«2 ընկերներով էինք բանակ գնացել, պիտի միասին էլ քննություն հանձնեինք, բայց…». այսօր 2-րդ փուլի մաթեմատիկայի քննություն է

Այսօր միասնական քննությունների երկրորդ փուլում ամենաշատ դիմորդներ ունեցող առարկայի՝ «Մաթեմատիկայի» քննությունն է։ Ընդհանուր առմամբ հանրապետությունում այս առարկայից հայտագրվել է 231 դիմորդ։

Նշենք, որ երկրորդ փուլում քննություն հանձնելու իրավունք ունեն քոլեջի, ուսումնարանների շրջանավարտները, զինվորական ծառայությունից զորացրվածները, սփյուռքի դիմորդները եւ նրանք, ովքեր առաջին փուլին ինչ-ինչ պատճառներով չեն մասնակցել, օրինակ՝ ուշացել են կամ վատառողջ են եղել։

Քննության կազմակերպման գործընթացին այսօր հետեւեցինք Երեւանի N189 ավագ դպրոցի քննասենյակներում եւ դպրոցի բակում:

Սաստիկ շոգը, դրա հետ մեկտեղ դիմակ դնելու պարտադիր պահանջը նեղություն էր տալիս դիմորդներին: Քրտինքի մեջ կորած տղաներից մեկը դպրոցի բակում տեղը չէր գտնում. զայրացած հետ ու առաջ էր անում՝ դժգոհելով, որ գոնե այս եղանակին պիտի դիմակ դնելու պարտադրանք չլիներ։

«Սա ի՞նչ ձեւ ա, գոնե օդորակիչ տեղադրվեր, հատկապես՝ շոգ վայրերում, էս էրեխեքը երեք ժամ ո՞նց պիտի նստեն»,- դժգոհեց երիտասարդի մայրը։

Խնդիրը, սակայն, հարթվեց, երբ տղան մուտք գործեց քննասենյակ, որտեղ համեմատաբար հով էր եւ դիմակ դնելու խիստ պահանջ չկար:

Քննական կենտրոնի ղեկավար Կարո Նասիբյանի խոսքով՝ N189 ավագ դպրոցում գտնվող քննակենտրոնում հայտագրված 117 դիմորդից բացակայել է 17-ը: Բացակաների նման մեծ թիվը, ըստ ԳԹԿ փոխտնօրենի, ամենայն հավանակնությամբ պայմանավորված է նրանով, որ առաջին քննությունից դրական միավոր չեն ստացել, ուստի նպատակահարմար են համարել կա՛մ չընդունվել, կա՛մ մասնակցել հեռակա ընդունելության քննություններին, կա՛մ էլ գուցե մասնակցել հաջորդ տարի:

Կարո Նասիբյանի խոսքով՝ տարիների փորձը ցույց է տվել, որ երկրորդ փուլին սովորաբար դիմորդներն անհամեմատ ցածր են ստանում: Սա ԳԹԿ փոխտնօրենը բացատրեց այն հանգամանքով, որ, ի տարբերություն առաջին փուլի, երբ դիմորդները ավելի լավ են պատրաստված եւ հստակ նպատակով են գնում քննության, երկրորդ փուլին մասնակցող դիմորդների 1/3-ը նրանք են, ովքեր չեն հասցրել առաջին փուլին մասնակցել, դիմորդների 1/3-ը փորձելու համար է մասնակցում, իսկ մյուս 1/3-ը քննության է գալիս՝ մի բան փախցնելու:

Ըստ ԳԹԿ փոխտնօրենի՝ այս ամենի ապացույցն այն է, որ այս տարի եւս երկրորդ փուլին ավելի շատ հեռախոսից օգտվելու խորամանկություններ բացահայտվեցին, քան առաջին փուլին:

Նասիբյանը նշեց նաեւ, որ առաջին եւ երկրորդ փուլերի թեստերի մեջ բովանդակային էական տարբերություններ չկան, քանի որ թեստը կազմվում է նույն մասնագետի կողմից, եւ բովանդակային առումով համարժեքությունը պահպանվում է:

Քննական կենտրոնի ղեկավարը նշեց նաեւ, որ ԳԹԿ-ն երկրորդ փուլում կազմակերպական գործընթացի նկատմամբ ավելի խիստ մոտեցում է ցուցաբերում, որովհետեւ այս դեպքում քննական կենտրոնները շատ ավելի քիչ են՝ համեմատած առաջին փուլի հետ, ուստի գործընթացը վերահսկում են միայն փորձառու մասնագետները, որոնք նույնիսկ առաջին 5 րոպեի ընթացքում արդեն հասկանում են՝ ով է աշխատում, ով է արտագրում, ով պետք է արտագրի եւ այլն:

ԳԹԿ քննությունների կազմակերպման բաժնի պետ Էդուարդ Սանթրոսյանն էլ նշեց, որ այսքան տարվա ընթացքում քննությունների պատմության մեջ ամենահետաքրքիր եւ արտառոց միջադեպն է տեղի ունեցել երեկ, երբ դրսում էկրանից քննությանը հետեւող մի ծնող, տեսնելով հեռախոսը հետը ներս բերած մի դիմորդի, մեծ աղմուկ է բարձրացրել:

Միջադեպին ականատես բորբոքված մի քանի ծնող համառորեն պահանջել են հետեւել կարգին՝ հեռացնել դիմորդին՝ չցանկանալով պարզել անգամ միջադեպի պատճառները։ Ըստ կարգի՝ դիմորդը հեռացվել է, սակայն, ըստ Էդուարդ Սանթրոսյանի, այստեղ խաչվում են իրավունքի եւ բարոյականության սահմանները: Ծնողներն առանց պատճառը պարզելու համառորեն իրենց ասածն էին պնդում, եւ նրանց այդպիսի քայլը 18 տարեկան երիտասարդի նկատմամբ, որ, ով գիտե, քննությունից հետո գուցե զորակոչվելու էր բանակ, այդքան էլ ճիշտ չէր:

Թեեւ քննական կարգում է գրված, որ հեռախոսը հայտնաբերելու դեպքում պետք է հեռացնել, սակայն, նրա կարծիքով՝ հեռացնել պետք է միայն այն դեպքում, եթե դիմորդը հեռախոսը օգտագործել է որպես օգտվելու միջոց: Որովհետեւ լարված լինելու դեպքում դիմորդը գուցե մոռացել է այն հանձնել:

Զրուցեցինք նաեւ դիմորդների հետ: Լիլիթը, որ երկրորդ փուլի քննությանը մասնակցում էր, որովհետեւ առաջին փուլի քննությունից ուշացել էր, նշեց, որ լրացուցիչ օրերի ընթացքում հասցրել է ավելի լավ պատրաստվել, վստահ է, որ անպայման ընդունվելու է Մանկավարժական համալսարանի Տարրական մանկավարժություն եւ մեթոդիկա բաժինը:

Զինվորական ծառայությունից զորացրված մի երիտասարդ էլ անկեղծացավ, որ համարյա շատ բան մոռացել է մաթեմատիկայից, բայց ծնողներին խոսք է տվել, որ բանակից գալուց հետո անպայման բուհ է ընդունվելու, հիմա եկել է խոստումը կատարելու ժամանակը։

«էսօր աչքիս էլ ոչ մի բան չի գալիս, ճիշտն ասած՝ երկար մտածում էի՝ ինչ անեմ, տա՞մ բարձրագույն, թե՞ չէ։ Կիսատ վիճակ ա. երկու ընկերներով էինք բանակ գնացել. էսօր պիտի իրար հետ էլ քննություն հանձնեինք, բայց...»,- շարունակել չկարողացավ։

Տիգրանը պատմեց, որ իր հետ զինակից ընկերոջ եղբայրն է եկել, մտնելուց էլ ասել է՝ «Ախպերս հաստատ քեզ համար ուրախ կլիներ, էնպես որ տխրել չկա»:

Մարիամ Գեւորգյան