Խնդիրներ կան, որոնք պետք է հաշվի առնել. ռազմագետը՝ 5 տարին մեկ 3-ամսյա զինծառայության գաղափարի մասին

Անհնարին բան չկա, պարզապես այդ ամենը ժամանակատար է: ՀԺ-ի հետ զրույցում այսպիսի տեսակետ հայտնեց ռազմական փորձագետ Հրաչյա Պետրոսյանցը՝ անդրադառնալով վարչապետ Նիկոլ Փաշինյանի այն հայտարարությանը, որ գաղափար կա ժամկետային զինծառայությունը փոխելու եւ 5 տարին մեկ 3-ամսյա ծառայություն դարձնելու:

Նշենք, որ վարչապետը շաբաթ օրը՝ ապրիլի 17-ին Վայոց ձորի մարզի Գետափ համայնքի բնակիչների հետ հանդիպման ժամանակ հայտարարեց, որ պետք է գրավիչ դարձնեն ծառայությունը, ժամկետային զինծառայության համակարգը ընդհանրապես փոխեն, ժամկետը կրճատեն: «Կա գաղափար, որ պետք է լինի 5 տարին մեկ 3-ամսյա ծառայություն, որպեսզի երիտասարդները մարտական նվազագույն հմտություններին տիրապետեն»,- ասել է վարչապետը:

Ռազմական փորձագետի կարծիքով՝ անհնար է վաղը վերցնել եւ նման համակարգ դնել, քանի որ ՀՀ-ն ունի անվտանգության խնդիր. «Այդ ամեն ինչի մեջ պետք է շատ մեծ հաշվարկներ կատարել, թե մոտավորապես ինչքան ժամանակ կպահանջվի՝ մի համակարգից մյուսն անցում կատարելու համար: Ինձ չի թվում, որ դա հեշտ աշխատանք է: Կարծում եմ առնվազն 5-ից 10 տարի ժամանակ է պետք դրա համար»:

Նրա կարծիքով՝ 5 տարին շատ երկար ժամանակահատված է. «Այսինքն յուրաքանչյուր արական սեռի անձ քանի դեռ զորակոչային տարիքի մեջ է 5 տարին մեկ 3 ամսով գնալու է ծառայելո՞ւ: Եթե նման համակարգ է ստեղծվում, դա խնդիրներ է առաջացնելու, առնվազն հաշվի առնելով այն հանգամանքը, որ բանակից զորացրվելուց հետո մեր բազմաթիվ արական սեռի ներկայացուցիչներ մեկնում են արտագնա աշխատանքի»:

Նա նշեց, որ մարդիկ, ովքեր ունեն աշխատանք նրանց 3 ամսով աշխատանքից կտրելու դեպքում գործատուն չի պահի այդ տեղը: Ըստ փորձագետի՝ սրանք խնդիրներ են, որոնք պետք է հաշվի առնել:

Հարցին՝ գործող ժամկետային ծառայության 2 տարվա համակարգը խնդիրներ չունի՞, Պետրոսյանցը պատասխանեց. «Այս համակարգն ունի խնդիրներ, միշտ էլ խոսվել է: Ուղղակի հաշվի առնելով շատ հանգամանքներ երբեւէ կոնցեպտուալ փոփոխության մոտեցում չի եղել: Ինչքան էլ, որ դա վատ համակարգ է, թերություններով է, այնուամենայնիվ կա գործող համակարգ: Քանի դեռ դրան զուգահեռ մենք չենք ներդրել մեկ այլ համակարգ՝ իրավունք չունենք հրաժարվելու այս համակարգից»:

Դիտարկմանը՝ ստացվում է այս գաղափարն անհնար չէ իրականացնել, սակայն ժամանակատար է, ռազմական փորձագետն արձագանքեց, որ իր անձնական կարծիքով պետք է սկսվի պրոֆեսիոնալ բանակի ստեղծման ամբողջ գործընթացը, իսկ ներկա համակարգը պետք է ինչպես կա այդպես էլ շարունակվի. «Երբ պրոֆեսիոնալ բանակի համակարգը սկսվի ներդրվել՝ արդեն կերեւա, թե ինչ է պետք անել: Իմ կարծիքով՝ այս համակարգն էլ պետք է գոյություն ունենա, պրոֆեսիոնալ բանակն էլ: Մենք այնպիսի մի միջավայրում ենք, որտեղ ՀՀ յուրաքանչյուր քաղաքացի պետք է ունենա զինվորական որեւէ մասնագիտություն»:

Ըստ նրա՝ պարտադիր ժամկետային ծառայությունը պետք է վերածել ոչ թե մարտական խնդիրների կատարման, այլ զինվորական մասնագիտության ուսուցման, ինչի համար առնվազն 1 տարի պետք է. «Զորակոչվում է, 1 տարվա ընթացքում զինվորական մասնագիտացում է ստանում, հետո արդեն զորացրվում է: Հետո հնարավոր է այդ զորացրվողների միջից մարդիկ անցում կատարեն պրոֆեսիոնալ բանակում ծառայության: Իմ կարծիքով դա ավելի ճիշտ տարբերակ կլինի, քան 5 տարին մեկ 3 ամսով ծառայությունը»:

Պետրոսյանցն ընդգծեց՝ 1 տարի ծառայությունից հետո արդեն 2 տարին մեկ կարող է 10 օրով հավաքներ լինել, որպեսզի մարդիկ պատրաստ լինեն. «Այս պատերազմը ցույց տվեց, որ զորահավաքի խնդիրը չկարողացանք լուծել: Եթե դու խաղաղ ժամանակ ուսումնավարժական հավաքներ չես անցկացնում` չես կարողանում ստեղծել ներդաշնակված մարտական ստորաբաժանում: Իրականում զորահավաքի նման ինչ-որ բան մեզ մոտ եղել է, բայց այդ ժամանակ ներդաշնակված մարտական ստորաբաժանումներ չեն ստեղծվել, իսկ եթե դա չկա, տվյալ ստորաբաժանումը չի կարող մարտական խնդիրներ լուծել»: