Ո՞վ է իրականում քրեական հեղինակություն Նորագյուղցի Բոգոն եւ ինչ է հայտնի նրա մասին

Վերջին օրերին մամուլում շատ է շրջանառվում քրեական հեղինակություն Նորագյուղցի Բոգոյի՝ Ռուբեն Կոստանյանի (նախկինում Սիմոնյան) անունը: Ո՞վ է իրականում Ռուբեն Կոստանյանը:

Դեռեւս նախորդ տարվա հուլիսին «Հայկական ժամանակ»-ի հետ զրույցում Կոստանյանի գործողություններից տուժած մի քաղաքացի պատմել էր, թե ինչպես են, ըստ նրա, Բոգոն, որդին ու քենակալը առեւանգել իրեն, շամփուրով դաժան ծեծի ենթարկել եւ 100 հազար դրամի փոխարեն 10 հազար դոլար պահանջել: Դրանից հետո Բոգոյին, նրա որդուն եւ քենակալին մեղադրանք է առաջադրվել:

Բոգոյի վերաբերյալ այլ աղմկոտ հրապարակումներ նույնպես կան մամուլում.

2016 թվականի հուլիսին ծեծկռտուք, ապա կրակոց էր տեղի ունեցել Իսակովի պողոտայում գտնվող «555» հացատանը: Վիրավորներից մեկը հենց Բոգոն էր, մյուսը՝ «Ֆեռո» ընկերության տերը՝ Ռոբերտ Ավետիսյանը. վերջինիս 15 մլն դրամ պարտք էին տվել՝ բիզնեսը զարգացնելու նպատակով եւ կարողացել էին ստանալ միայն 5 միլիոնը։ Մյուս մասը հենց Բոգոն է գնացել ստանալու եւ հույս է ունեցել գումարը ստանալ հենց այդ օրը: Կանչել է Ավետիսյանին Իսակովի պողոտայում գտնվող «555» հացատուն, բայց գումարը հետ ստանալ չի հաջողվել։ Վիճաբանություն է տեղի ունեցել, որը վերածվել է ծեծկռտուքի եւ ավարտվել կրակոցներով: Բոգոյին այդ անգամ եւս մեղադրանք էր առաջադրվել բռնության գործադրմամբ ինքնիրավչության համար ու 2017 թվականին նրա նկատմամբ պատիժ էր նշանակվել տուգանք՝ ՀՀ-ում սահմանված նվազագույն աշխատավարձի յոթհարյուրապատիկի չափով:

Ինչպե՞ս էր Բոգոն ազդում Երեւան-Արմավիր երթուղու կանոնավոր ուղեւորափոխադրում իրականացնող ընկերության ուղեւորահոսքի վրա.

Երեւան-Արմավիր երթուղու կանոնավոր ուղեւորափոխադրման թույլտվություն ունեցող «Գալակտիկա տրանս սերվիս» ՍՊԸ-ի տնօրեն Շուշանիկ Խաչատրյանը 2018 թվականի սեպտեմբերին կառավարության դիմաց լրագրողների հետ զրույցում հայտարարել էր, որ ընկերության կանոնավոր աշխատանքը խաթարված է եւ իրենց աշխատանքներին խանգարում է Կիլիկիայի ավտոկայանից Բոգոն: Խաչատրյանը նշել էր, որ Բոգոն չի թողնում իրենք աշխատեն, ավտոկայանի կողքը ավտոկայան է ստեղծել իր համար ու անօրինական 35-37 մեքենա է աշխատեցնում, իսկ իր ընկերության վարորդները չեն կարողանում աշխատել: 

2018 թվականի սեպտեմբերին ՀԺ-ին էր դիմել նաեւ «Սոնա եւ Միքայել» ՍՊԸ-ի տնօրենը: Կոստանյանն այս ընկերությանը նույնպես բարդ դրության մեջ էր դրել:

Կոստանյանի հետ առնչվող «Երկու ընկեր» ՍՊԸ-ն Երեւան-Թբիլիսի միջպետական ուղեւորափոխադրումներ է իրականացնում: Ընկերությունը մենաշնորհային դիրք է ստեղծել եւ մրցութային կարգով կարողացել է թե՛ Կիլիկիա եւ թե՛ Հյուսիսային ավտոկայաններում միակ ուղեւորափոխադրողը լինել դեպի Թբիլիսի: ՀԺ-ն Հյուսիսային ավտոկայանի տեղեկատու բաժնից այդ ժամանակ ճշտել էր, որ այնտեղից ուղեւորափոխադրումներ չեն իրականացվում դեպի Թբիլիսի եւ Թբիլիսի հնարավոր է գնալ միայն Կիլիկիա ավտոկայանից:

ՀՀ տրանսպորտի, կապի եւ տեղեկատվական տեխնոլոգիաների նախկին նախարար Վահան Մարտիրոսյանի 2017 թվականի մարտի 3-ի N 297-Ա հրամանով՝ «Երկու ընկեր» ՍՊԸ-ն մրցութային կարգով 3 տարով հնարավորություն է ստացել երկու ավտոկայաններում էլ կանոնավոր ուղեւորափոխադրում իրականացնել դեպի Թբիլիսի:

Ստացվում է, որ «Երկու ընկեր» ՍՊԸ-ն հաղթել է երկու տեղից ուղեւորափոխադրում իրականացնելու` տրանսպորտի նախարարության կողմից անցկացված մրցույթները, սակայն ընդամենը մեկ տեղից է իրականացնում այդ ուղեւորափոխադրումը:

Մեր աղբյուրների պնդմամբ՝ Կիլիկիա ավտոկայանից նախատեսված մեկ մեքենայի փոխարեն մի քանի մեքենա է ուղեւորափոխադրում կատարում դեպի Թբիլիսի`տարբեր ժամերի, ընդ որում, այդ մի քանի մեքենան պատկանում են «Երկու ընկեր» ՍՊԸ-ին: Այսինքն, ընկերությունը առնվազն հնարավորություն ուներ մեկական մեքենա ապահովել երկու ավտոկայաններում էլ, սակայն նախընտրել է մի կետում կենտրոնանալ, իսկ մյուս կետում էլ ոչ մեկին հնարավորություն չտալ:

«Սոնա եւ Միքայել» ՍՊԸ-ի տնօրենը ՀԺ-ին ասել էր, որ այդ մրցույթները Կոստանյանը հաղթել է միայն իր ունեցած պետական լծակների շնորհիվ: Նա պատմել էր, որ ցանկացել է գոնե Հյուսիսային ավտոկայանում սպասարկել երթուղին, սակայն տրանսպորտի նախարարությունում աշխատող իր մտերիմները խորհուրդ են տվել չմասնակցել մրցույթին, քանի որ արդյունք չէր տալու` ամեն ինչ որոշված էր: Արդյունքում Կոստանյանը մրցույթով հաղթել է «Սոնա եւ Միքայել» ՍՊԸ-ին եւ դաշտում իրենից բացի այլ մարդ չի մնացել:

Ըստ կայքերից մեկի 2013 թվականի հրապարակման՝ ««Նորագյուղցի Բոգո» կոչվող ինչ-որ կիսագողական կարողանում է իր «լայն» ազդեցությամբ կամ թիկունքում հզոր ուժ ունենալով՝ ճնշել ավտոկայանում տաքսիների վարորդներին, ովքեր ապահովում են Երեւան-Մարտունի, Երեւան-Ստեփանակերտ երթուղին եւ այլ կարեւոր ուղղություններ: Պարզվում է՝ Նորագյուղցի Բոգոն ստիպում է տաքսու վարորդներին՝ ամեն մի ուղևորափոխադրումից որոշակի գումար հատկացնել իրեն»,- ասված է հրապարակման մեջ:

Նորագյուղցի Բոգոյի անվան հետ առնչվող պատմությունները մամուլում շատ են: Դրանցից վերջինը թերեւս այն է, որ նա տարիներ շարունակ պետական շինություն հանդիսացող Կենտրոնական հավաքակայանի ներսում՝ 2-րդ հարկում, «սեփական» սենյակ եւ հյուրանոց է ստեղծել ապօրինի: Վերջին օրերին Կոստանյանն արդեն լքել է այդ տարածքը, նրա իրերն այնտեղից դուրս են հանում իր մտերիմները, իսկ օրեր անց էլ նույն տարածքը կատարյալ ավերակի վերածել:

2019 թվականի մարտի 1-ի լույս 2-ի գիշերը, ժամը 02:30-ին այրել են նաեւ ՀՀ կենտրոնական ավտոկայանի տնօրեն Ռոման Համբարձումյանի «Լեքսուս» մակնիշի ավտոմեքենան: Համբարձումյանը շուրջ 1 ամիս է՝ ինչ նշանակվել է ավտոկայանի տնօրեն եւ նրա նշանակվելուց հետո է Կոստանյանը ստիպված լքել իր «սեփականաշնորհած» տարածքները: Թե որքանով նոր տնօրենի մեքենայի այրվելը կապ ունի Կոստանյանին «իր սենյակից» հանելու եւ Կոստանյանի իրականացրած անօրինական բիզնեսը վերացնելու հետ՝ քննությունը ցույց կտա: