Զինվորին ելակ էլ ենք տվել, հրթիռ էլ, ավտոմատ էլ ենք տվել, դուխ էլ ենք տվել, ասել ենք մեջքներիդ կանգնած ենք. Փաշինյան

Սերժ Սարգսյանի ձեռամբ հիմա բացվել է 2018 թվականի բանակցային իրադրությունը: Ըստ էության, Հայաստանին առաջարկվում էր «տարածքներ ոչ մի բանի դիմաց» բանաձևը: Թող իրենք կանգնեն ասեն, թե այդ պահից սկսած ինչ գործողություններ էին անելու, ինչ տրամաբանությամբ էին առաջնորդվելու:

Երբ որ մենք արձանագրում ենք, թե 2018 թվականին ինչ իրադրության մեջ ենք ժառանգել ԼՂ հարցը, ամենատարբեր առիթներով հրապարակել ենք դա, հիմա արդեն ձայնագրություններ են հրապարակում, չգիտեմ ինչեր են անում:

Օձունում քարոզարշավի ժամանակ հայտարարեց «Քաղաքացիական պայմանագիր» կուսակցության նախընտրական ցուցակը գլխավորող, ՀՀ վարչապետի պաշտոնակատար Նիկոլ Փաշինյանը:

«Եվ այդ բոլոր մարդիկ պետք է պատասխանեն մի հարցի. և Լևոն Տեր-Պետրոսյանը, և Ռոբերտ Քոչարյանը, և Սերժ Սարգսյանը:

Սերժ Սարգսյանի ձեռամբ հիմա բացվել է 2018 թվականի բանակցային իրադրությունը: Ըստ էության, Հայաստանին առաջարկվում էր «տարածքներ ոչ մի բանի դիմաց բանաձևը»: Թող իրենք կանգնեն ասեն, թե այ էդ պահից սկսած ինչ գործողություններ էին անելու, ինչ տրամաբանությամբ էին առաջնորդվելու:

Սրանից առաջ որ ասում էինք, ինչ էիք անելու, ոնց էիք լուծելու Ղարաբաղի հարցը, ասում էին դե մենք տեղյակ չենք, մենք չգիտեինք, մենք ինֆորմացված չենք:

Հիմա բոլորդ ամեն ինչի մասին ինֆորմացված եք: Սկսած 96 թվականից ինֆորմացված եք: Թող ասեն բոլորը, թե ոնց են պատկերացնում այդ կետից գործողությունների հետագա պլանը:

Եթե ասում են, թող շարունակությունն էլ ասեն: Լևոն Տեր-Պետրոսյանն օրինակ շարունակում է իր ապոկալիպտիկ քննադատությունները, բայց չի ասում ոնց էր Ղարաբաղի հարցի պատկերացումը էդ կետից:

Երբ որ Հայաստանին ըստ էության ասվում էր, որ 7 շրջանները պետք է տալ, և ադրբեջանցիները ներքին տեղահանվածի անվան տակ պետք է վերադառնան Ղարաբաղ, և Ղարաբաղի կարգավիճակը տեսանելի հարյուրամյակում անգամ չի ճշգրտվելու, ոնց էին պատկերացնում էդ իրավիճակը, ոնց էին պատկերացնում լուծումը:

Լուծումը պետք է լիներ մեկը. 2018 թվականի դրությամբ մենք բոլոր առումներով մեր երկրի դիմակայունության և մարտունակության բարձր մակարդակ պիտի ունենայինք, սրանով պետք է զուգորդվեր ամբողջ բանակցային գործընթացը, ինչը տեղի չի ունեցել:

Թող ներվի ինձ այս անհամեստությունը, բայց միայն 2018 թվականից հետո է, որ այդպես եղել է: Հիմա արդեն միջազգային կառույցներն են այդ մասին բարձրաձայնում ու արձանագրում, որ 2011-ից 2020-նն ընկած ժամանակահատվածը, 2019 թվականին ձեռք է բերվել այդ տասնամյակի ընթացքում ձեռք բերված սպառազինության 62 տոկոսը, իսկ 2019-20թթ՝ մինչև 80 տոկոսը»,-ասաց Փաշինյանը:

Իսկ ինչո՞վ է գործող իշխանությունը զուգորդել բանակցությունները: Պետական եկամուտների ավելացմամբ, զինվորականների աշխատավարձը բարձրացնելով, զինվորների սննդի հարցը լուծելով:

«Ես բացեմ, թե էդ սննդի պատմությունը ոնց է եղել: Վարչապետ դառնալուց հետո գնացել էի առաջնագիծ: Գնացի, բացեցի սննդի ցանկը, ասեցի էս, էս, էս բերեք: Պահածոներ էին ու տարբեր ուտելիքներ, կերա դրանից ինչ որ զինվորներն ուտում էին:

Էնպես չի, որ ես շատ փափկասուն եմ, բայց մի ժամ հետո իմ ինքնազգացողությունը վատացավ: Ես հարց դրեցի, ասեցի սա ուղղակի ուտելու հարց չի, սա ինքնազգացողության հարց է, մարդը պետք է 2 ժամ ժամապահ լինի ամենաբարձր զգոնությամբ: Էս սնունդն ուտելով ինքը չի կարող դա անել, իր մարտունակությունն էս սնունդը գցում է:

Իսկ երբ որ ասում են բանակում սննդի հարց չի եղել, նկատի ունեն ծնողներին: Ծնողները միրգն էլ են ուղարկել, հացն էլ, ջուրն էլ, օճառն էլ, ատամի խոզանակ, նասկի: Ամեն ինչն էլ ուղարկել են:

Բայց մենք զբաղվել ենք բանակի մարտունակությամբ: Այո, մենք զենք ենք առել, բայց միլիոնատեր չենք դառել, մենք ճանապարհ ենք կառուցել, բայց միլիոնատեր չենք դառել, մենք դպրոց ու մանկապարտեզ ենք կառուցել, բայց միլիոնատեր չենք դառել, որովհետև մենք դպրոցը կառուցել ենք ոչ թե ատկատի համար, այլ կառուցել ենք երեխայի համար, մենք ճանապարհը կառուցել ենք ոչ թե ատկատի համար, այլ կառուցել ենք մարդու համար, մենք սննդի հարցը լուծել ենք ոչ թե ատկատի համար, մենք էդ հարցը լուծել ենք զինվորի համար, մենք զինվորի ծնողի համար ենք էդ հարցը լուծել, որ զինվորի մայրը չմտածի տղան սոված է, թե կուշտ է:

Ասում են ելակ եք տվել, բա ինչ անեինք: Ելակ էլ ենք տվել, հրթիռ էլ ենք տվել, ավտոմատ էլ ենք տվել, էքսկավատոր էլ ենք տվել, սապոգ էլ ենք տվել, շոր էլ ենք տվել, փող էլ ենք տվել, վստահություն էլ ենք տվել, դուխ էլ ենք տվել, ասել ենք մեջքներիդ կանգնած ենք: Ինչ-որ պետք է տվել ենք:

Հիմա հարց կա. բա որ ամեն ինչ լավ է եղել, ինչի է էսպես ստացվել: Դա հարց է, որի պատասխանը ընտրություններից հետո պետք է անպայման ստանանք»: