Նիկոլն ինձ սիրահարվեց առաջին հայացքից, ես՝ մի փոքր ուշ. Ա. Հակոբյանը՝ «Экспресс газета»-ին

ՀՀ վարչապետի տիկին Աննա Հակոբյանը սիրում է Հայաստանի գյուղերը, պաշտում է Արցախը, Ստեփանակերտը, Շուշին, Գանձասարի եկեղեցին, սակայն երազում է դեպի Աֆրիկա ճանապարհորդության մասին:

Աննա Հակոբյանը հունիսի 27-ին «Экспресс газета»-ին տված հարցազրույցի ժամանակ պատմել իր ու ամուսնու ծանոթության, իրենց ընտանիքի, աշխատանքի, նոր պարտականությունների, նոր կարգավիճակի ու երազանքների մասին:

«Экспресс газета»-ի հոդվածում նշվում է, որ Աննա Հակոբյանը հաշված օրերի ընթացքում «Հավերժ ընդդիմադիր»-ի կնոջից դարձել է երկրի առաջին դեմքի տիկին: 

Հարցազրույցի սկզբում անդրադարձ է արվել Ն. Փաշինյանի հետ հանդիպմանն ու ծանոթությանը.

«Մեր պատմությունը էլի ենք պատմել, բայց նորից կասեմ՝ ռուս ընթերցողների համար: Մենք ծանոթացել ենք դեռ ուսանողական տարիներին, երբ Նիկոլը Երևանի պետական համալսարանի ժուռնալիստիկայի ֆակուլտետի հինգերորդ կուրսի ուսանող էր, իսկ ես նոր էի ընդունվել նույն ֆակուլտետ: Երբ ես մտա լսարան, անմիջապես լսեցի նրա անունը, քանի որ նրա մասին բոլորը խոսում էին՝ դասախոսները, դեկանը, ուսանողները: Նիկոլը ֆակուլտետի հպարտությունն էր, ես լսում էի նրա մասին՝ ծանոթ չլինելով հերոսի հետ»,- պատմում է Աննա Հակոբյանը:

Հինգերորդ կուրսում Նիկոլ Փաշինյանը ժուռնալիստիկայի ֆակուլտետի լեգենդն է եղել: Պատահական չէր, որ 1995 թվականին նրան դուրս են թողել համալսարանից՝ քաղաքական հայացքների համար:

Լինելով առաջին կուրսի ուսանողուհի՝ Աննան առաջադրանք է ստացել հոդված գրել թերթում, որտեղ այդ ժամանակ աշխատում էր Նիկոլը: «Ես գրեցի հոդվածը և ներկայացրեցի խմբագրություն, որտեղ աշխատում էր Նիկոլը: Այդպես էլ ծանոթացանք Նիկոլի հետ: Նիկոլն ինձ սիրահարվեց առաջին հայացքից, իսկ ես մի փոքր ավելի ուշ»,- նշել է Աննա Հակոբյանը:

Ինչ վերաբերում է ամուսնու քաղաքական հայացքներին, ապա Աննա Հակոբյանը նշել է, որ ինքը մշտապես իմացել է՝ Նիկոլը լինելու է քաղաքականության մեջ ու պատրաստ է եղել նրա հետ հաղթահարել դժվարությունները, իրենք բարդ ժամանակներ շատ են ունեցել:

Ամուսնությունից հետո Նիկոլ Փաշինյանն իր պայքարն ավելացրել է: 90-ական թվականների վերջերին նա արդեն հայտնի էր որպես իր մասնագիտության մեջ իրական հերոս, Փաշինյանը չի վախեցել տալ քրեական դեմքերի անուններ, բացել պատմություններ, ինչի համար նա մի քանի անգամ դատարան է կանչվել: Այդ դատական հայցերից մեկի ժամանակ Նիկոլ Փաշինյանին անգամ 25 հազար դոլար տուգանք են նշանակել, որն այդ տարիների համար ահռելի գումար է եղել, Նիկոլ Փաշինյանը դատական կատարածուների առաջ անգամ չի բացել դուռը:

«Հեղափոխության ժամանակ հասարակության ուշադրության կենտրոնում հայտնվեցինք: Մարդիկ փողոցում ճանաչում էին, բարի խոսքեր էին ասում, հիմա էլ այդպես է, մենք մեծ պատասխանատվությամբ ենք մոտենում հասարակության սիրուն: Դա շատ հաճելի է, և այդ սերը փոխադարձ է: Երբ իմ ամուսինը դարձավ վարչապետ, դրանից հետո մեր կյանքում, ընդհանուր առմամբ, արմատական փոփոխություններ տեղի չեն ունեցել: Փոխվել է մեր բնակության վայրը, այժմ կա անվտանգության ծառայություն»,- ասել է Աննա Հակոբյանը:

Նա պատմել է նաև իր երազանքների մասին, որոնցից է դեպի Աֆրիկա ճանապարհորդությունը:

«Ես շատ եմ սիրում Հայաստանի գյուղերը: Սիրում եմ Արցախը, Ստեփանակերտը, Շուշին, Գանձասարի եկեղեցին… Բայց ես մանկուց մինչ հիմա դեռ երազում եմ ուղևորվել Աֆրիկա՝ ճանապարհորդության:

Ամեն դեպքում առայժմ նախընտրում եմ հանգստանալ Հայաստանում, մենք մեծ ընտանիք ենք եւ իմ փոքր դստեր համար առայժմ դժվար է երկրներով ճանապարհորդելը:

Ներկայում փնտրում եմ նոր գաղափարներ, ուսումնասիրում եմ կյանքը մի փոքր այլ տեսանկյունից: Սակայն, ինչպես և նախկինում, մարդկանց մեջ կարևորում եմ ազնվությունը, ազատությունը, բարությունը և արդարությունը»,- ասել է Աննա Հակոբյանը: