Ինչու են թուլացվում սահմանափակումները, միաժամանակ երկարաձվգվում է արտակարգ դրությունը․ Տիգրան Ավինյան

Արտակարգ դրությունը ՀՀ ամբողջ տարածքով եւս 30 օր երկարաձգելու որոշումը հանրության շրջանում որոշակի դիսկուրս է ձեւավորել։

Այս համոզմանն է ՀՀ փոխվարչապետ Տիգրան Ավինյանը։ Նա ասաց, որ մինչ օրս կատարվել է 36.016 թեստ, որոնց արդյուքնում հաստատվել է հիվանդության 3860 դեպք, ունենք առողջացած 1572 անձ եւ փաստացի այս պահին բուժում է ստանում 2218-ը։ Ավինյանը ցավով նշեց նաեւ, որ կորոնավիրուսով պայմանավորված՝ ՀՀ-ում գրանցվել է 49 մահվան դեպք։

Մարտի 1-ից մինչ օրս հաստատված դեպքերի պարզ դինամիկայից տեսանելի է, որ մարտ-ապրիլ ամիսներին, երբ տարբեր խստությամբ կիրառվում էին տեղաշարժի եւ տնտեսական գործունեության սահմանափակումները, հարաբերականորեն հարթ դինամիկա է արձանագրվել։ Ավինյանի խոսքով՝ մայիսի սկզբից դեպքերն սկսել են ավելի ինտենսիվ աճել՝ պայմանավորված նախ սահմանափակումների թուլացմամբ, ինչպես նաեւ՝ թեստավորման ծավալների կտրուկ աճով։

Վարակի ինտենսիվության գործակիցը մայիսի 5-ի դրությամբ կազմել է 1,48, եւ այն հարաբերականորեն մնացել է նույն սահամանաչափի վրա։ Ավինյանն այս տվյալին զուգահեռ հայտարարեց նաեւ, որ վարակի տարածման ինտենսիվությունը հնարավոր է լինում մարել այն դեպքում, երբ գործակիցը 1-ից փոքր է, մինչդեռ արտակարգ դրության ռեժիմը հայտարարելուց հետո գործակցի նվազագույն արժեքը գրանցվել է մարտի վերջին, երբ առաջին անգամ կիրառվեց տեղաշարժի եւ տնտեսական գործունեության սահմանափակումները։

Նրա համոզմամբ՝ շատերի մոտ կարող է արդարացիորեն հարց առաջանալ, թե ինչու են նման իրավիճակում թուլացվում սահմանափակումները, միաժամանակ՝ երկարաձգում արտակարգ դրությունը։ Այս հարցին Ավինյանն ասաց կանդրադառնա, երբ համառոտ ներկայացնի իրականացված գործողությունները։ Փախվարչապետի համոզմամբ՝ դրա միջոցով ընկալելի կլինի առաջիկայում ձեռնարկվող միջոցառումների տրամաբանությունը։

Բացի կանխարգելիչ գործողություններից, Ավինյանը ներկայացրեց նաեւ, որ արդեն երրորդ թռիչքն է իրականացվում Չինաստանից։ Այսպես կառավարությունը ապահովել է տարբեր սարքավորումներ եւ թեստերի արտադրության համար ռեագետների վերջին խմբաքանակը։

Անդրադառնալով առողջապահական համակարգում կատարած աշխատանքներին՝ Ավինյանը նախ եւ առաջ ընդգծեց, որ կորոնավիրուսի դիմակայման կառավարության ռազմավարական ուղղություններից մեկն ախտորոշիչ լաբորատոր ցանցի պատրաստվածության ապահովումն էր։

Այսօր երկրում ստեղծվել է կորոնավիրուսային հիվանդության ախտորոշում իրականացնող լաբորատորիաների ցանց, ռեֆերենս եւ 3 հետազոտական լաբորատորիա։ Ավինյանի խոսքով՝ սա վկայում է, որ եթե նախնական շրջանում օբյեկտիվորեն բավարար հնարավորություններ չկային թեստավորման ծավալների ավելացման համար, ապա այսօր մեկ օրվա ընթացքում իրականացվող թեստերի թիվը եռապատկվել է՝ հասնելով 1000-ի։

Այժմ արդեն, առավել, քան երբեւէ, ակնհայտ է պետական համակարգում համապարփակ եւ խորքային բարեփոխումների կարեւորությունը։ Ավինյանն ասաց, որ առաջիկայում լծվելու են այդ աշխատանքներին եւ հայտարարեց նաեւ, որ այսօր արդեն շատ հարցեր այլ լույսի ներքո են երեւում։ Ակնհայտորեն նաեւ պետական համակարգում նույնպես բազում կարծրատիպեր եւ միֆեր պարզապես կոտրվել են։

Այս տվյալների ներկայացումից հետո Ավինյանը ներկայացրեց միայն չորրորդ՝ ներկա փուլի գործողությունների տրամաբանությունը։ Այս փուլում նույնպես կառավարությունը որդեգրում է վարակի տարածման դինամիկայով եւ առողջապահական համակարգի կարողություններով պայմանավորված սցենարային մարտավարական կառավարում իրականցնելու գործելաոճը։ Սա ամենեւին չի նշանակում, որ որոշումները լինելու են դրվագային, եւ, Ավինյանի խոսքով, պարետատան մոտեցումները հիմնված են որոշակի սկզբունքների վրա։ Փոխվարչապետը ներկայացրեց տվյալ սկզբունքը, այն է՝ վիճակի ամենօրյա մոնիթորինգի արդյունքներով եւ հիմնականում հնգօրյա դինամիկայով պայմանավորված՝ ճշգրտվում են առաջիկա 2 շաբաթվա մարտավարական քայլերը։

Մեջբերելով որոշ տեսակետներ՝ Ավինյանը շեշտեց, որ վերջին օրերին շատ է շահարկվում այն միտքը, թե կորոնավիրուսի դեմ պայքարում կառավարությունը ողջ պատասխանատվությունը փորձում է բարդել քաղաքացու վրա։ «Վստահեցնում եմ, որ նման ձեւակերպումները ոչ ավելին են, քան մանիպուլյացիա: Կառավարությունը շարունակում է նույն պատրաստվածությամբ, պատասխանատվությամբ աշխատել եւ ձեռնարկել հնարավվոր բոլոր կանխարգելիչ միջոցառումները»,- ասաց Ավինյանը՝ ավելացնելով, որ այս դեպքում պայքարը բոլորինն է, եւ իրապես այն պահանջում է հանրային լայն կոնսոլիդացիա եւ սոլիդարություն։