Հայաստանը Ռուսաստանում գրանցել է ապրանքների ներմուծման ռեկորդային՝ 22% ցուցանիշ

Հայկական արտադրողներին և ապրանքանիշերը ներկայացնող «Ոսկե նուռ» տոնավաճառը Մոսկվայում անցկացվում է 15-րդ անգամ, սակայն, առաջին անգամն է, որ այն հյուրընկալվել էր ВДНХ առևտրա-ցուցահանդեսային համալիրի տարածքում գործող «Արմենիա» տաղավարում: ВДНХ-ն այսօր ամենխոշոր առևտրա-ցուցահանդեսային համալիրն է Մոսկվայում: Այն տարեկան ունենում է շուրջ 40 միլլիոն այցելու:

Ի դեպ, առաջին անգամն է նաև, որ Երևանի քաղաքապետարանի մոսկովյան ներկայացուցչությունը «Ոսկե նուռ» տոնավաճառի կազմակերպման ու անցկացման մեջ, կարծես թե, մասնակցության չի ցուցաբերել: Համենայն դեպս, ներկայացուցչությունից ոչ ոք ներկա չէր կլոր սեղանի շուրջ, որտեղ քննարկվեց երկու մայրաքաղաքների առևտրային և մշակութային համագործակցության հեռանկարներն ու առաջնահերթությունները:

Տոնավաճառի անցկացման ֆինանսավորումը, ինչպես ամեն տարի այս անգամ էլ, Մոսկվայի կառավարությունն է հոգացել, իսկ կազմակերպչական աշխատանքների մեջ ներգրավվել է ՌԴ-ում ՀՀ դեսպանությանը:

Մոսկվայի կառավարության արտաքին տնտեսական և միջազգային կապերի վարչության նախարար Սերգեյ Չերյոմինը, որը մասնակցում էր տոնավաճառի պաշտոնական բացման արարողությանը, ներկայացրեց հայկական կողմի հետ համագործակցության հետագա ծրագրերը:

«Մենք ցանկանում ենք, որ տոնավաճառը դուս գա բերքի տոնի շրջանակներից և ցանկանում ենք միջոցառմանը այլ՝ առավել ընդգրկուն  բնույթ հաղորդել: Հաջորդ տարի մենք նախատեսում ենք անցկացնել Հայաստանին նվիրված մեծ փառատոն ВДНХ -ի ողջ տարածքում, որի ժամանակ տարածքի բոլոր ռեստորաններում ներկայացված կլինի ազգային ուտեստների ճաշացանկ, կկայանա տեղական արտադրության ապրանքների վաճառք և հայկական մշակույթի ու արհեստի ցուցադրություն»,- ասում է Սերգեյ Չերյոմինը:

ՌԴ-ում ՀՀ դեսպան Վարդան Տողանյանն էլ հույս է հայտնում, որ մինչև հաջորդ տարի, երբ տեղի կունենա Հայաստանին նվիրված ֆեստիվալը, «Արմենիա» տաղավարը հյուրերին կներկայանա կերպարանափոխված: ՌԴ-ում ՀՀ դեսպանությունը արդեն Մոսկվայի կառավարության քննարկմանն է ներկայացրել տաղավարի վերաձևավորմանը վերաբերող համապատասխան նախագիծ:

Ինչ վերաբերվում է հայկական ապրանքների տարածվածությանը ռուսական շուկայնում, Սերգեյ Չերյոմինը այդ հարցում  ոչ մի խնդիր չի տեսնեւմ, քանզի իր իսկ խոսքերով շփվում է խոշորագույն ներմուծողների հետ և գտնում է, որ հայական ապրանքները բավարար կերպով ներկայացված են ռուսական շուկայում: Իսկ հարցին, թե ի՞նչու հայկական ապրանքները լայն տարածում չունեն ռուսաստանյան  խոշոր ցանցային սուպերմարկետներում, նա պատասխանում է, որ յուրաքանչյուր առևտրային կետ ունի իր չափորոշիչները՝ գնի և որակի առումով, և եթե ապրանքը լիցենզավորված է ու մրցունակ, ապա խանութը անպատճառ այն կներգրավի իր ապրանքացանկում:

Մեր հարցին ի պատասխան, թե հայկական արտադրողներն այսօր ի՞նչ խնդիրներ ունեն ռուսական շուկան լայնորոն գրավելու հարցում, նույն համոզմունքն է հայտնում նաև ՌԴ-ում ՀՀ Դեսպան Վարդան Տողանյանը: Դեսպանի խոսքերով որևէ հայկական արտադրող, որը պատրաստ է աշխատելու ռուսաստանյան խոշոր շուկայի հստակ օրենքներին համապատասխան, այսօր որևէ խնդիր ունենալ չի կարող: Իսկ խոշոր շուկան, դեսպանի խոսքերով, պահանջում է խոշոր ծավալներ և ներմուծման կայուն պարբերականություն, ինչը մենք դեռևս ապահովել չենք կարողանում:

«Գյուղատնտեսական ապրանքների մրցունակության հարցում մենք ունենք լուրջ խնդիրներ և առաջիկայում դեռ կավելանան այդ խնդիրները, քանի որ Ռուսաստանում մեծանում է գյուղատնտեսական ապրանքների արտադրությունը, ընթանում է սուբսիդավորման գործընթաց, շուկա է մտնում այլ երկրների արտադրանքը: Կա նաև գնային խնդիր: Հայկական ապրանքները թանկ են և, չնայած այդ ամենին, այսօր համարյա բոլոր ռուսական սուպերմարկետներում կարելի է գտնել հայկական ապրանք ու այս տարվա առաջին կիսամյակի վիճակագրությունը վկայում է, որ Հայաստանը գրանցել է ներմուծման ռեկերդային՝ 22% ցուցանիշ անցած բոլոր տարիների համեմատ,- եզրափակում է դեսպանը:

Վերջինս հայտնում է նաև, որ Հայաստանն այս պահին Ռուսաստանում չունի առևտրային ներկայացուցիչ, քանի որ ՌԴ-ում ՀՀ առևտրային ներկայացուցչիչ Կարեն Ասոյանը սույն թվականի հուլիսի 1-ից դադարեցրել է իր պաշտոնավարումը և նոր առևտրային ներկայացուցիչ կնշանակվի այն ժամանակ, երբ ՀՀ կառավարությունը կմշակի նոր կանոնակարգ՝ առևտրային ներկայացուցիչների ու ներկայացուցչություններին վերաբերող:

«Ոսկե նուռ» տոնավաճառը կշարունակվի մինչև հոկտեմբերի 20-ը:

Նաիրա Բաղդասարյան

Մոսկվա