ԵՊՀ-ում ստուգումները կավարտվեն նոյեմբերի վերջին. չափում են նույնիսկ սեղանների երկարությունը

Երեւանի պետական համալսարանում շարունակվում են Պետական վերահսկողական ծառայության ուսումնասիրությունները: Նախատեսվում է, որ դրանք կավարտվեն այս ամսվա վերջին:

Ուսումնասիրություններն իրականացվում են ամենայն մանրամասնությամբ: «Քանոնները ձեռքներին չափում են անգամ սեղանների երկարությունն ու լայնությունը»,- նկատեց ԵՊՀ աշխատակիցներից մեկը: Բայց մինչ վերջնական արդյունքների ամփոփումը, Պետական վերահսկողական ծառայության պետ Դավիթ Սանասարյանն օրեր առաջ հայտարարել էր բուհում հայտնաբերվող «լուրջ խախտումների» մասին՝ չբացառելով, որ դրանց գումարային արժեքը կարող է հասնել առնվազն 700 միլիոն դրամի:

Երեւանի պետական համալսարանն էլ ավելի ուշ իր հերթին էր հայտարարություն տարածել՝ մասնավորապես նշելով. «Չսպասելով ստուգումն ավարտելուն, սահմանված ընթացակարգով դրա արդյունքներն ամփոփելուն եւ համապատասխան վարչական արձանագրություն կազմելուն՝ Վերահսկողական ծառայության պետն արել է հայտարարություն, որը, մեր գնահատմամբ, միտված է հասարակությանը մոլորեցնելուն եւ պարունակում է Մայր բուհի գործունեության մեջ ամեն գնով «լուրջ խախտումներ» գտնելու մասին հանձնաժողովին տրված հրապարակային հանձնարարություն: Չի բացառվում նաեւ, որ նման արձագանքը պետական բարձրաստիճան պաշտոնյայի քաղաքական անփորձության եւ անթույլատրելի շտապողականության հետեւանք է: Այդ պատճառով դատապարտում ենք ՀՀ վերահսկողական ծառայության պետի նմանօրինակ գործելաոճը, հորդորում ենք դրսեւորել պետական բարձրաստիճան պաշտոնյային վայել վարքագիծ եւ ապահովել իրականացվող ստուգումների անաչառությունը: Դիմում ենք Դ. Սանասարյանին՝ պահանջելով հրապարակել իր հայտարարության համար հիմք հանդիսացած փաստարկները, հակառակ դեպքում դիմելու ենք իրավունքի դատական պաշտպանության»:

ԵՊՀ ռեկտոր Արամ Սիմոնյանից երեկ տեղեկացանք, որ պահանջված փաստարկները չեն ներկայացվել, բայց բուհն էլ դատարան չի դիմել: «Ուսումնասիրությունների արդյունքները կներկայացնեն ակտով: Ակտը բերում են քննարկման այն ժամանակ, երբ որ ավարտում են գործընթացը: Ամսվա վերջին կավարտեն, ակտը կբերեն, կքննարկենք, այն ժամանակ կարող եմ մեկնաբանություններ տալ: Հիմա ես խոսելու եւ ասելու բան չունեմ, որովհետեւ ես չեմ տեսել ակտը, չգիտեմ՝ ինչ թերություններ կան, ինչ մասին իրենք պետք է խոսեն: Ես բացարձակ ինֆորմացիա չունեմ ընթացքի մասին, թե ինչ են իրենք գրելու այդ ակտում: Որեւէ բան դեռ ինձ հետ ոչ քննարկել են, ոչ ասել են, ոչ էլ ավարտվել է այդ պրոցեսը»,- մեր հարցին պատասխանելով՝ ասաց Երեւանի պետական համալսարանի ռեկտոր Արամ Սիմոնյանը:

Դիտարկմանը, թե ստացվում է ԵՊՀ հայտարարության իմաստը չկար, եթե Վերահսկողական ծառայությունը Դավիթ Սանասարյանի հայտարարությունների հիմնավորումները այսպես թե այնպես պետք է ներկայացնի միայն գործընթացի ավարտից հետո ու ոչ միջանկյալ տարբերակով, ռեկտորը պատասխանեց. «Իր հայտարարությանն ի պատասխան մենք էլ ենք տվել հայտարարություն: Այդքան բան: Ուրիշ ոչ մի բան չկա»:

ԵՊՀ ռեկտորը համոզմունք է հայտնում, որ վերոնշալ՝ առնվազն 700 միլիոն դրամ կազմող չարաշահումները չեն եղել: «Ես ինձ վրա վստահ եմ, համալսարանի կոլեկտիվի վրա վստահ եմ, հիմա պիտի սպասենք, ակտը լինի, տեսնենք՝ ինչի մասին է խոսքը»,- ասաց նա:

Մենք հարցումով դիմել ենք նաեւ Պետական վերահսկողական ծառայություն՝ մասնավորապես հետաքրքվելով, թե ինչ ժամանակահատվածին են վերաբերում ԵՊՀ ուսումնասիրությունները, որն է ուսումնասիրության առարկան եւ այլն: Պատասխանները կներկայացնենք ստանալուն պես:

Նշենք, որ գործընթաց է սկսվել նաեւ բուհերի, այդ թվում՝ Երեւանի պետական համալսարանի հոգաբարձուների խորհրդի կազմի փոփոխության: Այդ խորհուրդն, ինչպես հայտնի է, կազմված է չորս խմբի ներկայացուցիչներից՝ բուհի պրոֆեսորադասախոսական կազմից, ուսանողներից, ինչպես նաեւ կառավարության ու կրթության եւ գիտության նախարարության ներկայացուցիչներից:

Խորհրդի կազմի համապատասխան հատվածը բուհն արդեն ներկայացրել է: Մեր տեղեկություններով՝ քննարկվում է կառավարության ու ԿԳ նախարարության ներկայացուցիչների ցանկը: Սպասվում է, որ վերջնական կազմը պատրաստ կլինի ու կներկայացվի վարչապետի հաստատմանը մինչեւ այս տարեվերջ, որովհետեւ օրացուցային տարին ավարտվում է, եւ խորհուրդը հերթական նիստը պետք է հրավիրի:

Առայժմ Երեւանի պետական համալսարանի հոգաբարձուների խորհուրդի նախագահը շարունակում է մնալ Սերժ Սարգսյանը: Կազմում ընդգրկված են մնում Պաշտպանության նախկին նախարար Վիգեն Սարգսյանը, Սփյուռքի նախարար Հրանուշ Հակոբյանը, Պաշտպանության նախարարի նախկին տեղակալ Արտակ Դավթյանը, Սպորտի եւ երիտասարդության հարցերի նախարարի նախկին տեղակալ Արսեն Քարամյանը, Նախագահի վերահսկողական ծառայության նախկին ղեկավար Հովհաննես Հովհաննիսյանը: