Արցախի իշխանությունները Հայաստանում կատարվածը փշերի վրա են ընդունում. Վահան Բադասյան

Արցախի ռազմական-քաղաքական գործիչ, Արցախի խորհրդարանի նախկին պատգամավոր Վահան Բադասյանը երեկ ֆեյսբուքյան իր էջում գրառում էր կատարել այն մասին, որ «Լույս Արցախին» նախաձեռնող խմբի որոշ անդամների նկատմամբ ռեժիմի կողմից երեկ իրականացվել են ահաբեկման տարբեր փորձեր:

«Սիրելի հայրենակիցներ!
Հրապարակում ենք «Լույս Արցախին» նախաձեռնող խմբի անդամների ցանկը.

Վահան Բադասյան
Գրիշա Հայրապետյան
Արթուր Խաչատրյան
Ներսես Օհանջանյան
Վաչիկ Զաքարյան
Աշոտ Բեկլարյան
Գնել Համբարձումյան Մ
Ալբերտ Համբարձումյան Խ
Ասրիբաբայան Մխիթար
Առնոդիկ Սարգսյան
Տիգրան Գալֆայան
Վաչիկ Բալասանյան
Սուրեն Սարգսյան
Գոռ Հայրիյան
Սերգեյ Ամիրյան
Մհեր Պետրոսյան
Հայտարարում ենք նաև, որ այսօր որոշ մասնակից անդամների նկատմամբ ռեժիմի կողմից իրականացվել են ուղղակի ահաբեկման տարբեր փորձեր։ Չնայած նրանց պնդմանը, այնուամենայնիվ, նրանց անունները կհրապարակվեն ավելի ուշ:

«Լույս Արցախին» նախաձեռնող խումբ 29 մայիսի 2018 թ», - գրել էր Բադասյանը ֆեյսբուքյան իր էջում:

Վահան Բադասյանը խնդրի վերաբերյալ մեզ հետ զրույցում որոշ մանրամասներ ներկայացրեց:

- Պարոն Բադասյան, ձեր ֆեյսբուքյան էջում կարդացինք, որ «Լույս Արցախին» նախաձեռնության որոշ մասնակից անդամների նկատմամբ ռեժիմի կողմից ահաբեկման տարբեր փորձեր են արվել, ի՞նչ է եղել, կմանրամասնե՞ք:

- Ես չեմ ուզում նշել նրանց անունները, ում նկատմամբ ահաբեկման փորձեր են արվել, նաեւ չեմ ուզում նշել այն մարմինների անունները, որոնք ահաբեկել են: Ես մի մասի հետ առանձնազրույց ունեցել եմ, մի մասի հետ էլ շուտով կունենամ: Խոսքը վերաբերվում է տվյալ գերատեսչությունների ղեկավարներին: Անձամբ Բակո Սահակյանի հետ այդ մասին կխոսենք եւ կասենք, որ այ սա է հենց պատճառը, որ ուզում ենք այլեւս այսպես չշարունակվի: Արցախը Հայաստան է, երբ պետք է լինում՝ շահարկում են, որ առանձին պետություն է, իսկ երբ անհրաժեշտ է լինում, ասում են՝ մի երկիր ենք: Մենք իրոք մի երկիր ենք, եթե մի երկրում ժողովրդի ցանկությամբ կատարվել է փոփոխություն, ապա մենք էլ ենք հայ մարդ, մեզ մոտ էլ պետք է լինի: Գլենդելում ուրախացել են, մենք էլ ենք ուրախացել, որ Հայաստանում կատարվել է փոփոխություն, բայց մենք ուզում ենք մեր կաշվի վրա զգալ դա:

Մեր իշխանափոխությունը մեզ համար ինքնանպատակ չէ: Մենք պաշտոններ չենք ուզում եւ նույնիսկ պատրաստ ենք հենց հիմա էլ հայտարարել, որ եթե նույնիսկ իշխանափոխություն կատարվի, ապա մենք պաշտոններ չենք վերցնելու: Մենք ամենքս մեր նախընտրելի գործն ունենք, բայց հարցը նրանում է, որ մենք ուզում ենք, որ մարդու իրավունքի վերականգնում լինի` ազատ խոսքի արտահայտման: Մենք ուզում ենք, որ սոցիալական արդարություն լինի եւ սոցիալական արդարություն թեւածի ամեն տեղ:

Հայաստանում այսօր նոր կառավարություն է, երկնքից քարեր չեն իջեցնում նրանք, բայց կան շոշափելի արդյունքներ: Իշխանության առաջին քայլը սոցիալական արդարության տեղադրումն էր համակարգի մեջ, որի առաջին օրինակը ցույց են տալիս իրենք` ամեն ոլորտում, եւ սա բերում է արդյունքների:

Մենք մեր իշխանություններին եւ անձամբ Բակո Սահակյանին մտադիր ենք առաջարկել, որ ինքը ողջունի եւ ընդունի հայ ժողովրդի հաղթանակը: Նա պետք է Արցախում շուտափույտ համակարգային փոփոխությունների մասին էլ հայտարարի: Սահակյանը պետք է առանց հապաղելու կադրային փոփոխություններ կատարի, պետք է սոցիալական արդարության վերականգնում լինի: Այսինքն, պետք է կոռումպացված կադրերից ձերբազատվել:

- Ի՞նչ կարգի ահաբեկման փորձեր են արվել, պարոն Բադասյան, ծեծե՞լ են, թե վախեցրե՞լ են:

- Վախեցրել են աշխատանքից հեռացնել` մորաքրոջը, մորը, ծնողին, որդուն:

- Հայաստանում արդեն իշխանափոխություն է եղել, ու թերեւս դա պետք է զգացվեր նաեւ Արցախում, ինչո՞ւ է նույն ձեւով շարունակվում այդտեղ:

- Ես այսպիսի մի օրինակ բերեմ. Հադրութի խանութներից մեկում մի խանութի տեր բերել է վաճառելու գլխարկներ՝ վրան գրված՝ «դուխով», կառավարման պետական մարմիններից անմիջապես արգելել են վաճառել դա, հիմա ինչպե՞ս մեկնաբանենք դա:

- Ի՞նչն էր պատճառը, վախենում են, որ Արցախում է՞լ հեղափոխություն կլինի:

- Չգիտեմ, ես այն կարծիքին եմ, որ Արցախի իշխանությունները Հայաստանում կատարվածը փշերի վրա են ընդունում: Հայաստանում այսօր տեսնում ենք ժողովրդի հաղթանակը, որն արդեն օր-օրի վրա ամրագրվում է: Իշխանության տարբեր օղակներ, օրինակ` դատարանները, դատախազությունը, դատաիրավական համակարգը, Ազգային ժողովը եւ շատ հին թափթփուկներ խոսում են հակահեղափոխության մասին եւ փորձեր են կատարում: Ես հիմա իրավունք ունե՞մ ենթադրելու, որ Արցախի իշխանության տարբեր օղակներ հենց հիմք են հանդիսանում հակահեղափոխության տարրեր: Իհարկե, իրավունք ունեմ ենթադրելու, եւ այդպես էլ ենթադրում եմ:

Այսօր Ժիրայր Սեֆիլյանի դատը պիտի լիներ, ենթադրվում էր, որ այս անմեղ ֆոնի վրա, որպես քաղբանտարկյալ, մարդը պետք է ազատ արձակվի: Երեկ չէ առաջին օրը անկախության տոնին Նիկոլ Փաշինյանը տրամաբանորեն եւ արդարացիորեն Սեֆիլյանների ընտանիքին հրավիրել էր տոնակատարության արարողություններին մասնակցելու: Բայց այսօր նույն Նիկոլ Փաշինյա՞նն է արդյոք մեղավոր, որ Սեֆիլյանին դահլիճ չբերեցին: Իհարկե, ոչ, դա Նիկոլ Փաշինյանը չարեց, դա արվեց Նիկոլ Փաշինյանի դեմ, դա արվեց ժողովրդի դեմ:

Սրանք հակահեղափոխության քայլերն են, որ անում են, եւ Արցախում այս նույն կարգերը, որ շարունակվում են, որեւէ ակնարկ չեն անում իշխանությունները հայ ժողովրդի զարթոնքից հետո: Բոլորը խոսում են նրա մասին, որ հակահեղափոխությունը իր չափով աշխատում է: Ովքեր չեն համաձայնվում ինձ հետ, ես նրանց կհրավիրեմ ինձ մոտ՝ Արցախ եւ կառաջարկեմ 2-3 օր պտտվել Արցախում, որպեսզի իրենց կաշվի վրա զգան, թե մարդիկ այստեղ ինչ ծանրության տակ են ապրում:

- Պարոն Բադասյան, դուք նշեցիք, որ հանդիպելու եք Բակո Սահակյանի հետ, նրա հետ քննարկելու եք ավելի ցածր կադրերին պաշտոնանկ անելու վերաբերյալ հարցե՞ր, թե հենց Արցախի նախագահի պաշտոնանկության հարցը:

- Ընդհանուր համակարգի մասին ենք մտադիր խոսել: Մենք չենք ուզում անձնականացնել, պարզապես, եթե ինքը փորձի հակառակ փաստեր բերել, մենք կարող ենք անհատական ապացույցներով ասել, թե ով, որտեղ եւ ինչպես է կոռումպացված:

Մենք ունենք դեռեւս «գեւորգովյան» կադրեր, «գեւորգովիզմ»-ը ժխտվեց, բայց նրանք մնացել են իշխանության: Արկադի Ղուկասյանի ժամանակ ժխտվեց Սամվել Բաբայանի քաղաքականությունը, բայց Սամվել Բաբայանի կադրերը դարձան Արկադի ղուկասյանականներ, եւ նրա ամենաուժեղ հենասյուններն էին: Հետո Բակո Սահակյանի իշխանությունը մատնանշեց Արկադի Ղուկասյանի սխալներն ու վարած քաղաքականությունը, սակայն այդ նույն մարդիկ դարձել են հակաղուկասյաններ եւ դարձել են Բակո Սահակյանի կադրերը:

Նույնն էլ Հայաստանում էր չէ՞, այստեղ ամենավատ ձեւով է: Մենք մտադիր չենք այսպես ապրելու: Մենք մտադրություն չունենք ապրելու, արարելու մի խումբ մարդկանց համար, որ պիտի նրանք երջանիկ լինեն, իսկ մյուսները` ոչ:

- Հարցի լուծումը չստանալու դեպքում ՀՀ վարչապետ Նիկոլ Փաշինյանին պատրաստվո՞ւմ եք դիմել:

- Լավ միտք է, կարելի է դիմել, ամեն փորձ էլ անելու ենք: Մեր հիմնական ցանկությունն է, որ սա լինի ազգային համերաշխության պայմաններում, մեկը մյուսին հարգելու պայմաններում եւ առանց որեւէ մեկի արժանապատվության կորստի կամ հետապնդումների պայմաններում: