Ինչ հարցնում են, ասում եք՝ կքննարկենք, հետո կասենք․ Միրզոյանը՝ ՏՄՊՊՀ թեկնածու Կարեն Սեդրակյանին

ԱԺ-ն այսօր քննարկեց Տնտեսական մրցակցության պաշտպանության պետական հանձնաժողովի (ՏՄՊՊՀ) անդամի ընտրության հարցը։ Նշենք, որ Կառավարությունը ՏՄՊՊՀ անդամի թափուր պաշտոնի համար առաջադրել է Կարեն Սեդրակյանի թեկնածությունը։

Սեդրակյանն իր ելույթի ժամանակ ներկայացրեց Հանձնաժողովի՝ նախկինում կատարած աշխատանքները, հետագա անելիքների տեսլականը։

Նշենք, որ Սեդրակյանը անցած տարի եւս ընտրվել է այս պաշտոնի համար, 1 տարի ժամկետով։ Մինչ դա նա աշխատել է նաեւ «Բարձրավոլտ էլեկտրացանցեր» ՓԲԸ-ում՝ որպես գլխավոր տնօրենի խորհրդական։ Նա եղել է նաեւ ՀՀ ԿԱ ՊԵԿ ներքին աուդիտի վարչության պետ, ՀՀ սփյուռքի նախարարության աշխատակազմի գործերի կառավարիչ եւ Արաբկիրի թաղապետարանի առևտրի, սպասարկումների, տրանսպորտի բաժնի պետի տեղակալ։

Ելույթից հետո պատգամավորները հարցեր ուղղեցին նրան։ Մասնավորապես՝ «Իմ քայլը» խմբակցության պատգամավոր Գեւորգ Պապոյանն անդրադարձավ հեղուկ գազին, որի գինը, ըստ նրա, վերջին ամսում շատ մեծ տատանում է արձանագրել։

Ինչպես ներկայացրեց Պապոյանը, գինը սկզբում եղել է 180-200 դրամ, հետո՝ իջել 90-100, այնուհետեւ՝ 150-160 դրամ։ Նա հարցրեց, թե արդյոք հանձնաժողովը ուսումնասիրություն կատարե՞լ է այդ ուղղությամբ, քանի որ տատանումը շատ մեծ է։

Սեդրակյանը պատասխանեց, որ պահին իրականացվում է ուսումնասիրություն, քանի որ բողոքները շատ են։ Նա չցանկացավ իր անձնական կարծիքն արտահայտել այս խնդրի շուրջ, քանի որ շատ հանգամանքներով է պայմանավորված հեղուկ գազի տատանումը։ Թեկնածուն մեջբերեց բենզինի գնի իջեցումը, տրանսպորտը եւ հավելեց, որ կան ավելի շատ հանգամանքներ։

Նա ասաց, որ ուսումնասիրություններից հետո արդյունքներն անպայման կհրապարակվեն։

«Իմ քայլը» խմբակցության պատգամավոր Արտակ Մանուկյանն իր հարցի ժամանակ կարծիք հայտնեց, որ Սեդրակյանի ելույթն ավելի շատ նման էր ՏՄՊՊՀ-ի տարեկան հաշվետվությանը։ Նա հարցրեց, թե այդ ողջ աստղաբուլյի մեջ կա՞ մի բան, որը անձամբ Սեդրակյանի մասնակցությամբ է։

Վերջինս համաձայնեց, որ իր ելույթի մեջ ընդգրկված է ամբողջ 2019 թվականը եւ 2020 թվականին կատարված աշխատանքներ։ Սա նա բացատրեց այն փաստով, որ հանձնաժողովը բաղկացած է 7 անդամից, եւ բոլորը մասնակցություն են ունենում բոլոր աշխատանքներին։

«Լուսավոր Հայաստան» խմբակցության պատգամավոր Սրբուհի Գրիգորյանն էլ Սեդրակյանից կարծիք հարցրեց դիմակների գնի վերաբերյալ։ Նա ասաց, որ Երեւանում դիմակները 50-60 դրամ են, մինչդեռ մարզերում՝ 200։

Սեդրակյանը շեշտեց, որ այս պահին դիմակների մասով վարույթ է ընթանում, ուսումնասիրություններ են տարվում, եւ բոլոր այն հարցերը, որոնք բարձրացվում են, անպայման պատասխաններ կստանան առաջիկայում։ Այնուամենայնիվ, նրա պնդմամբ, մինչ այսօր կատարված ուսումնասիրությունների մեջ չկա դեպք, որ դիմակը ձեռք բերվի 20 դրամով, վաճառվի՝ 200։

«Լուսավոր Հայաստան» խմբակցության պատգամավոր Անի Սամսոնյանն էլ անդրադարձավ ՏՄՊՊՀ-ի՝ տարբեր լրատվամիջոցներին ուղարկած հարցումներին։ Նա հարցրեց, թե ո՞րն է այդ հարցաշարի նպատակը։

Սեդրակյանը պատասխանեց, որ 2019 թվականին ունեցել են տարբեր բողոքներ՝ գովազդային շուկայի հետ կապված։ Նա ասաց, որ չեն կարողացել ամբողջական ուսումնասիրություն անել, քանի որ բողոքները եղել են շատ նեղ։ Այդ պատճառով Հանձնաժողովը որոշել է ուսումնասիրել գովազդի շուկան։ Սեդրակյանի խոսքով՝ հարցաշարերը կազմել է աշխատակազմը, որոնք էլ ուղարկվել են ե՛ւ հեռուստատեսային, ե՛ւ համացանցային, ե՛ւ տպագիր մամուլին։ Նա վստահեցրեց, որ հարցումների նպատակը գովազդի շուկայի վերաբերյալ ուսումնասիրությունն է, այլ նպատակ չկա։

Այնուհետեւ Սամսոնյանը հարցրեց, թե ո՞ր լրատվամիջոցներին է ուղարկվել այդ հարցաշարը, ի՞նչ սկզբունքով են դրանք ընտրվել, ինչո՞ւ են հարցերն ընտրողաբար։

Սեդրակյանը պատասխանեց՝ քանի որ աշխատակազմն է զբաղվել այդ հարցերով, Հանձնաժողովը չի որոշել որ տնտեսվարողներին ուղարկել, դրա համար չի կարող պատասխանել այդ հարցին։ Նա ասաց, որ ուսումնասիրությունները դեռ ընթացքի մեջ են եւ կհրապարակվեն, երբ ամբողջական դառնան։

Այնուհետեւ ԱԺ նախագահ Արարատ Միրզոյանը կատակեց, թե ինչ հարցնում են, Սեդրակյանն ասում է՝ կքննարկենք, հետո կասենք։

Սեդրակյանը պարզաբանեց՝ քանի որ բոլոր այդ հարցերը գտնվում են վարույթներում, ուսումնասիրության փուլում, սխալ կլինի, որ ինքը որեւէ հարցի կոնկրետ պատասխան տա։ «Հանձնաժողովը կոլգիալ մարմին է, եւ այն պետք է որոշի։ Իմ կարծիքը ես հիմա այստեղ արտահայտեմ՝ մի քիչ սխալ կլինի»,- ասաց նա։

Նշենք, որ ՏՄՊՊՀ անդամն ընտրվում է պատգամավորների գաղտնի քվեարկությամբ, այն տեղի է ունեցել ժամը 12։10-13։10 ընկած հատվածում։ Արդյունքները կհրապարակվեն ավելի ուշ։