Հայաստանի Հանրապետության քաղաքացին կորոնավիրուսից մահանալու մատերիալ չէ․ վարչապետ

Աշխարհում նոր տիպի կորոնավիրուսի համավարակը շարունակվում է ծավալվել։ Միայն երեկվա դրությամբ աշխարհում նոր դեպքերը գերազանցել են 100 հազարը, իսկ ընդհանուր դեպքերի թիվը գերազանցել է 12 մլն-ը։ Այս մասին այսօր ՀՀ Կառավարության նիստի սկզբում հայտարարեց վարչապետ Նիկոլ Փաշինյանը։

«Ուզում եմ ընդգծել, որ երեկ Առողջապահության համաշխարհային կազմակերպությունը հայտարարեց, որ օդի միջոցով կարող է վարակը տարածվել։ Սա, ըստ էության, այն է, ինչի շուրջ մենք նախորդ շաբաթ կամ միգուցե ավելի շուտ հայտարարել էինք։ Այս առումով է կարեւոր դիմակների կրումը, այդ թվում՝ բաց տարածքներում»,- նշեց վարչապետը։

Նրա խոսքով՝ Հայաստանում նույնպես շարունակվում է ծավալվել համաճարակը. «Երեկ 526 դեպք ենք ունեցել, ցավոք, կորոնավիրուսից մահերի թիվը հասել է 535-ի, եւս 170 քաղաքացի մահացել է այլ պատճառներով, բայց վարակված է եղել կորոնավիրուսով։ Եվ ես կրկին ուզում եմ ընդգծել, որ հակահամաճարակային մեր ռազմավարությունը շարունակում է մնալ նույնը, այն է՝ սովորել ապրել այնպիսի կանոններով, որոնք մեզ թույլ կտան զրոյացնել նոր դեպքերի թիվը կամ մոտեցնել զրոյի»։

Փաշինյանը նշեց, որ երեկ պարետը որոշում է ստորագրել, որով փոփոխություններ է մտցրել դիմակ դնելու կանոնների մեջ։

«Մասնավորապես՝ մի շարք հիվանդություններ ունեցող անձանց համար բացառություններ են սահմանվել։ Երեկվանից այս որոշումը բավական լայն քննարկման առարկա է դարձել։ Կան տեսակետներ, որ պարզապես քաղաքացիները, այդ որոշումից օգտվելով, զանգվածաբար կխուսափեն դիմակներ կրելուց»,- ասաց վարչապետը։

Նա, դիմելով փոխվարչապետ, պարետ Տիգրան Ավինյանին, խնդրեց, որ եւս մեկ անգամ պարզաբանի ոչ միայն այն փաստը, որ դա վերաբերում է միայն կոնկրետ հիվանդություն ունեցող անձանց, այլեւ փաստաթղթով պետք է հիմնավորված լինի։

Վարչապետը նշեց, որ բանավոր խոսքի վրա չի կարող հիմնվել, հակառակ դեպքում ոստիկանությունը պիտի կիրառի սահմանված տուգանքները։

«Ընդ որում, տուգանքների հետ կապված հայտնի շրջանակները փորձում են շահարկումներ անել։ Այո՛, մենք ասում ենք, որ այդ թվում ամենախիստ վարչական մեթոդներով պետք է կարողանանք ապահովել հակահամաճարակային կանոնների պահպանումը։ Այս ճանապարհին մենք շատ հետեւողական ենք լինելու, անհրաժեշտության դեպքում նաեւ ներդնելու ենք նոր խստացումներ։ Մեր նպատակն այս ճանապարհին ոչ թե մարդկանց տուգանելն է, այլ այնպես անել, որ նաեւ մեր սիրելի հայրենակիցները, որոնց համար մոտիվացիան կարող է լինել միայն տուգանքից խուսափելը, կարողանանք քաջալերել, որ նրանք դիմակներ կրեն, որովհետեւ Հայաստանի Հանրապետության քաղաքացին կորոնավիրուսից մահանալու մատերիալ չէ։ Մենք պետք է քաղաքացիների գիտակցությունը բարձրացնենք, այդ թվում՝ վարչական մեթոդներով, այդ թվում՝ նաեւ հանրային կոմունիկացիայով»,- ասաց Նիկոլ Փաշինյանը։

Արձագանքելով Տիգրան Ավինյանը նշեց, որ երեկվա որոշումը կապված է եղել քրոնիկ շնչառական հիվանդություններ ունեցող անձանց դիմակ դնելու հետ. «Դա որոշակի խնդիրներ է առաջացրել, այդ իսկ պատճառով առողջապահության նախարարության հետ խորհրդակցելով՝ որոշում է կայացվել բաց տարածքում որոշ հիվանդություններ ունեցողների համար դիմակ կրելու պարտադիր պահանջը հանել։ Այդպիսի հիվանդություններն են քրոնիկ շնչառական հիվանդությունները, ասթման, թոքերի քրոնիկ օբստրուկտիվ հիվանդությունը, էնֆիզեման կամ բրոնխիտը՝ ծանր շնչառական անբավարարության առկայության դեպքում, ինչպես նաեւ 3-րդ, 4-րդ ֆունկցիոնալ դասի քրոնիկ սրտային անբավարարություն ունեցող անձինք»։

Փոխվարչապետն ընդգծեց՝ հանրային բաց տարածքներում նրանք կարող են չդնել դիմակ՝ պայմանով, որ վերջիններս իրենց մոտ ունենան համապատասխան հիվանդության փաստը հաստատող բժշկական փաստաթղթեր։ Նա նաեւ հավելեց, որ այդ բժշկական փաստաթղթերի ձեւաչափերը փոխանցվել են ոստիկանությանը, որպեսզի նրանք հստակ իմանան, թե դա ինչ է, որպեսզի չարաշահման հնարավորություններ թույլ չտան։

Վարչապետը ոստիկանապետ Վահե Ղազարյանին ասաց, որ ոստիկանությունը, որեւէ բանավոր խոսքի վրա հիմնվելով, չի կարող դիմակ չդնելու փաստը հարգելի համարել։