այսինքն, պետք է տնտեսությունն ամբողջությամբ բացե՞լ ներդրողների առաջ։

- Տնտեսությունն իրականում բաց է ներդրողների առաջ, բայց փաստացի արգելքներն այնքան շատ են՝ հիմնականում բյուրոկրատական, իրավական եւ այլն, որ դե ֆակտո մենք արդեն 2 տարի է ականատես ենք լինում այն երեւույթին, որ Հայաստան, կարելի է ասել, ներդրումներ չեն գալիս։

- Հեղափոխությունից հետո շատ էր խոսվում, որ ներդրողների համար բաց է Հայաստանը, այդ դեպքում ինչո՞ւ է խնդիր առաջանում, ըստ ձեզ։ 

- Մի խնդիր չէ, խնդիրների բույլ կա, մենք գործ ունենք թե՛ դատական համակարգի, թե՛ մարդկային կապիտալի հետ։ Ամբողջ սեկտորը խնդիր է։ Այդ խնդիրների հետ պետք է աշխատել եւ ներդրողներին վստահեցնել, որ Հայաստանում ներդրումներ անելը նշանակում է շահույթով գործողություն կատարել եւ ոչ թե գալ ու բախվել տարբեր պատնեշների։

- Եթե մի կողմ թողնենք այդ բյուրոկրատական քաշքշուկները, Հայաստանում եղավ կորոնավիրուս՝ արտակարգ դրություն, ռազմական դրություն, եւ բիզնեսների համար խնդիրներ առաջացավ։ Արդյո՞ք ներդրողների համար ռիսկային չի համարվում Հայաստանը, թե՞ հնարավոր է այնպիսի պայմաններ առաջարկել, որ ցանկանան այստեղ ներդրում անել։

- Այնպես չէ, թե ամբողջ աշխարհում նման բաներ չկան։ Պարզապես պետք է ներդրողներին վստահեցնել, որ Հայաստանում գումար աշխատել հնարավոր է։

- Վարչապետի հետ նորից հանդիպումներ սպասվո՞ւմ են։

- Չեմ կարող ասել, բայց ես հասկացա, որ հիմա տնտեսական օրակարգը վարչապետի առաջնահերթությունների մեջ է մտնում, որովհետեւ առանց դրա մենք չենք վերականգնի ոչ միայն մեր կորցրածը, այլ նաեւ հնարավոր է կանգնենք ավելի մեծ խնդիրների առաջ։ Գիտեք, որ այսօր մենք խնդիրների առաջ ենք կանգնած, հետհաշվարկ է գնում, 5 տարվա պայմանագիր ենք ստորագրել եւ 5 տարի հետո հաստատ ուժերը չափելու, տնտեսական եւ ռազմական հզորությունները համեմատելու առիթներ լինելու են։ Մենք պետք է օր առաջ պատրաստվենք դրան եւ դա ցանկացած մարդու, բիզնեսմենի գործն է, ոչ միայն վարչապետի։

- Այս առումով պետությունը կամ բիզնեսը 5 տարվա ռազմավարությո՞ւն պետք է կազմի, թե՞ ավելի երկար կամ կարճ։

- Ամենաշատը 5 տարվա։ Ըստ իս, ցանկացած մարդ պետք է իր առջեւ դնի 3 տարվա ճանապարհային քարտեզ, թե ինչպես պետք է հասնել դրան, որ մենք ընդհանուր առմամբ ունենանք ուրիշ երկիր, որը կարողանա տարածաշրջանային եւ համաշխարհային մարտահրավերներին արժանապատիվ ձեւով դիմագրավել։

- Պարոն Քերոբյա՛ն, լինելով բիզնեսի ներկայացուցիչ, ի՞նչ կարծիք ունեք, այս ճգնաժամային իրավիճակներում բիզնեսն ինչպե՞ս դրսեւորեց իրեն։

- Ես վերջին 2 ամիսը զինվոր եմ եղել. ոչ թե բիզնեսմեն եւ չեմ կարող այդ հարցին պատասխանել։

Հ. Գ. Վահան Քերոբյանի հետ ՀԺ-ի հարցազրույցից հետո մամուլում տեղեկություն տարածվեց, որ նա կնշանակվի ՀՀ էկոնոմիկայի նախարար։