Հանրահավաքի մասնակիցների թիվը գնալով նվազում է, բռնի գործողությունների ակնարկներինը՝ աճում․ Մանուկյանը՝ ջարդող, փչացնող

Հայրենիքի փրկության շարժում անվանված 17 կուսակցությունների ֆորմատի ստեղծումից հետո առաջին անգամ Վազգեն Մանուկյանը երեկ առանձին հանրահավաք էր հրավիրել:

Սա հետաքրքրական էր մամուլի այն հրապարակումների ֆոնին, ըստ որոնց՝ այդ շարժումն արդեն պառակտվել է՝ դրա հետեւում կանգնած Ռոբերտ Քոչարյանի ու Սերժ Սարգսյանի տարաձայնությունների պատճառով:

Հիշեցնենք, որ թեեւ այս շարժումը դեմ էր արտահերթ ընտրություններին, սակայն Քոչարյանը վերջերս հայտարարեց՝ պատրաստվում է մասնակցել դրանց եւ հաղթել: Քաղաքագետները վստահեցրին՝ սա այս շարժման շրջանակներում Հայաստանի նախագահի պաշտոնը զբաղեցրած երկու անձանց ամենաակնհայտ տարաձայնությունն էր:

Հանրահավաքի մեկնարկին Մանուկյանը վստահեցրեց, շարժումը չի պառակտվել, փետրվարի 20-ի համատեղ մեծ հանրահավաքը ուժի մեջ է, այսօր ուղղակի հանդիպում էր կազմակերպել իր աջակիցների հետ՝ խոսելու պատահաբար պարզված «գաղտնի ստորագրված» փաստաթղթի մասին:

Խոսքը օրերս համացանցում հայտնված 6 կետանոց տեքստի մասին է, որն, ըստ այն տարածողների, վերաբերում է Արցախի ու Սյունիքի տարածքներին եւ ստորագրվել է Հայաստանի ու Ադրբեջանի միջեւ: Հրապարակված տեքստում, հիշեցնենք, ստորագրություն չկար:

Մանուկյանը իր ամբողջ ելույթը կառուցեց հենց այդ «փաստաթղթի» վրա՝ բոլորին վստահեցնելով, որ շատ օրհասական է իրավիճակը, «մեր հայրենիքը մեր աչքի առջեւ կործանում են մինչեւ վերջ»:

Սա ընդունելով որպես հաստատված հիմք՝ ընդդիմադիր գործիչը շարունակեց բռնության ակնարկները: Հիշեցնենք, որ նախկին ելույթներում Մանուկյանը խոսել էր ապստամբության անհրաժեշտության մասին:

Երեկ նա վերահաստատեցայդ գաղափարը. «Ես իմ կողմից միշտ էլ կխրախուսեմ ապստամբությունը: Ցանկացած միջոց, որ ֆիզիկական միջոցների չի դիմում մարդկանց նկատմամբ, բայց նպաստում է իշխանություններից ազատելուն, ես կխրախուսեմ»,- ասաց նա:

Ապա հայտարարեց՝ Նիկոլ Փաշինյանը ինքնակամ չի հեռանալու իշխանությունից, ուստի «պետք է կոտրենք իր ոտքերը, իր հենարանները»:

Ըստ Մանուկյանի՝ իրական հենարանը Ազգային ժողովի «Իմ քայլը» խմբակցությունն է: «Բոլորի վրա պետք է աշխատել: Իրենք ռիսկ պիտի չունենան դուրս գալ փողոց, որովհետեւ իրենք նպաստում են դավաճանությանը: Այն «Իմ քայլ»-ի պատգամավորը, որը դուրս չի գալիս խմբակցությունից, համարենք դավաճան: Մենք ասում ենք՝ մեր ոստիկանությունը, մեր ոստիկանությունը: Դուք տեսնում էի՞ք՝ ոնց էին ջարդում ժողովրդին: Խոսքը գնում է ոչ թե շարքային ոստիկանների մասին, ովքեր կարգադրություններ են կատարում, խոսքը գնում է նրանց ղեկավարների մասին: Բոլոր այն բարձրաստիճան զինվորականները, ոստիկանները, որոնք ծառայում են Նիկոլ Փաշինյանին, դավաճան են: Ու ժողովուրդը պիտի իրենց թույլ չտա փողոց դուրս գալ, իրենք պիտի վախենան փողոցով գնալ, իրենք պիտի վախենան սրճարան մտնել, ռեստորան մտնել»,- ասաց նա:

Շարունակելով հենարանների թեման՝ նա նկատեց՝ կան մարդիկ, ովքեր դրսից են սնվում եւ նպաստել են Նիկոլ Փաշինյանի իշխանության գալուն: «Մենք կհրապարակենք անունները, այդ մարդիկ իրավունք չունեն փողոցով քայլելու»:

ՀՀ վարչապետի չորրորդ հենարանը, պարզվեց, «ծախուներն են»: «Նրանք փողի համար, արտոնություն ստանալու…երբ մենք Գյումրի էինք եկել, գնացել, փակել էին փողոցը, ես էլ բոմժ ասեցի, հետո ներողություն խնդրեցի բոմժերից: Դա այն տականքն է, որը ծառայում է ցանկացած իշխանությանը՝ իրեն ծախելով: Ագրեսիա են ցուցաբերում, նույն ագրեսիան՝ իրենց դեմ, ով ձեռք բարձրացնի մեր վրա, հարված պիտի ստանա: Ատելության դեմ՝ ատելություն, ագրեսիայի դեմ՝ ագրեսիա: Դա է մեր ճանապարհը»,- հավելեց նախկին վարչապետը:

Առանց մանրամասնելու, թե ինչ նկատի ունի՝ Մանուկյանը առաջարկեց թաղերում, բակերում ջոկատներ կազմել՝ որպես կենտրոն ընդունելով Ազատության հրապարակը:

«Մի խումբը կգա, կգնա մի պատգամավորի ետեւից, մյուս խումբը կգնա մի ոստիկանի ետեւից, բայց սա կլինի մեր կենտրոնը»,- ասաց նա:

Պետք է փչացնել Ազգային ժողովի «Իմ քայլը» խմբակցությունը եւ բարձրաստիճան ոստիկաններին, որոնք Փաշինյանի հենարանն են. լրագրողների հետ հարցուպատասխանի ժամանակ հայտարարեց նա, սակայն վայրկյաններ անց հրաժարվեց իր այդ խոսքից:

Հարցին` փչացնել ասելով ի՞նչ նկատի ունի, Մանուկյանն արձագանքեց. «Փչացնել բառը ես չասացի, մի վերագրեք ինձ բառեր, որը չեմ ասել»:

Վազգեն Մանուկյանը վերահաստատեց՝ Փաշինյանի վարչապետության օրոք ընտրությունների չի մասնակցի.

«Մեր ծրագիրը մնաց նույնը՝ համաժողովրդական շարժումով իրեն փոխել: Նիկոլ Փաշինյանը եթե փոխվի, ժամանակավոր իշխանություն լինի, ես կլինեմ վարչապետ, ես հայտարարել եմ, որ դրանից հետո ընտրություններին չեմ մասնակցի: Եթե Փաշինյանը հայտարարեր ընտրություններ եւ իրեն հաջողվեր անցկացնել, որը ես անհնարին եմ համարում, նույնիսկ այդ դեպքում ես հայտարարել եմ, որ չեմ մասնակցի»,- ընդգծեց հայրենիքի փրկության շարժման վարչապետի թեկնածուն:

Լրագրողները փորձեցին պարզել նաեւ, թե վարչապետ ընտրվելու պարագայում պատրաստվո՞ւմ է հրաժարվել նոյեմբերի 9-ի զինադադարի հայտարարությունից: «Միանգամից՝ ոչ»,- պատասխանեց նա:

Հանրահավաքի ընթացքում փորձեցինք զրուցել մի շարք քաղաքացիների հետ: Հավաքված բազմությունը քիչ էր (ըստ Իրազեկ քաղաքացիների միավորման կատարած հաշվարկի՝ 1800 մարդ), Ազատության հրապարակում հնարավոր էր ազատ շրջել, եւ հավաքի եկածների մի մեծ մասն ուղղակի անտարբեր քայլում էր:

Հարցին, թե ի՞նչն է պատճառը, որ մարդիկ չեն գալիս Մանուկյանի հավաքներին՝ արձակագիր Բակուր Կարապետյանն ասաց. «Ուղղակի մարդիկ սպասում են երրորդ ուժին, երրորդ հարթակին: Այն մարդիկ, որոնք անցյալ չեն կամ իշխանության հետ չեն: Նոր, թարմ ուժեր են պետք, որին պետք է հավատան մարդիկ»:

Հարցին՝ Վազգեն Մանուկյանին հավատալո՞վ եք եկել, թե՞ չհավատալով, Կարապետյանը պատասխանեց. «Վազգեն Մանուկյանն ինձ օտար չի, ընկեր է, ես իրեն վաղուց գիտեմ, հավատում եմ, բայց իմ հավատալը չի խնդիրը, ժողովուրդը պետք է հավատա: Երեւի թարմ ուժեր են պետք, ստեղծվում են դրանք»:

Արձակագիրը հավատի բացակայության պատճառ համարեց այն, որ Մանուկյանի վարչապետ եղած տարիների հետ կապված մարդկանց հիշողությունը դրական չի:

Մեկ այլ քաղաքացի սակայն, նկատեց՝ հուսադրված է Մանուկյանի առաջին քայլից: Նա, ըստ այդ քաղաքացու, հանրահավաք է հրավիրել առանց այս ու այն կողմ ընկնելու: Մյուսներն, ասում է, անիմաստ հետաձգում են. «Առաջին քայլը, Վազգեն Մանուկյանի, մի փոքր հուսադրող է, էսօրվա գործը վաղվան չի թողնում, թե չէ կազմակերպենք 20-ին, 30-ին, 40-ին, մինչեւ հայրենիքը փրկեն, փրկելու ոչինչ չի մնա»,- մտավախություն հայտնեց նա:

Տեր Եսայի քահանա Արթենյանին էլ Ազատության հրապարակ էր բերել մտահոգությունը, որ բախումներ չլինեն։ «Նաեւ մասնակից ենք, իհարկե, նաեւ հետաքրքիր է, թե ինչ հայտարարություն պիտի լինի»,- ասաց քահանան՝ հավելելով, որ մտահոգված է երկրում առկա իրավիճակով՝ գերիների, անհետ կորածների խնդրով։ 

Տեր Եսային չէր հիշում, թե վերջին անգամ երբ է հանրահավաքի մասնակցել, բայց վստահ էր, որ դա 17 կուսակցությունների հրավիրած հանրահավաքն էր։ Ազատության հրապարակ եկած քահանան վստահեցրեց՝ իր այդտեղ գտնվելը կապ չունի այն հանգամանքի հետ, որ ծառայում է Հայրենիքի փրկության շարժման աջակիցներից Նարեկ Մալյանի հոր՝ Տեր Պետրոսի հետ։

Հ.Գ. Մանուկյանի՝ բռնության կոչեր պարունակող խոսքին երեկ արձագանքեց Արմավիրի քաղաքապետ Դավիթ Խուդաթյանը։

«Վազգեն Մանուկյանին ասեք խելք հավաքի: Հայաստանում ոչ մի ջոկատ չի կազմվի ներհայաստանյան ինչ-որ հարցեր լուծելու համար, Հայաստանում բարիկադներ չեն կառուցվի. եթե էդ տարիքում գոնե սա չի հասկացել, ուրեմն հեչ լավ չի»,-ֆեյսբուքյան իր էջում գրել էր նա: