Գերիների հարցը ժամանակի խնդիր է. Նիկոլ Փաշինյանն Արմավիրում ներկայացրեց իրենց հետագա քայլերը (տեսանյութ)

ՀՀ վարչապետի պաշտոնակատար Նիկոլ Փաշինյանը նախընտրական քարոզարշավի շրջանակներում ՔՊ կուսակցության անդամների հետ այսօր Արմավիրի մարզում էր: Այցն ամփոփվեց Արմավիրի մարզկենտրոնում՝ Արմավիր քաղաքում:

Քաղաքացիներին ողջունելուց հետո, Արմավիրում ՀՀ տարածքային կառավարման և ենթակառուցվածքների նախարարի պաշտոնակատար Սուրեն Պապիկյանը խնդրեց մեկ րոպե լռությամբ հարգել պատերազմի նահատակների հիշատակը, այնուհետ նշեց, որ Հայաստանի ժողովուրդը թեև վիրավոր, բայց միասնական պիտի կերտի երեխաների ապագան:

ՀՀ ԱԺ փոխխոսնակ Ալեն Սիմոնյանն էլ նշեց, որ ինքն Արմավիրի հետ քացր հիշողություններ ու պատմություն ունի, որովհետև ծառայել է 2 տարի այնտեղ: Նա նշեց, որ իր ծառայության տարիներին ծառի տակ թաքուն ծնողները ուտելիք են բերել իրենց զինվոր որդիների համար, սակայն այսօր ծաղրում են ներկա իշխանություններին՝ ասելով, թե բանակը ելակով չեն պահում:

Ազգային ժողովի «Իմ քայլը» խմբակցության ղեկավար Լիլիթ Մակունցը հայտնեց, որ հուսով է՝ հունիսի 20-ին կկատարի ընտրություն՝ իր խղճին հավատարիմ մնալով:

ՀՀ ԱԺ «Իմ քայլը» խմբակցության պատգամավոր Հայկ Կոնջորյանն իր խոսքում նշեց, որ պատերազմից առաջ Արցախի ամբողջ բնակչությունը կազմում էր 150 հազար մարդ, ինչը նշանակում է, որ Արցախից հեռացել է 4 անգամ Արցախ: Այս պարագայում, ըստ պատգամավորի, նախորդ իշխանություններն իրավունք չունեն խոսել Արցախի մասին, ու նաև որովհետև Հայաստանից արտագաղթը ահռելի չափերի է եղել:

Գերագույն խորհրդի նախկին պատգամավոր Վիգեն Խաչատրյանն էլ դիմելով Արմավիրի բնակչությանը նշեց, որ օրվա խորհուրդը ստիպում է լինել չափազանց անկեղծ: Նա նշեց, որ բարոյականությունն այն է, երբ օրենքի առաջ հավասար են բոլորը, սակայն տարիներ շարունակ այդպես չի եղել, դա եղել է Հայաստանի առաջին Հանրապետության սխալը: Այժմ պետք է ըստ գործչի, ընտրել իշխանություն, որը սպասարկում է ժողովրդին ու բարոյականության կրողն է:

Ելույթները եզրափակեց ՀՀ վարչապետի պաշտոնակատար Նիկոլ Փաշինյանը:

Նա հայտարարեց, որ ՀՀ քաղաքացիներն այսօր նորից ու նորից պատմություն են կերտելու, որովհետև քաղաքացիներն են երկրի ողնաշարը:

Նա նշեց, որ մի քանի քայլեր կան ու թվարկեց դրանք.

«Քայլ 1. Առաջին հերթին մենք պետք է հաղթահարենք ներքաղաքական ճգնաժամը՝ հունիսի 20-ին ընտրության գնալով: Մենք այս ընտրությունները նախաձեռնել ենք հենց այդ նպատակով, սակայն ոմանք կարծում են՝ ճգնաժամը խորանալու է: Մեր խնդիրն ընտրություններում ուղղակի հաղթելը չէ, այլ այնպես անելը, որ բոլոր այն մարդիկ, ովքեր հույս ունեն Հայաստանը դարձնել ներքաղաքական բախումների թատերաբեմ, բոլորն ընտրությունների արդյունքներով վեր ընկնեն տեղները:

Հայաստանի ժողովուրդը ցույց տվեց, որ ոչ է ասում Քոչարյանասերժական քյաբաբանոցին և այս ընտրություններում ՀՀ քաղաքացին այո՛ պետք է ասի ապագային: Մեզ պետք է առնվազն 60 տոկոս քաղաքացիական կամարտահայտություն: Ես ուզում եմ հավատալ, որ ՀՀ քաղաքացին կասի իր վճռական խոսքն ու մեր թավշե մանդատը կփոխարինի երկաթե մանդատով:

Քայլ 2. Մենք ամբողջովին կլծվենք մեր սահմանների անմատչելիության գործին: Հայաստանի թե՛ ներսում, թե՛ դրսում կան ուժեր, որոնք կրկին ցանկանում էին Հայաստանը ներքաշել պատերազմի մեջ:

Մենք միջազգային մանդատի ներքո պետք է իրականացնենք մեր սահմանների ճշգրտում:

Մենք պատերազմը վարել ենք այնքան ժամանակ, ինչքան կարողացել ենք և կանգնեցրել ենք այն պահին, երբ հասկացել ենք, որ այն մեզ համար կարող է կործանարար լինել:

Մենք պարտվել ենք այնպես, ինչպես պարտվել ենք Ավարայրի ճակատամարտում: Մենք թույլ չենք տա մեր սրբազան պայքարը պղծել, մեր նահատակների արյունը պղծել:

Քայլ 3. Մենք պետք է լուծենք մեր գերիների վերադարձի հարցը: Ես ասել եմ, որ դա ժամանակի հարց է, որովհետև միջազգային հանրությունն աներկբա պահանջում է գերիների վերադարձը: Այս հարցն այսքան ձգձգվեց, որովհետև Հայաստանի ներսում եւ դրսում ոմանք հույս ունեին ներքին բախումներ հրահրել այդ և մի քանի այլ թեմաներով, բայց դա նրանց չի հաջողվի: Մենք այդ հարցը կլուծենք, երբ ցույց տանք, որ մեզ բախումներ ու իրենց օգտին լուծումներ չեն կարող պարտադրել: Այ սրա օգտին պետք է քվեարկեք հունիսի 20-ին: Մենք պետք է նաև վերականգնենք բանակն ու ձևավորենք գրագետ բանակ:

Քայլ 4. Նախ և առաջ, մենք պետք է ուղղենք մեր տնտեսական վիճակը: Տնտեսությունը սկսել է վերականգնվել: Հայ ժողովուրդը բնազդաբար կամ մտածված հասկանում է, որ ամենօրյա աշխատանքով պետք է արդյունք ստեղծենք՝ այն ծառայեցնելով մեր երկրի շահերին:

Պետք է շարունակենք դպրոցների ու մանկապարտեզների զանգվածային շինարարությունը:

Հաջորդ քայլով մենք պետք է հարստացնենք մեր ջրամբարների պաշարը: Մեր հարստություններից մեկը ջուրն է, մյուսը՝ պղինձը, որի գինն աննախադեպ աճել է: Այս ճանապարհին մենք այո, պետք է գնանք կոմունիկացիաների բացման, բայց դրանից վախենալ պետք չէ»:

Վարչապետի պաշտոնակատարը հավելեց, որ միջանցքի հարց Հայաստանը չի քննարկել երբևէ և չի քննարկում: Նա նշեց, որ պետք է հաղթահարվի նաև ինտենսիվ գյուղատնտեսության պրոգրեսիվ աճը երկրում:

Մանրամասները՝ տեսանյութում