Կիսաշինարարական աղբի մեջ կորած տարածքները չեն կարող կհավերժ մնալ. շինթույլտվության տուրքը կավելանա 2-10 անգամ

ՀՀ կառավարությունն այսօր նիստի ժամանակ հավանություն տվեց «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին», «Տեղական տուրքերի և վճարների մասին» օրենքում լրացումներ և փոփոխություններ կատարելու մասին» և «Անշարժ գույքի հարկով հարկման նպատակով անշարժ գույքի շուկայական արժեքին մոտարկված կադաստրային գնահատման կարգը սահմանելու մասին» օրենքում լրացումներ կատարելու մասին» օրենքների նախագծերին։

Ըստ ֆինանսների նախարար Տիգրան Խաչատրյանի՝ նախագծի նպատակն է պետական և համայնքային սեփականություն հանդիսացող հողամասերի վրա կառուցված շինությունների, այդ թվում՝ ինքնակամ անշարժ գույքի հարկով հարկման ընթացակարգերի կատարելագործումը, ինչպես նաև անավարտ կիսակառույց շինություններն ավարտին հասցնելու համար խթաններ ստեղծելու նպատակով այդ շինությունների մասով հարկային բեռի վերանայումը:

«Առաջին կարգավորումը վերաբերում է նրան, որ երբ առաջին շինարարական թույլտվության ժամկետն ավարտվում է, պետք է այդ անավարտ շինության համար գույքահարկը վճարվի այնպես, ինչպես կվճարվեր ավարտված շինության կամ շենքի համար»,- ասաց  Խաչատրյանը:

Վերջինիս խոսքով՝ անավարտ շինություններն ավարտին չհասցնելու հիմնական պատճառներից մեկն այն է, որ տեղական տուրքի դրույքաչափերը թույլտվության համար շատ ցածր են: Որպես օրինակ՝ նախարարը նշեց, որ Երևանում ցանկացած գոտում 5000 քմ շինարարության տեղական տուրքի դրույքաչափը կազմում է 500 հազար դրամ: 

«Մենք առաջարկում ենք տուրքի դրույքաչափերը բարձրացնել՝ տարբերակելով ըստ գոտիականության: Այդ բարձրացումը կարող է կազմել 2-10 անգամ: Երևանում առաջինից չորրորդ գոտիներում 5 հազար քմ տարածքի համար շինթույլտվության տուրքը կկազմի ոչ թե 500 հազար, այլ 5 մլն դրամ: Նախատեսում ենք նաև, որ սահմանված ժամկետում շինարարությունն ավարտին չհասցնելու դեպքում, երբ երկրորդ կամ երրորդ անգամ դիմի շինարարության ժամկետը երկարացնելու համար, պետք է վճարի ավելի բարձր դրույքաչափով տեղական տուրք, քան առաջին անգամ շինարարական թույլտվություն ստանալու համար նախատեսված տեղական տուրքի դրույքաչափն է:

Երևանում այս փոփոխությունը վերաբերելու է բոլոր տիպի շենքերի և շինությունների կարգավորումներին, Երևանից դուրս՝ բացառապես բնակելի շենքերին, հասարակական և արտադրական շինություններին, այսինքն՝ բնակելի տները բարձրացված դրույքաչափերի կարգավորումների տակ չեն ընկնի: Սահմանամերձ համայնքներում էլ որևէ փոփոխություն չի լինի»,- հայտնեց նախարարը:

ՀՀ վարչապետ Նիկոլ Փաշինյանն էլ արձագանքեց, որ հաճախ ականատես ենք լինում, երբ որևէ տեղում ստեղծվում է շինարարական փոս ու տարիներով մնում. «Դա կարծես մեզ մոտ դիտվում է նորմալ երևույթ, և որևէ մեկը չի արձանագրում, որ դա անհարգալից վերաբերմունք է հանրության նկատմամբ, անհարմարություններ է ստեղծում, խաթարում է միջավայրը, միջավայրի գեղագիտական տեսքը: Հիմա մենք ասում ենք՝ եթե շինթույլտվության ժամկետն ավարտվեց, դրանից սկսած՝ այլ կարգավորումներ են, պետք է վճարվի գույքահարկ, իսկ շինթույլտվությունները երկրորդ անգամ երկարացնելու համար այլ չափով դրույքաչափեր պետք է վճարվեն»։

Փաշինյանը նաև ընդգծեց, որ կան բացառություններ, բայց միայն սահմանամերձ բնակավայրերի դեպքում։

«Շինարարությունը սկսվեց, պետք է ավարտվի, չեն կարող քաղաքի կենտրոնում կամ ոչ կենտրոնում, մայրուղու վրա ցելոֆաններով կիսաշինարարական աղբի մեջ կորած տարածքները հավերժ մնան, դա պետք է իր հետ բերի ֆինանսական հետևանքներ: Եթե որևէ մեկը հասցնի գիշերվա ընթացքում Հանրապետության հրապարակի կենտրոնում բուդկա դնի, հետո մենք պետք է տարիներով դատական պրոցեսներով անցնենք, որ այդ բուդկան հանենք: Ես տպավորություն եմ ստանում, որ մեզ մոտ օրենսդրական կարգավորումները ոչ թե օրինականությունը, այլ ապօրինությունը պաշտպանելու համար են»,- ասաց Կառավարության ղեկավարը:

Կադաստրի կոմիտեի նախագահ Սուրեն Թովմասյանն էլ նշեց, որ այս պահին շուրջ 18 հազար ինքնակամ կառույց կա հաշվառված, որի զգալի զանգվածը համայնքային կամ պետական հողերի վրա կառուցված ինքնակամ շինություն են՝ հավելելով, որ դրանք նույնպես պետք է հարկվեն: