Տարածությամբ հեռու, սրտով մոտ. Գյումրիում էր ՀՀ-ում Ճապոնիայի արտակարգ և լիազոր դեսպան Ջուն Յամադան

«Ողջունում եմ Շիրակի մարզի լավ բարեկամին: Պարոն Յամադա, ուրախ ենք ձեզ Շիրակում հյուրընկալելու համար». Շիրակի մարզպետ Հովհաննես Հարությունյանն այս խոսքերով դիմավորեց մարզպետարան ժամանած ՀՀ-ում Ճապոնիայի արտակարգ և լիազոր դեսպան Ջուն Յամադային:

Դեսպանն ասաց՝ մարզպետը չի սխալվում: Ինքն իսկապես Շիրակի մարզի բարեկամն է: Արդեն հասցրել է շատ սիրել Գյումրու յուրատիպ ճարտարապետություն ու մշակութային մարզը: Մարզպետարանում կողմերը կարևորեցին դեսպանության կողմից մարզում իրականացվող ծրագրերն ու սոցիալական, էներգաարդյունավետության բարձրացմանն ուղղված նախաձեռնությունները:  Առաջիկայում նոր ծրագրերի իրականացմամբ հնարավորինս կամրապնդվեն զբոսաշրջային, սոցիալական ու մշակութային կապերը:

Հերթն այնուհետ Գյումրու քաղաքապետ Սամվել Բալասանյանինն էր: Ջուն Յամադան քաղաքապետարանում քննարկեց վերջին տարիներին Գյումրիում իրականացված և այս պահին ընթացքի մեջ գտնվող ծրագրերը: Զբոսաշրջության ոլորտում ունեցած ակտիվության, այս ոլորտի վրա համավարակի ունեցած բացասական ազդեցության և մի շարք այլ հարցերի մասին ևս խոսեցին քաղաքապետն ու դեսպանը:

Ջուն Յամադային այնուհետ Սամվել Բալասանյանը հրավիրեց  Գյումրու պատմության թանգարան: Դեսպանը մինչ այս ինչ լսել էր Գյումրու մասին, տեսավ ու նաև շոշափեց՝ ցուցանմուշներ, պատմական փաստաթղթեր, հայտնի մարդկանց պատկանած իրեր ու առարկաներ:

Հայկական Կարիտասի Գյումրու մասնաճյուղի տարեցների ցերեկային խնամքի կենտրոնում ՀՀ-ում Ճապոնիայի արտակարգ և լիազոր դեսպան Ջուն Յամադան մասնակցեց «Գյումրիի եւ Տաշիրի տարեցների ցերեկային խնամքի կենտրոնների վերանորոգման աշխատանքներ» ծրագրի պաշտոնական փակման արարողությունը:

Այստեղ դեսպանին անակնկալ էր սպասում: Բրդյա տաք գուլպաներ ու գլխարկ՝ գործված կենտրոնի շահառու տատիկի ձեռքով:

Եւս մեկ կարևոր ծրագիր էլ դեսպանը փակեց Շիրակի թեմի սոցիալ-կրթական կենտրոնում: Կենտրոնի կառավարիչ Կարինե Գյադուկյանը ներկաներին ողջունելով ասաց՝ ավարտում են կենտրոնի համար շատ կարևոր «Մասնագիտական ուսուցումներ Շիրակի մարզի գործազուրկների համար» ծրագիրը, որն իրականացվել է 2019-2020թթ՝ Ճապոնիայի կառավարության և դեսպանության միջոցով: Ծրագրի նպատակն է եղել նպաստել Շիրակի մարզի և Գյումրու առավել խոցելի ընտանիքների գործազուրկ կանանց և տղամարդկանց հնարավորությունների և ներուժի զարգացմանը՝ մասնագիտական և արհեստագործական դասընթացների անցկացման և զբաղվածության ապահովման միջոցով:     

26.923 ԱՄՆ դոլար արժողությամբ դրամաշնորհային ծրագրի շրջանակներում վերանորոգվել, ժամանակակից տեխնիկայով և սարքավորումներով կահավորվել են կենտրոնի դիմահարդարման, վարսահարդարման, մատնահարդարման, թխվածքների պատրաստման և ձևավորման, խոհարարության դասընթացների համար նախատեսված տարածքները:

«Բացի մասնագիտական ուսուցումից այստեղ նաև հնարավորություն կա ծանոթանալ նորագույն ու ժամանակակից տեխնիկային, դրանց կիրառմանն ու հնարավորություններին: Սա ոչ պակաս կարևոր հանգամանք է աշխատաշուկայում մրցունակ լինելու համար: Ձեռքերս պահում ենք աշխատաշուկայի զարկերակին՝ Զբաղվածության Գյումրու կենտրոնի աջակցությամբ, որպեսզի արագ նկատենք, թե աշխատաշուկան ինչ մասնագետի պահանջ ունի: Սա մեզ օգնում է նպատակային աշխատանքի և հաջողության հասնելու գործում»,- դեսպանին ասաց Սոցիալ-կրթական կետրոնի կառավարիչը:

Մեզնից շատ հեռու, բայց սրտով մեզ անչափ մոտ: Ճապոնիայի ժողվրդին ու դեսպանին ողջունեց Շիրակի թեմի առաջնորդ Միքայել արքեպիսկոպոս Աջապահյանն ու շնորհակալություն հայտնեց Սոցիալ-կրթական կենտրոնում իրականացված ծրագրի համար:

«Ի տարբերություն ընդհանուր մտածողության, ես ուրախ եմ  մի բանի համար, որ օրեցօր, տարեցտարի իմ մասնակցությունը, իմ հսկողությունը սոցիալ-կրթական կենտրոնում նվազում է, և աշխատակազմին ինքն է նախաձեռնում և իրականացնում: Եվ նույնիսկ այս ծանր օրերին նման ձեռնարկի մասնակիցն են դառնում: Շնորհակալություն նորին գերազանցություն դեսպանին, որ ինքն էլ իր լուման ու ներդրումն ունեցավ այս գործում: Որախ եմ, որ այս ճապոնական անկյունն ունեցանք մեր կենտրոնում: Տա Աստված, որ մենք էլ այնքան ուժեղանանք ու հզորանանք, որ կարողանանք այլ երկրների օգնել»,-ասաց Միքայել արքեպիսկոպոս Աջապահյանը:

Ջուն Յամադան նշեց, որ այս ծրագրի փակմանը մեծ ուրախությամբ է մասնակցում: «Ճապոնիան բարձր է գնահատում ենթակառուցվածքների բարելավումը տնտեսական աճի և զարգացման համար: Այս օժանդակությունը մեր շարունակական քայլերից մեկն է առաջնային մակարդակում աշխարհը զարգացման ավելի կայուն ուղու վրա դնելու համար: Ուրախ եմ Գյումրիում այս կենտրոնը տեսնելուս համար, սա շատերին հնարավորություն կտա մասնագիտություն ունենալ, կապահովվի նրանց սոցիալական ներգրավվածությունը: Երկրի սոցիալ-տնտեսական առաջընթացի գրավականը հենց մասնագիտական կրթությունն է»,-վստահ հայտարարեց դեսպանն ու շնորհակալություն հայտնեց հաջողությամբ իրականացված ծրագրի համար:

Հուշանվեր՝ դեսպանին և տորթ՝ բոլորին: Մինչ հյուրերը շրջում էին կենտրոնում, հենց տեղում թխվեց հայ-ճապոնական բարեկամությունը խորհրդանշող տորթը:

Այն կտրելու պատիվը տրվեց դեսպանին ու սրբազանին, հյուրասիրության ոչ պակաս գործը՝ տորթը թխած մասնագետին: