Կորոնավիրուսակիր 84 քաղաքացի կա այս պահին, բոլորի վիճակը լավ է. իրավիճակը երկրում վերահսկելի է. վարչապետ (տեսանյութ)

ՀՀ վարչապետ Նիկոլ Փաշինյանը քիչ առաջ ֆեյսբուքյան իր էջի ուղիղ եթերում ամփոփեց կորոնավիրուսային իրավիճակը Հայաստանում եւ ներկայացրեց մանրամասներ հիվանդների այսօրվա վիճակից: Նա նշեց, որ այժմ երկրում  հաստատված վիրուսով 84 քաղաքացի կա, բոլորի վիճակն էլ լավ է, բարդացած դեպքեր չկան:

«Առաջին դեպքը՝ Իրանից ժամանած մեր քաղաքացին էր: Ըստ էության՝ մենք կանգնեցրինք Իրանից եկած քաղաքացու միջոցով կորոնավիրուսի տարածումը, նաեւ՝ այդ քաղաքացու պատասխանատվության շնորհիվ:

Երկրորդը, Էջմիածնի դեպքն էր, որով բավական ընդլայնվեց տարածումը, բայց հիմա մենք դանդաղացրել ենք տարածումը:

Երրորդը, արտադրամասի դեպքն էր, եւ մենք հիմա զբաղվում ենք այդ շրջանակների մեկուսացմամբ:

Նշեմ, որ եթե դրսից ժամանած մեր քաղաքացիներն ունենային շրջահայացություն եւ հետեւեին հսկողության տակ գտնվելու մեր հրահանգներին, այս պատկերը չէինք ունենա: Հույս ունենք, որ կհասցնենք արտադրամասի ճյուղի հետեւից եւ կկանգնեցնենք նաեւ այս ճյուղը:

Այս պահին մի քանի հարյուր մեկուսացած անձ ունենք, եւ դեռ կարող է այդ թիվը մեծանալ: Իրանի ուղղության նման հուսով ենք, որ մեր մեթոդն էֆեկտիվ կլինի Էջմիածնի եւ արտադրամասի տարբերակում էլ:

Մենք ասացինք, որ Չարենցավանում էլ դեպք ունենք, բայց, ըստ էության, այդ մարդիկ շփման շրջանակ չեն ունեցել, ժամանել են Ֆրանսիայից, եւ ախտորոշվել է նրանց մոտ վիրուսը, այս տարբերակում ավելի հեշտ է:

Այս պահին 444 մարդ ունենք մեկուսացված եւ 790 մարդ, որոնց հորդորել ենք ինքնամեկուսնալ»:

Վարչապետը նաեւ նշեց, որ երեկ դեղատներում շրջայցի արդյունքում արձանագրել են, որ սպիրտի եւ ալկոգելի պահանջ կա դեղատներում: Իսկ այսօր պարզվել է, որ Հայաստանում օրական 11 հազար լիտր սպիրտ է վերամշակվում, որի մեծ մասը գնում է ալկոգելի արտադրությանը: Ըստ էության՝ վաճառքի տվյալները ցույց են տալիս, որ ՀՀ քաղաքացիների տներում մեծ քանակությամբ ալկոգել է կուտակված, դա խուճապային գնումների հետեւանք է: Նիկոլ Փաշինյանը հավաստեց, որ կան 3 ընկերություններ, որոնք արտադրում են ալկոգելը, այսօր երեւի չորրորդ ընկերությունը կմիանա արտադրությանը, սակայն մեր երկրում ալկոգելի դեֆիցիտ չունենք, գուցե որոշ տեղերում խնդիր կա, բայց մեծ հաշվով դեֆիցիտ չունենք. մեծ արտադրություն է գործում:

«Եկել ենք եզրակացության՝ քանի որ առավել խոցելի խմբերը 60, 70 տարեկանից բարձր մարդիկ են, կարիք չկա, որ նրանք կենսաթոշակի ստացման համար գնան, կուտակվեն փոստային բաժանմունքներում, մենք կանենք այնպես, որ «Հայփոստ»-ի բաժանմունքի աշխատակիցները գնան եւ իրենց տանը գումարը տրամադրեն, իհարկե, համապատասխան պաշտպանիչ միջոցներով»,- ասաց վարչապետը:

Նա նաեւ ներկայացրեց մեր հիվանդների վիճակի վերաբերյալ թվերը՝ նշելով՝ կարող է ասել, որ 2 թոքաբորբով հիվանդներից մեկն ունի, այսօրվա ջերմաչափմամբ, 37.3 աստիճան, մյուսը՝ 36.6 աստիճան ջերմություն:

«84 մեր քաղաքացիներից 26 հոգի ունեն 37-ից բարձր ջերմություն, բայց՝ ոչ շատ բարձր: 39 աստիճան ջերմող պացիենտ մենք չունենք, այս առումով իրավիճակը բավական լավ է: Մենք 700 թեստավորում ենք արել, 84 ախտորոշված դեպքերից 17-ն այսպես է հաստատվել, եթե մեր Առողջապահության նախարարությունը ջանքեր չգործադրեր, այս մարդիկ ընդհանրապես ախտանշաններ չունեին, որեւէ բողոք չկար եւ այժմ էլ չկա:

Ընդհանուր առմամբ, ըստ էության, կորոնավիրուսն առայժմ մեզ համար անցնում է թեթեւ սցենարով, ռիսկային գոտում գտնվող մեր հիվանդները լավ են, եւ Առողջապահության նախարարությունը հավաստիացնում է, որ այս պահին մեր ռիսկային խմբի քաղաքացիների հետ կապված որեւէ խնդիր չենք ունենա:

Էլի պետք է ասեմ, որ կարեւոր է յուրաքանչյուրիս սոցիալական պատասխանատվությունը: Այս առումով վարչապետը կարեւորեց ջերմություն ունենալու դեպքում ինքնամեկուսանալ եւ հետեւողական լինել:

Կարծում եմ՝ մենք այս փորձությունից էլ պատվով դուրս կգանք»,- եզրափակեց վարչապետը: