ՋՕՄ-երում ստուգումներ կանենք, կտեսնենք՝ ով ինչքան է գողացել, հետո չգաք, ասեք՝ ջրօգտագործողներին լցնում են բանտերը

Ազգային ժողովում այսօր «Լուսավոր Հայաստան» խմբակցության պատգամավոր Սրբուհի Գրիգորյանը վարչապետ Նիկոլ Փաշինյանին հայտնեց, որ Սյունիքի մարզում խնդիր կա ոռոգման ջրի եւ ջրօգտագործողների հետ կապված՝ մասնավորապես անցած տարվա ապրիլից ՋՕ-երը աշխատավարձ չեն ստացել, եւ աշխատակիցները հայտնել են, որ բոյկոտում են ոռոգման սեզոնին նախապատրաստությունը։ Ի պատասխան՝ վարչապետ Փաշինյանն ասաց, որ Ջրօգտագործողների ընկերությունների աշխատակիցներն իրենց աշխատավարձը ստանում են հավաքագրումների հիման վրա․

«Կա ջրօգտագործող, իր համար ստեղծել է միություն, ընտրել ջրօգտագործողների միության նախագահ: Այսինքն՝ ջրօգտագործողը վարձը վճարում է, միությունը հավաքագրում է, ստանում աշխատավարձ։ Ի՞նչ է նշանակում՝ բոյկոտում են։ Ես երեկ տեսա վերնագիր, որ մի շարք ջրօգտագործողների դեմ քրեական գործ է հարուցվել 1 միլիարդ դրամի արհեստական պարտք կուտակելու համար: Ես չեմ հասկանում, ամեն մեկը իր արածն ու չարածը, իր գողացածը պետք է գցի կառավարության վրա, ցույց անի, որ աշխատավարձ չեն ստացե՞լ: Չեք աշխատել, չեք ստացել: Մենք կգնանք ջրօգտագործող միություններում ստուգումներ կանենք, կտեսնենք՝ ով ինչքան է գողացել, եւ հետո չգաք ու ասեք՝ ջրօգտագործողների միություններին լցնում եք բանտերը: Էս ի՞նչ սովորություն է, նստեն իրենց տեղը, գողանան, թալանեն, ուտեն, վերջում գան ասեն՝ աշխատավարձ չենք ստացել, կառավարություն՝ դե վճարի: Ինչու պիտի վճարի կառավարությունը»,-վրդովված ասաց Փաշինյանը, ապա ավելացրեց, որ ոռոգման ջրի խնդիրը նույն տիպի խնդիր է․

«Մենք անցած տարվանից ասում ենք՝ 10 միլիարդ հատկացնում ենք սուբվենցիոն ծրագրերի համար եւ առաջարկում ենք հիմնականում ենթակառուցվածքների զարգացման համար ծրագրեր ներկայացնենք: 1.6 միլիարդն ենք կարողացել հատկացնել, որովհետեւ համայնքներն ի վիճակի չեն, որ այդ ծրագրերը ներկայացնեն: Մի տեղ մասնագիտական համապատասխան կարողություն չկա, մի տեղ չեն կարողանում բյուջեի միջոցները հավաքագրել, մի տեղ չեն կարողանում ճիշտ կառավարել համայնքը»,-ասաց Փաշինյանը՝ եւս մեկ անգամ կրկնելով, որ պետք է դուրս գալ հին դիսկուրսից․

«Ես էլի եմ ասում, դուրս եկեք հին դիսկուրսից, որ գալու եք ասեք, կառավարություն՝ ջրօգտագործողների միությունը աշխատավարձ չի ստանում, կառավարությունն էլ հիշի, որ ջրօգտագործողների միության շեֆը իրենց ընտրություն կեղծողն է, ոնց կլինի աշխատավարձ չստանան, էսա հաջորդ ընտրությունները կկրվեն, եկեք շուտ-շուտ իրենց բերանը փակենք, որ գնան նորից մեզ համար ընտրություն կեղծեն: Չեն ստանում աշխատավարձ, ուրեմն լավ չեն կառավարում, ուրեմն ամբողջ մենեջմենթին պետք է գործից հեռացնել եւ նրանց գործունեությունը հետաքննել ու տեսնել՝ ինչու աշխատավարձ չեն ստացել: Չեն ստանում, թող համապատասխան ղեկավարները դիմում գրեն դուրս գան: Ամենաշատ թալանված համակարգերից մեկն է ՋՕՄ-ը, հերթով բոլորի հետեւից կգնանք, կմտնենք պետերի տները, տեսնենք՝ ոնց են ապրում, ինչ ավտոներ են քշում»,- Ազգային ժողովում հայտարարեց վարչապետը:

Առավել մանրամասն՝ տեսանյութում