Ազատանի ու Մարմաշենի ղեկավարները վարչապետի հրաժարականն են պահանջում, բնակիչներն ասում են՝ մենք Փաշինյանի հետ ենք

Արդեն երկու օր է Շիրակի մարզի երկու համայնքում խառը տրամադրություններ են: Համայնքի ղեկավարները հանդես են գալիս վարչապետ Նիկոլ Փաշինյանի հրաժարականի պահանջով,  նույն համայնքների բնակիչները պնդում են` իրենք վարչապետի կողքին են:

Ազատանի համայնքապետ, ՀՀԿ ներկայացուցիչ Վարդան Իկիլիկյանը համայնքապետարանի անունից տարածել էր վարչապետի հրաժարականի պահանջի մասին հայտարարություն և այլ համայնքների ղեկավարներին ու բնակիչներին էր դիմել, որպեսզի նրանք ևս ակտիվորեն մասնակցեն Նիկոլ Փաշինյանի և կառավարության հրաժարականի պահանջով գործընթացին:

ՀԺ-ի հետ զրույցում Իկիլիկյանն ասաց՝ տարածած հայտարարության տակ հենց իր ստորագրությունն է, այն ոչ միայն իր, այլ Ազատանի համայնքապետարանի աշխատակազմի պահանջն է: Իկիլիկյանը հայտարարությունը ավագանու հետ չի քննարկել, բայց վստահ է՝ 90 տոկոսը համակարծիք է:

Արդյո՞ք Շիրակի մարզպետը խոսել է Իկիլիկյանի հետ, կամ քննարկվե՞լ է հայտարարությունը: Համայնքապետն ասաց քննարկում չի եղել, մարզպետը հարցրել է՝ դո՞ւ ես ստորագրել, ինքն էլ պատասխանել է՝ այո: Ընդամենը դա:

Իկիլիկյանը մինչեւ հայտարարության տարածումը նաև ազատանցիների հետ չի հանդիպել: Վերջիններս այսօր վստահ պնդում են, որ իրենց անունից որևէ մեկն, անգամ համայնքապետը խոսելու, առավելևս նման պատասխանատու կարծիք հայտնելու իրավունք չունի: Իրենք վարչապետին դեմ չեն և համակարծիք չեն համայնքապետի  քայլին:

Ազատանցի Սեյրան Ոսկանյանը ՀԺ-ի հետ զրույցում ասաց՝ ազատանցիների 95 տոկոսը կողմ է Նիկոլ Փաշինյանին, հրաժարական չի պահանջում, միասնական կանգնած են վարչապետի կողքին: «Էն մնացած 5 տոկոսը ՀՀԿ-ի մարդիկ են: Իսկ համայնքապետի հայտարարությունը չգիտեմ՝ ճնշել են իրեն, թե ինքն է էդպես ուզում: Չի կողմնորոշվում էլի, դեռ սպասում է, քամելիոնի պես է, էլի, ինքը, հա կփոխվի: Մենք Ազատանում միասնական կանգնած ենք Փաշինյան Նիկոլի կողքին: Փոփոխություն չկա: Համայնքի անունից իրավունք չունի համայնքապետը ելույթ ունենա: Ես հարցրի՝ ովքեր եք պահանջում Փաշինյանի հրաժարականը, ասում եք աշխատակազմն է, ես աշխատակազմին անհատական հարցնում եմ, ասում են մենք չենք պահանջում: Ներսի իրանց կուխնիայում էլ ասեմ, որ գզվռտոց է (նկատի ունի համայնքապետարանի աշխատակազմը)»,-ասաց Ոսկանյանը:

Վարչապետի հրաժարականի մեկ պահանջ էլ Մարմաշեն խոշորացված համայնքի ղեկավար Կարեն Արշակյանն է տարածել: Հայտարարության մեջ ասված է.

«Հայաստանի Հանրապետության Շիրակի մարզի Մարմաշեն համայնքի ղեկավար Կարեն Արշակյանը, համայնքապետարանի աշխատակազմը, ավագանու անդամների և վարչական ղեկավարների գերակշիռ մեծամասնությունը միացել են Հայաստանի Հանրապետության բազմաթիվ համայնքներին և պահանջում են Հայաստանի ապազգային և ապաշնորհ իշխանությունների` վարչապետի և կառավարության անհապաղ հրաժարականն ու անցնցում հեռացումը»:

Մարմաշենցիների անունից չի արել հայտարարությունը, քանի որ նրանց հետ չի հանդիպել, չի խոսել: 

ՀՅԴ կուսակցության անդամ լինելն արդյո՞ք ունեցել է ազդեցություն նման հայտարարության տարածման համար՝ ՀԺ-ի հարցին պատասխանելով, համայնքապետն ասաց՝ ոչ: Հայտարարության տարածման միակ և հիմնական պատճառն, ըստ նրա, եղել է Արցախի տարածքների հանձնումն ու պատերազմի ելքը:

«Եթե կա մեկը, որ սրտի ցավով չի ընդունում էսօրվա իրավիճակը ու ճիշտ է համարում Կառավարության մոտեցումը նրան, ինչ որ եղավ, ուրեմն ես, ավագանու անդամները սխալվում ենք: Ես կընդունեմ էն ղեկավարին, որը սահմանների հետ խնդիրներ չի ունենա, կտանի տնտեսությունը զարգացման, չի պառակտի երկիրը: Մեր տղեքը հիմի էլ կանգնած են սահմանին վրանների մեջ: Ոչինչ չկա այնտեղ, ոչ մի բան, ոչ վառելիք, ոչ վառարան, ամեն ինչը մենք ենք կազմակերպել ու տարել, ես երկու օր առաջ եմ եկել: Ընդհանուր առմամբ, ես ճիշտ չեմ համարում էսօրվա շարունակությունը»,- ասաց Արշակյանը:

Տեսնո՞ւմ եք որևէ մեկին որպես երկրի նոր ղեկավարի: Հարցին համայնքապետը պատասխանեց, որ մեկ անձի չի տեսնում այդ դերում․ «Պետք է ստեղծվի խորհուրդ, որի կազմում կլինեն զինվորականներ, ռազմագետներ, մեկ տնտեսագետ, մեկ դիվանագետ, մարտական ուղի անցած անձ, մեկ ռազմական տեխնիկայի արտադրությամբ զբաղվող, 10-15 հոգիանոց խումբ, ոչ թե մեկ անձ, մեկ ստորագրություն և վերջ»:

Կարեն Արշակյանը Մարմաշենի կազմի մեջ մտնող 15 բնակավայրի բնակիչների հետ ոչ հանդիպել, ոչ խոսել է այս հայտարարության մասին: ՀԺ-ի հետ զրույցում Մայիսյանի բանկչուհիներից մեկն ասաց՝ իրենք զայրացած, նաև վիրավորված են, որ նման հայտարարություն է տարածվել:

«Մենք Մայիսյանից ենք, ու հրաժարական չենք պահանջել, ու ասեմ, որ ժողովրդի 90 տոկոսը վարչապետի հետ է, չկա հրաժարականի պահանջ, թե ինչու մի քանի հոգու կհրահրեն, էդ էլ մենք տեղյակ չենք: Մենք համայնքապետին ասել ենք, որ մեր անունից հանկարծ հայտարարություններ չանեք»,- ասաց մեր զրուցակիցը: