Ադրբեջանցի բլոգեր ներկայացած այդ անձը պատկառելի հեռավորության վրա էր հարց տալիս, ամեն բան վերահսկելի էր․ Կարապետյան

Բլոգեր ներկայացած ադրբեջանցու հետ Նիկոլ Փաշինյանի հարց ու պատասխանը կամ իրադարձությունը վարչապետի մամուլի խոսնակ Վլադիմիր Կարապետյանը չի գնահատում որպես միջադեպ։ Այս մասին նա ասաց այսօր՝ Իտալիայում «Հայկական ժամանակ»-ի, Հանրային հեռուստաընկերության, «Երկիր մեդիա»-ի, «Շանթ»-ի եւ «Արմենպրես»-ի հետ ճեպազրույցում՝ անդրադառնալով երեկ Միլանի Հայ Առաքելական Սուրբ Քառասուն Մանկունք եկեղեցում հայ համայնքի ներկայացուցիչների հետ վարչապետի հանդիպման ժամանակ տեղի ունեցած միջադեպին, երբ ադրբեջանցի բլոգեր ներկայացած մի անձ մտավ եկեղեցի եւ արցախյան հակամարտության վերաբերյալ հարց տվեց վարչապետին։

Կարապետյանը նշեց, որ հանդիպումը եկեղեցում էր, եւ այնտեղ մուտքը բոլորի համար ազատ էր, բայց, բնականաբար, այնտեղ, որտեղ վարչապետն է, անվտանգության հատուկ միջոցառումներ են ձեռնարկվում, եւ այդ միջոցառումները ձեռնարկվել են։ Նրա խոսքով՝ միեւնույն ժամանակ փաստաթղթերի ստուգում չի իրականացվել, եւ այդ առումով յուրաքանչյուր մարդ՝ համապատասխան հանդերձանքով ու համապատասխան կերպով, կարող էր մուտք գործել եկեղեցի։

Միեւնույն ժամանակ նա վստահեցրեց, որ ադրբեջանցի բլոգեր ներկայացած այդ անձը պատկառելի հեռավորության վրա էր հարց տալիս վարչապետին, եւ ամեն բան վերահսկելի էր․

«Ընդ որում, այդ անձնավորությունը բավականին բարձր էր հարցը հնչեցնում, եւ վարչապետը հարցի հնարավորություն ընձեռեց նրան, այնուհետեւ հանգամանալից, մանրամասն պատասխանեց, որ լսելի լինի ոչ միայն Հայաստանում, այլ նաեւ Ադրբեջանում եւ ամենուր»։

Հարցին՝ այդ անձի մուտքը եկեղեցի արդյոք անվտանգության աշխատակիցների թերացո՞ւմն էր, հնարավո՞ր է՝ վարչապետի անվտանգությունն ուժեղացվի, Վլադիմիր Կարապետյանը պատասխանեց, որ եթե համապատասխան մարմինները գնահատական տան, որ տեղի ունեցածը ռիսկեր պարունակել է, ըստ այդմ՝ քայլեր կձեռնարկվեն։ Սակայն անձամբ չլինելով պրոֆեսիոնալ՝ Կարապետյանն ընդգծեց, որ եկեղեցում ամեն բան վերահսկելի էր, անվտանգության ծառայողներն էլ իրականացնում էին իրենց համապատասխան գործառույթները։

Անդրադառնալով Սերժ Սարգսյանի՝ ԵԺԿ-ի համագումարում արած հայտարարությանը, թե հեղափոխության անվան տակ իշխանության եկածներն իրականում վերջին 1,5 տարվա ընթացքում որեւէ հեղափոխական փոփոխություն չեն արել, ներքին ու արտաքին քաղաքական օրակարգերում բեկումնային փոփոխություն չեն արել, Վլադիմիր Կարապետյանը նախ վկայակոչեց Ազգային ժողովում վարչապետ Փաշինյանի վերջին ելույթը, որտեղ նա, պատասխանելով պատգամավորների հարցերին, մանրամասն խոսեց այն փոփոխությունների մասին, որոնք ակնհայտ են, տեսանելի եւ շոշափելի։ Կարապետյանի խոսքով՝ այդ ելույթից հետո որեւէ լուրջ հակափաստարկ չհնչեց։

«Իսկ Սերժ Սարգսյանը նման հայտարարություններ անելիս, իմ կարծիքով, պետք է նախ բացատրություն տա՝ ինչու է իր անվտանգության ծառայության ղեկավարը (նկատի ունի Սերժի Վաչո անունով հայտնի Վաչագան Ղազարյանին,- հեղ․) սիրահոժար վերադարձնում գումարները, ինչու են իր եղբայրները միլիոնավոր դոլարներ վճարում պետբյուջե, ինչու է իր ողջ շրջապատը, ընդունելով իրավապահների կողմից իրենց մեղսագրվող մեղադրանքները, թալանված գումարները վերադարձնում պետական բյուջե։ Եվ ես խոսում եմ հենց ի՛ր շրջապատի մասին, լավ կլինի՝ ինքը մտածի եւ պատասխան տա հենց էդ շրջապատի եւ կոռուպցիոն գործարքների մեջ թաթախված մարդկանց մասին»։

«Հայկական ժամանակ»-ի դիտարկմանը, որ նույն այդ ելույթում Սարգսյանը խոսում է նաեւ այն մասին, թե Հայաստանում ժողովրդավարության առումով վտանգավոր գործընթացներ են տեղի ունենում, Կարապետյանը հայտարարեց, որ ինքն այն մարդկանցից է, որ ապրել է Սերժ Սարգսյանի ժողովրդավարության օրոք եւ կարող է ասել՝ դա ուղղակի մղձավանջ էր․

«Իսկ ինչ վերաբերում է այսօրվան, յուրաքանչյուրն ազատ է իր խոսքն ասել, տեսնում եք՝ ինչ է կատարվում ԶԼՄ-ներով, հեռուստաընկերությունները հիմնականում քննադատաբար են տրամադրված եւ ազատորեն իրենց խոսքն են հասցնում հեռուստադիտողին, նույնը քաղաքական գործիչներին է վերաբերում, «Վերնատունը» իր հավաքն անում է Մարզահամերգային համալիրում, իսկ մենք չէինք էլ կարող երազել երեք կամ երկու աստղանի հյուրանոցում որեւէ թույլտվություն ստանալ եւ միջոցառում անել»,- ասաց վարչապետի մամուլի խոսնակը՝ ընդգծելով, որ նախկինն ու ներկան համեմատելի չեն, եւ Սերժ Սարգսյանը պարզապես երեւի այնքան է կտրված իրականությունից, որ իրեն թույլ է տալիս նման բան ասել։

Մեր հարցին՝ ինչն է պատճառը, որ հեռուստաընկերությունները քննադատաբար են տրամադրված, Կարապետյանը պատասխանեց, որ պատճառներից մեկն այն է, որ որոշ ԶԼՄ-ների սեփականատերերը այն մարդիկ են, որոնք կապված են նախկին իշխանավորների հետ՝ բիզնես թելերով, վարչական, մարդկային թելերով, եւ իրենց թվում է, որ այդպես կկարողանան ավելի թուլացնել այս իշխանությանը կամ սասանել վճռականությունը․

«Բայց ինչպես երեկ Փաշինյանը կրկնեց եկեղեցում՝ բոլոր կոռուպցիոներները պատասխան են տալու, յուրաքանչյուր գողացված լումա վերադարձվելու է»։

«Հայկական ժամանակ»-ի նկատառմանը, որ Փաշինյանն իր ելույթում անուններ չտվեց, բայց դրան արձագանքեց Միքայել Մինասյանը եւ Փաշինյանին «փրկիչ» անվանեց, Կարապետյանը կեսկատակ ասաց․ «Եթե անուններ չտվեց, բայց Մինասյանն արձագանքեց կարող է՞ տեսած լինեք փողոցներում»։

Հիշեցնենք, որ Փաշինյանը Միլանում՝ իր ելույթի ժամանակ ասաց, որ այսօր Իտալիայում թաքնված են որոշ ամենահայտնի կոռուպցիոներներ, եւ որեւէ մեկը հույս չունենա, թե պլստալու է․

«Հայաստանի արդարադատության ձեռքը հասնելու է նրանց, չգիտեմ՝ վատիկանների որ պադվալներում են պախկված, վզներից բռնելու ենք հանենք, տանենք կանգնեցնենք դատարանները, եւ գողացված վերջին կոպեկը վերադարձնենք ժողովրդին: Բայց մենք քարոզում ենք սեր, եկեղեցում ենք մենք գտնվում»,- ասել էր Փաշինյանը: