Հնարավոր է անգամ փոփոխված ղեկային համակարգով տրանսպորտային միջոցներ չներմուծվեն ՀՀ

ՀԺ-ն ահազանգ է ստացել ՀՀ քաղաքացի Կարեն Զախարյանից: Զախարյանը նշում էր, որ զբաղվում է մեքենաների ներկրմամբ, սակայն դեռ նախկին իշխանությունների կատարած փոփոխությունների պատճառով լուրջ խնդիրներ կան: Հիշեցնենք, որ այս տարվա ապրիլի 1-ից մինչեւ հոկտեմբերի 1-ը արգելվել է աջ ղեկով մեքենաների ներկրումը Հայաստան:

«Խնդիրը կայանում է նրանում, որ մեր նախկին կառավարությունը օրենք ընդունեց, որով արգելեց աջ ղեկ մեքենաների ներկրումը Հայաստան, բայց դրան զուգահեռ նրանք չարգելեցին այդ մեքենաները վերասարքավորել՝ նոր բերել: Հիմա այս վերասարքավորել նոր բերել հասկացողությունը դուք չեք պատկերացնի, ինչ տանջանք է: Վրաստանում կիլոմետրերով հերթեր են կուտակվել դրա համար: Վրաստանում արգելված էր ղեկ փոխելը, իրենք ասում են՝ աջ ղեկ է՝ աջ ղեկով քշիր, քանի որ ինչքան էլ ղեկը փոխեն աջից ձախ, այն չի կարող գործարանայինի պես լինել»,- ասաց քաղաքացին: Զախարյանի խոսքով՝ Հայաստանի այդ փոփոխություններից հետո Վրաստանում սկսեցին թույլատրել այլ երկիր գնացող մեքենաների ղեկը փոխել:

Զախարյանը ասաց, որ Վրաստանում ղեկը հիմնականում փոխում են Ռուսթավի քաղաքում: «Հիմա, եթե օրենքով չի արգելվում աջ ղեկ մեքենան վերափոխել, հետո բերելը, ինչո՞ւ չեն թույլատրում մեքենայի ղեկը բերենք Հայաստանում փոխենք: Հայաստանում գտնվող աջ ղեկով մեքենաները թույլատրվում է փոխել, սակայն ներկրվող աջ ղեկով մեքենայի ղեկը պետք է դրսում փոխել, հետո բերել Հայաստան: Այսինքն՝ մեր տրանսպորտի նախկին նախարարը կարող էր շատ լավ Վրաստանի տրանսպորտի նախարար լինել, քանի որ սրանից շահում է միայն Վրաստանը: Վրաստանում շատ անորակ են անում ղեկի փոփոխությունը, իսկ Հայաստանում՝ 20 անգամ ավելի որակով: Վատ կլինի՞, որ Վրաստանում աշխատող հայ արհեստավորները գան Հայաստանում աշխատեն, եւ այստեղ նաեւ շահի պետությունը: Մենք առաջարկում ենք, որ կառավարությունը վերանայի այդ որոշումը եւ քանի դեռ հնարավորություն կա, թույլ տան գոնե Հայաստանում փոխենք ներկրվող ավտոմեքենայի ղեկը, քանի որ այստեղ որակով է եւ դրա արդյունքում նաեւ մեր պետբյուջե ավելի շատ հարկ կվճարվի»,- ասաց Զախարյանը: Քաղաքացին նաեւ նշեց, որ Վրաստանում արդեն թանկացել է ղեկ վերասարքավորելը, իսկ Հայաստանում համեմատաբար էժան է:

«Արգելքը հոկտեմբերի 1-ից չի դադարելու, եթե այլ որոշում չկայացվի, էլի շարունակվելու է», - այս մասին մեր զրույցում ասաց ՀՀ տրանսպորտի, կապի եւ տեղեկատվական տեխնոլոգիաների նախարարության տրանսպորտի վարչության պետի տեղակալ, փոխադրումների քաղաքականության բաժնի պետ Դավիթ Մելքոնյանը:

- Պարոն Մելքոնյան, ապրիլի 1-ից մինչեւ հոկտեմբերի 1-ն աջ ղեկ մեքենաների ներմուծումը օրենքով արգելվել էր: Ի՞նչ է լինելու հոկտեմբերի 1-ից հետո, արդյո՞ք ինչ-որ արդյունավետություն տվեց աջ ղեկի ներմուծման արգելումը:

- Դա անընդհատ քննարկվում է, այս պահի դրությամբ որեւիցե այլ փոփոխություն դեռեւս չկա: Արգելքը հոկտեմբերի 1-ից չի դադարելու, եթե այլ որոշում չկայացվի, էլի շարունակվելու է: Չնայած դա օրենքով կարգավորվող է եւ այլ որոշում մինչեւ այդ փաստացի հնարավոր չէ ընդունել:

Արդյունավետությունը մի քիչ ավելի ուշ կերեւա, երբ ՀՀ-ում աջ ղեկով տրանսպորտային միջոցների թվաքանակը շատ ավելի կպակասի, այ դա կլինի արդյունավետ: ՀՀ-ում երթեւեկությունը աջակողմյան է եւ երբ աջակողմյան ղեկային կառավարմամբ տրանսպորտային միջոցների շահագործումը Հայաստանում կպակասի, դա կլինի արդյունավետ լուծումը:

- Ինչո՞ւ քաղաքացիներին հնարավորություն չի տրվում ղեկի փոփոխությունը կատարել Հայաստանում, մենք ահազանգ ենք ստացել քաղաքացիներից, որ Վրաստանում այդ գործն անորակ են անում:

- Ընդհանուր առմամբ՝ այս փոփոխությունները նախատեսված են, որ ՀՀ-ում անգամ փոփոխված ղեկային համակարգով տրանսպորտային միջոցներ չներմուծվեն: Մենք այս հարցը նույնպես քննարկում ենք:

- Այսինքն, հնարավոր է փոփոխված ղեկով մեքենայի ներմուծումը նույնպե՞ս չթույլատրվի:

- Շատ հնարավոր է: Հնարավոր է նաեւ թույլատրվի ներմուծել, տեղում փոխել` արտահանելու նպատակով: Այդ բոլորը քննարկման թեմաներ են, որոնք մեզ մոտ չեն դադարում: Երբ ավելի արդյունավետ որոշում կունենանք, համապատասխանաբար կառաջարկենք կատարել այդ փոփոխությունները, բայց այս պահի դրությամբ առավել արդյունավետ լուծում չկա: 

- Գործարանային աջ ղեկով մեքենան ավելի վտանգավոր է համարվում երթեւեկության համար, քան ղեկը փոխած մեքենա՞ն:

- Այս պահի դրությամբ այդ հարցին չեմ կարող պատասխանել, որովհետեւ խնդիրը կայանում է նրանում, թե ինչպես են փոփոխությունը կատարում եւ նայած, թե ինչպես է երկրի երթեւեկությունը:

- Արդյո՞ք լրացուցիչ գումար չի մտնի պետբյուջե, եթե աջ ղեկով մեքենա ներմուծողներին հնարավորություն տրվի ղեկի փոփոխությունը կատարել Հայաստանում:

- Դա նույնպես քննարկման փուլում է: