Վարչապետը, նախարարները եւ այլ բարձրաստիճան պաշտոնյաներ սոցփաթեթի շահառու չեն. բարձրացած աղմուկն ու դրա պարզաբանումը

Կառավարությունը այսօր հավանություն տվեց «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխություններ կատարելու մասին նախագծին՝ սահմանելով, որ սոցփաթեթի շահառուներն ու նրանց ընտանիքները պետության հատկացրած գումարի շրջանակում կկարողանան օգտվել նաև մարզասրահներից, ինչպես նաեւ վճարել ուսման վարկը: Այսինքն՝ նոր որոշմամբ, սոցփաթեթով արդեն իսկ գործող ծառայություններին ավելացվում են ևս երկուսը։ Նախաձեռնության հեղինակը աշխատանքի և սոցիալական հարցերի նախարարությունն է։

Մամուլում ու համացանցում, սակայն, որոշումը մեկնաբանվեց այլ կերպ՝ խեղաթյուրելով այն։ Շատերը սկսեցին գրել, որ պետական պաշտոնյաների կանայք ու երեխաները մարզասրահներ են այցելելու հարկատուների հաշվին:  

Քննադատությունների տարափն ու ապատեղեկատվությունը այն աստիճանի հասան, որ աշխատանքի եւ սոցիալական հարցերի նախարարությունը հանդես եկավ թե՛ գրավոր պարզաբանմամբ եւ թե՛ մամուլի ասուլիսով: Աշխատանքի և զբաղվածության վարչության պետ Ժորա Սարգսյանն ասուլիսում մանրամասնեց, որ սոցփաթեթի ծրագիրը գործում է արդեն գրեթե ութ տարի: Խոսքն այն ծրագրի մասին է, որի շահառուները պետական ծառայողներն են, ուսուցիչները, մշակույթի բնագավառի ներկայացուցիչները, Մետրոպոլիտենի աշխատակիցները եւ այլն: Ընդհանուր առմամբ՝ 147.500 շահառու, որոնց համար պետական բյուջեից տարեկան տրամադրվում է 72 հազարական դրամ, որոնք նրանք առայժմ կարող են ծախսել չորս ուղղություններով՝ առողջության ապահովագրություն, հանգիստ, ուսման վարձ եւ հիպոթեք: Հիմա կառավարությունը նախատեսում է այդ չորս ուղղությունները դարձնել վեցը՝ ավելացնելով նաեւ մարզասրահներ այցելությունը եւ ուսման վարկը, որովհետեւ շատերը հենց վարկ են վերցնում՝ ուսման վարձը վճարելու համար: Ասել է թե՝ երկու ուղղությունները ավելացնելով՝ ընդլայնվում է սոցփաթեթի շահառուների ընտրության հնարավորությունը:

Հավելյալ գումար բյուջեից չի հատկացվելու, շահառուների թիվը մնալու է անփոփոխ:

«Սոցփաթեթի շահառուները բարձրաստիճան պաշտոնյանները չեն: Վարչապետը, նախարարները, փոխնախարարները, մարզպետները, պատգամավորները, գլխավոր դատախազը և այլն. նրանք չեն համարվում սոցփաթեթի շահառու: Այս ծրագիրը միջին և դրանից ներքև օղակի աշխատողների համար է: Շահառու են համարվում պետական համակարգի աշխատողները, ինչպես նաև կրթության, մշակույթի, սոցիալական պաշտպանության, գիտության ոլորտի մի շարք աշխատողներ: Օրինակ, թանգարանների, գրադարանների, Մատենադարանի աշխատողները»,- ասաց  Սարգսյանը՝ հավելելով՝ շահառու են համարվում նաև ԽՍՀՄ և Հայաստանի Հանրապետության ժողովրդական պատվավոր կոչման արժանացած անձինք, որոնք նույնիսկ այս պահին աշխատող էլ չեն:

Աշխատանքի և զբաղվածության վարչության պետի խոսքով՝ սա նոր սոցիալական աջակցության ոլորտ չէ:

«Սա նույն սոցփաթեթի ծառայությունն է: Տարիներ շարունակ այն ենթարկվում է փոփոխություների՝ սա հերթական փոփոխությունն է։ Յուրաքանչյուր տարի ծառայություններից օգտվում է շուրջ 147 հազար 500 շահառու։ Տրամադրվող գումարը մնալու է նույնը՝ ամսական 6 հազար դրամ, տարեկան՝ 72 հազար: Խոսք լինել չի կարող այն մասին, որ սոցփաթեթի շահառուների ընտանիքների համար հավելյալ սոցփաթեթ է սահմանվում: Ավելին, ինչպես գործող կարգավորումներով սոցփաթեթի շահառուների ընտանիքի անդամները կարողանում էին օգտվել այդ 4 ուղղությունից, այնպես էլ երկու ուղղությունն ավելացնելուց հետո նրանք կարող են օգտվել»,- ասաց նա:

Ժորա Սարգսյանը նշեց՝ սոցփաթեթի շրջանակներում իրեն տրամադրվող գումարը շահառուն ցանկության դեպքում կարող է խնայել եւ հաջորդ տարի կանխիկացնել, ինչպես սովորաբար լինում է։ Ցանկը՝ թե որոշման համաձայն որ ծառայություններից կարող է օգտվել շահառուն, կազմելու է ԿԳՄՍ նախարարությունը։ Անդրադառնալով այն հարցին, իսկ ինչու ատամնաբուժական ծառայությունների առաջարկը ներառված չէր այս փաթեթում, նշեց՝ դա արվելու է ոչ թե օրենսդրական փոփոխությամբ, այլ կառավարության որոշմամբ:

«Այս մասով փոփոխությունը ոչ թե օրենքում է նախատեսվել, այլ կառավարության որոշմամբ: Օրենքում արդեն իսկ գրված է, որ սոցփաթեթի գումարներով կարող են օգտվել առողջապահական ծառայություններից, ու քանի որ ատամնաբուժականը առողջապահական ծառայություն է, հետևաբար օրենքում փոփոխություն անելու կարիք չկա: Անհրաժեշտություն կա կառավարության որոշմամբ դա ընդունելու: Այնպես էր այդ առաջարկը նույնպես ուժի մեջ է»,- ասաց Ժորա Սարգսյանը:

Փոփոխությունն, ըստ նրա, միտված է շահառուների առողջ ապրելակերպի բարելավմանը: Ի դեպ այդ փոփոխությունները նախաձեռնվել են շահառուների հետ խորհրդակցելով։

Ատամնաբուժական ծառայության մասով սոցփաթեթի ծրագրում փոփոխություններ կատարելու նախագիծն այժմ արդարադատության նախարարությունում է, որը մոտ օրերս կուղարկվի աշխատանքի եւ սոցիալական հարցերի նախարարություն, այնուհետեւ կհասնի կառավարություն։ Սոցփաթեթի ծրագրում փոփոխություններն ուժի մեջ են մտնելու ընդունվելուց 45 օր հետո։

Մերի Խաչատրյան