Ադրբեջանի ԱԳՆ-ն պատասխանել է ՀՀ վարչապետի հայտարարություններին՝ անդրադառնալով երևակայական «միջանցք»-ին ու Ղարաբաղին

Ադրբեջանի ԱԳՆ-ը պատասխանել է Հայաստանի վարչապետ Նիկոլ Փաշինյանի՝ ՀՀ կառավարության նիստում երեկ ունեցած ելույթին՝ նշելով, որ ՀՀ վարչապետի հայտարարություններն «անհիմն և անընդունելի են»:

«Հայաստանի ղեկավարության այս մոտեցումը հարված է երկու պետությունների միջև հարաբերությունների կարգավորման և տարածաշրջանում խաղաղության հաստատման գործընթացին»,- ասել է Ադրբեջանի ԱԳՆ մամուլի քարտուղար Այhան Հաջիզադեն՝ հավելելով, թե Հայաստանը «խախտում է» իր միջազգային պարտավորությունները՝ հրաժարվելով կատարել 2020 թվականի նոյեմբերին անձամբ Փաշինյանի ստորագրած եռակողմ հայտարարությունը:

«Հայկական կողմը, «խախտելով» եռակողմ հայտարարության 9-րդ կետով ստանձնած պարտավորությունները, խաթարում է Ադրբեջանի արևմտյան շրջանների և Նախիջևանի Ինքնավար Հանրապետության միջև հաղորդակցությունների բացման գործընթացը: Մինչդեռ Ադրբեջանը «ազնվորեն» կատարում է իր պարտավորությունը՝ կառուցելով Լաչինի նոր ճանապարհը, իսկ Հայաստանի վարչապետի հայտարարությունը Ադրբեջանի կողմից Լաչինի ճանապարհը փակելու մտադրության մասին ոչ այլ ինչ է, քան տարածաշրջանում իրավիճակի միտումնավոր սրում:

Ինչ վերաբերում է «Զանգեզուրի միջանցքի» մասին ՀՀ վարչապետի սխալ հայտարարություններին, «Զանգեզուրի միջանցք» նշանակում է Ադրբեջանի և Նախիջևանի Ինքնավար Ինքնավարության միջև «պատմական կապի» վերականգնում»,- ասել է ադրբեջանցի դիվանագետը՝ նշելով, որ Ադրբեջանն այդպիսով ենթադրում է հիշյալ միջանցքի օգտագործումը խաղաղ և մարդասիրական նպատակներով։

Արցախի կարգավիճակի առնչությամբ էլ պաշտոնական Բաքուն կրկնել է ավելի վաղ հնչեցրած իր թեզն այն մասին, թե «Ղարաբաղն «Ադրբեջանի անբաժան մասն է», իսկ տարածաշրջանում ապրող հայազգի բնակչության իրավունքներն ու անվտանգությունը իբրև թե «կապահովվեն Ադրբեջանի սահմանադրության համաձայն»: 

Հիշեցնենք՝ ՀՀ վարչապետ Նիկոլ Փաշինյանը երեկ Կառավարության նիստի մեկնարկին համապարփակ անդրադարձ էր կատարել Ադրբեջանի նախագահ Իլհամ Ալիևի՝ նոյեմբերի 9-ին բռնազավթված Շուշի քաղաքում արած հախուռն հայտարարություններին:

Վարչապետը հիշեցրել էր, որ նոյեմբերի 9-ի եռակողմ հայտարարության հակոտնյա գործողությունների և հայտարարությունների մեջ է մտնում նաև Լաչինի միջանցքի շուրջ արդեն երկար ժամանակ Ադրբեջանի կողմից զարգացվող մանիպուլյատիվ խոսույթը և փորձը զուգահեռներ գծել Լաչինի միջանցքի և 2020թ. նոյեմբերի 9-ի եռակողմ հայտարարության 9-րդ կետով նախատեսված տարածաշրջանային բոլոր տրանսպորտային և տնտեսական կապերի ապաշրջափակման միջև:

«Ադրբեջանի նախագահը փորձում է հիմքեր ստեղծել Հայաստանի կողմից իբր իր պարտավորությունները չկատարելու պատրվակով Լաչինի միջանցքը փակելու, ԼՂ հայությանը շրջափակելու և նրան ցեղասպանության ու հայրենազրկման ենթարկելու համար:

Մինչդեռ 2020թ. նոյեմբերի 9-ի եռակողմ հայտարարության կարգավորումները նման զուգահեռների տեղ չեն թողնում, և սա հիմնավորվում է մի քանի փաստերով: Լաչինի միջանցքի մասին եռակողմ հայտարարության 3-րդ և 6-րդ կետերում գրված է «Լաչինի միջանցք», այսինքն՝ Լաչինի միջանցքը ուղիղ անվանված է որպես այդպիսին: 

Եռակողմ հայտարարության 6-րդ կետով Լաչինի միջանցքը գտնվում է ՌԴ խաղաղապահ զորախմբի վերահսկողության ներքո:

9-րդ կետում ասվում է, որ Ադրբեջանի արևմտյան շրջանների և Նախիջևանի ինքնավար հանրապետության միջև տրանսպորտային հաղորդակցության նկատմամբ հսկողություն իրականացնում է ՌԴ Անվտանգության դաշնային ծառայության սահմանապահ ծառայությունը: Այս հարցը լրացուցիչ պարզաբանված է նաև Ռուսաստանի Դաշնության նախագահի 2020 թվականի նոյեմբերի 10-ի «Լեռնային Ղարաբաղում խաղաղության ապահովման մասին» թիվ 695 հրամանագրի 3-րդ կետով, որտեղ ասվում է. «Ռուսաստանի դաշնության Անվտանգության դաշնային ծառայությանը՝ իրականացնել հսկողություն Հայաստանի Հանրապետության կողմից Ադրբեջանի արևմտյան շրջանների և Նախիջևանի ինքնավար հանրապետության միջև տրանսպորտային կապի ապահովման նկատմամբ՝ քաղաքացիների, ապրանքների, տրանսպորտային միջոցների անխոչընդոտ երկկողմանի շարժման համար»»,- նկատել էր գործադիրի ղեկավարը:

Նա նաև նշել էր, որ Ադրբեջանի նախագահը ինքն է հրաժարվել այս պայմանավորվածությունը ամրագրող փաստաթղթի ստորագրումից: Այսօր էլ Ադրբեջանի նախագահը, ըստ Նիկոլ Փաշինյանի, հրաժարվում է դրանից: «Ես պաշտոնապես հայտարարում եմ՝ հենց այսօր էլ պատրաստ եմ ստորագրել այս պայմանավորվածությունն ամրագրող փաստաթուղթը»,- շեշտել էր Փաշինյանը:

Քիչ առաջ էլ ՀՀ վարչապետը գրառում է կատարել թվիթերյան իր միկրոբլոգում՝ ևս մեկ անգամ շեշտելով, որ Ադրբեջանի նախագահ Իլհամ Ալիևն իր վերջին ելույթում կոպտորեն խախտել է Սոչիի եռակողմ հայտարարության մեջ ամրագրված ուժի սպառնալիքից կամ ուժի կիրառումից զերծ մնալու մասին պայմանավորվածությունը և հավելել՝ որքան էլ տարօրինակ է, նա Հայաստանին մեղադրում է փոխհամաձայնեցված հայտարարությունները խախտելու համար: 

Նիկոլ Փաշինյանի՝ Ադրբեջանի նախագահի հայտարարություններին երեկվա արձագանքը՝ ստորև.

«Ալիևը նախապատրաստում է Լեռնային Ղարաբաղի հայության ցեղասպանություն»

«Ադրբեջանի նախագահը փորձում է հիմքեր ստեղծել Լաչինի միջանցքը փակելու համար»

«Եթե որևէ մեկը մտածում է, թե խաղաղության օրակարգը հայության «խաղաղ ոչնչացման» մասին է, չարաչար սխալվում է»